សភាថៃប្រជុំចរចាលើការទាមទារឲ្យកែប្រែរដ្ឋធម្មនុញ្ញ តាមសំណើពួកបាតុករ
នៅថ្ងៃទី១៧ វិច្ឆិកា ២០២០នេះ សភាប្រទេសថៃបានជួបប្រជុំគ្នា ផ្លាស់ប្តូរមតិយោបល់លើការទាមទារឲ្យធ្វើការកែប្រែរដ្ឋធម្មនុញ្ញ ដែលជាសំណើរបស់ពួកបាតុករយុវជន រាប់ខែមកនេះ។
សេចក្តីព្រាងធ្វើវិសោធនកម្មរដ្ឋធម្មនុញ្ញ ៧ចំណុច គ្រោងនឹងត្រូវសមាជិកសភាបោះឆ្នោតគាំទ្រឬច្រានចោល ក្នុងកិច្ចប្រជុំរបស់សភាជាន់ទាបនិងជាន់ខ្ពស់ រយៈពេល២ថ្ងៃ ខណៈដែលការផ្លាស់ប្តូររដ្ឋធម្មនុញ្ញដាច់ខាតត្រូវមានការចូលរួមពីក្រុមសភាទាំងពីរ។ ក្នុងករណី វិសោធនកម្មត្រូវអនុម័តក្នុងសប្តាហ៍នេះ គេត្រូវការពេលវេលាត្រួតពិនិត្យបន្ថែមទៀត ដែលអាចត្រូវការពេលប្រមាណ១ខែទៀត។
មុនពេលសភាប្រជុំចរចាពេលនេះ ពួកបាតុករបានធ្វើសកម្មភាពបាតុកម្ម ដោយចោទថា អតីតមេដឹកនាំរដ្ឋប្រហារយោធាឆ្នាំ២០១៤ លោកប្រាយុទ្ធ ចាន់អូចា ដែលក៏ជានាយករដ្ឋមន្ត្រីថៃផងដែរនោះថា បានគ្រប់គ្រងការបោះឆ្នោត ឆ្នាំ២០១៩ ដើម្បីឈ្នះ ដោយទទួលបានការគាំទ្រពីយោធា។ ពួកបាតុករក៏បាននិយាយថា រដ្ឋធម្មនុញ្ញបច្ចុប្បន្ននេះ ស្ថិតក្រោមយោធា គ្មានប្រជាធិបតេយ្យទេ៕ ប្រភពពី CNA
