លោក ដូណាល់ ត្រាំ ប្រកាសតាម Twitter ដកលោក Mark Esper ចេញពីតំណែងរដ្ឋមន្រ្តីការពារជាតិអាមេរិក
អាមេរិក៖ តាមរយៈបណ្តាញសង្គម Twitter នៅថ្ងៃចន្ទនេះ លោក ដូណាល់ ត្រាំ បានប្រកាសបណ្ដេញរដ្ឋមន្ត្រីការពារជាតិអាមេរិកលោក ម៉ាក អ៊ីស្ពើរ ចេញពីតំណែង ហើយលោក គ្រីស្តូហ្វឺ មីល្លឺ ដែលជានាយកមជ្ឈមណ្ឌលជាតិប្រឆាំងភេរវកម្ម នឹងត្រូវឡើងកាន់តំណែងជារដ្ឋមន្ត្រីការពារជាតិស្ដីទីភ្លាមៗ នេះបើតាមសារព័ត៌មាន AP នៅថ្ងៃទី១០ ខែវិច្ឆិកា ឆ្នាំ២០២០ ។
ស្របពេលជាមួយគ្នានោះដែរ នៅក្នុងលិខិតឆ្លើយតបទៅកាន់លោក ដូណាល់ ត្រាំ នៅថ្ងៃចន្ទដដែលនេះ លោក ម៉ាក អ៊ីស្ពើរ ក៏បានបញ្ជាក់ដែរថា រូបលោកយល់ព្រមទទួលយកការសម្រេចចិត្តរបស់លោក ដូណាល់ ត្រាំ ។ ហើយមន្ត្រីជាន់ខ្ពស់អាមេរិកបន្ទាប់ទៀត ដែលគេយល់ថា អាចនឹងត្រូវបានបណ្ដេញចេញពីតំណែងនោះ រួមមាននាយក FBI លោក គ្រីស្តូហ្វឺ រ៉េយ និងនាយក CIA លោកស្រី ជីណា ហាសភែល ដែលអ្នកទាំងពីរនេះសុទ្ធតែធ្លាប់មានការខ្វែងគំនិតគ្នាជាមួយលោក ត្រាំ ។
សូមជម្រាបផងដែរថា លោក ដូណាល់ ត្រាំ និងលោក ម៉ាក អ៊ីស្ពើរ មានការខ្វែងគំនិតគ្នាលើបញ្ហាជាច្រើន ជាពិសេសគឺបញ្ហាបាតុកម្មតវ៉ាពាក់ព័ន្ធនឹងការស្លាប់របស់បុរសស្បែកខ្មៅ ចច ហ្វ្លយដ៍ ៕
