ទីបំផុតលោក បៃដិន ទទួលជ័យជម្នះលើលោក ត្រាំ ក្រោយរដ្ឋ ចរជា បញ្ចប់ការរាប់សន្លឹកឆ្នោតដោយដៃឡើងវិញ
អាមេរិក៖ លោក ចូ បៃដិន បានទទួលជ័យជម្នះលើលោក ដូណាល់ ត្រាំ បន្ទាប់ពីរដ្ឋ ចរជា បានបញ្ចប់ទាំងស្រុងនូវការរាប់សន្លឹកឆ្នោតដោយដៃឡើងវិញ ក្នុងការបោះឆ្នោតប្រធានាធិបតីកាលពីថ្ងៃទី០៣ ខែវិច្ឆិកាកន្លងទៅ នេះបើតាមសារព័ត៌មានរ៉យទ័រនៅថ្ងៃទី២០ ខែវិច្ឆិកា ឆ្នាំ២០២០ ។
ក្រុមមន្ត្រីចាត់ចែងកិច្ចការបោះឆ្នោតនៅក្នុងរដ្ឋ ចរជា បានអះអាងពីភាពត្រឹមត្រូវ នៃការរាប់សន្លឹកឆ្នោតឡើងវិញ ហើយថា មិនមានភស្តុតាងណាមួយដែលបង្ហាញថា ការរាប់សន្លឹកឆ្នោតឡើងវិញធ្វើឱ្យប៉ះពាល់ដល់លទ្ធផលបោះឆ្នោតនោះទេ ។
សូមជម្រាបថា ការទទួលស្គាល់ជ័យជម្នះខាងលើនេះ នាំអោយលោក ចូ បៃដិន ក្លាយជាបេក្ខជនប្រធានាធិបតី តំណាងឱ្យគណបក្សប្រជាធិបតេយ្យដំបូងគេ ក្នុងរយៈពេលជាង៣០ឆ្នាំមកនេះ ដែលឈ្នះនៅក្នុងរដ្ឋ ចរជា ជារដ្ឋ Swing state (រដ្ឋមានសំឡេងប្រទាញប្រទង់រវាងបក្សទាំងពីរ) ដែលតែងតែបោះឆ្នោតគាំទ្របេក្ខ ជនប្រធានាធិបតី តំណាងអោយគណបក្សសាធារណរដ្ឋ ៕
