លោក ចូ បៃដិន ជំរុញអោយពលរដ្ឋអាមេរិកពាក់ម៉ាស់ ដើម្បីជួយទប់ស្កាត់ការកើនឡើងករណីឆ្លង Covid-19
អាមេរិក៖ ប្រធានាធិបតីទើបជាប់ឆ្នោត លោក ចូ បៃដិន បានចេញមុខធ្វើការអំពាវនាវយ៉ាងទទូចអោយពលរដ្ឋអាមេរិកពាក់ម៉ាស់ ដែលនេះជាវិធីសាស្រ្តដ៏ល្អបំផុត ដើម្បីជួយប្រយុទ្ធប្រឆាំងនឹងជម្ងឺ Covid-19 នេះបើតាមសារព័ត៌មានរ៉យទ័រ នៅថ្ងៃទី១០ ខែវិច្ឆិកា ឆ្នាំ២០២០ ។
លោក ចូ បៃដិន បានគូសបញ្ជាក់ថា យើងជាពលរដ្ឋអាមេរិក និងប្រទេសយើងកំពុងស្ថិតក្រោមការគំរាម… ដូច្នេះខ្ញុំសូមអំពាវនាវអោយអ្នករាល់គ្នាពាក់ម៉ាស់ ។ម៉ាស់អាចសង្គ្រោះអាយុជីវិតមនុស្សចាស់ កូនក្មេង និងគ្រូបង្រៀន… ហើយវាថែមទាំងសង្គ្រោះអាយុជីវិតរបស់អ្នកផ្ទាល់ ។
ប្រធានាធិបតីទើបជាប់ឆ្នោតរបស់សហរដ្ឋអាមេរិករូបនេះ បានសង្កត់ធ្ងន់ទៀតថា ការពាក់ម៉ាស់អាចជួយពន្យឺត ឬបន្ថយចំនួនស្លាប់ដោយសារជំងឺ Covid-19 ដែលលោកបានប៉ាន់ស្មានថា អាចនឹងបន្ថែម២០ម៉ឺននាក់ទៀត មុនពេលមានវ៉ាក់សាំងប្រើប្រាស់ជាទូទៅ ៕
