ចិនវាយប្រហារលើប្រទេសភែ្នក០៥វិញ ក្រោយរួមគ្នាចោទប្រកាន់ប្រទេសខ្លួនពាក់ព័ន្ធនឹងបញ្ហាហុងកុង
ចិន៖ អ្នកនាំពាក្យក្រសួងការបរទេសចិនលោក ចាវ លីជាន បានថ្លែងនៅក្នុងសន្និសិទកាសែតខ្លីមួយថា មិនថាពួកគេ (អាមេរិក អង់គ្លេស អូស្រ្តាលី កាណាដា និងនូវែលសេឡង់) មានភ្នែក០៥ ឬ ១០ នោះទេ ដរាបណាពួកគេហ៊ានធ្វើឱ្យប៉ះពាល់ដល់អធិបតេយ្យភាពសន្តិសុខនិងផលប្រយោជន៍អភិវឌ្ឍន៍របស់ចិន ពួកគេគួរតែប្រុងប្រយ័ត្នកុំអោយគេចាក់ខ្វាក់ភ្នែករបស់ពួកគេ ។
ការព្រមានខាងលើនេះត្រូវបានធ្វើឡើងបន្ទាប់ពីប្រទេសភ្នែក០៥ ក្នុងនោះមានសហរដ្ឋអាមេរិក អង់គ្លេស អូស្ត្រាលី កាណាដា និងនូវែលសេឡង់ បានរួមគ្នាជាធ្លុងមួយ ដើម្បីចោទប្រកាន់ចិនថា បានក្បត់សន្យារបស់ខ្លួនឯង បន្ទាប់ពីសមាជិកសភាហុងកុងគាំទ្រលទ្ធិប្រជាធិបតេយ្យ០៤រូប ត្រូវបានបណ្ដេញចេញពីសភាហុងកុង ។
រដ្ឋមន្ត្រីការបរទេសប្រទេសទាំង០៥ខាងលើលើកឡើងថា ចិនបានក្បត់ពាក្យសន្យារបស់ខ្លួនជាមួយអង់គ្លេសកាលពីឆ្នាំ១៩៨៤ ក្នុងការរក្សាស្វ័យភាពរបស់ទីក្រុងហុងកុង ដែលក្រោយហុងកុងត្រូវបានប្រគល់ឱ្យចិនវិញនៅឆ្នាំ១៩៩៧ ។
បន្ថែមលើនេះ ពួកគេក៏បានបញ្ជាក់ដែរថា សកម្មភាពរបស់ចិនបានបង្ហាញយ៉ាងច្បាស់ពីការបំពានកាតាព្វកិច្ចអន្តរជាតិ ដែលត្រូវតម្រូវដោយច្បាប់ និងសេចក្ដីថ្លែងការណ៍រួមរវាងចិន និងអង់គ្លេស ដែលទទួលស្គាល់ដោយអង្គការសហប្រជាជាតិ ៕
