ប្រធានាធិបតីកោះតៃវ៉ាន់បេ្តជ្ញាការពារដែនអធិបតេយ្យភាពរបស់កោះតៃវ៉ាន់ តាមរយៈការកសាងកងនាវាមុជទឹកជំនាន់ថ្មីដែលអភិវឌ្ឍនៅក្នុងស្រុកផ្ទាល់
តៃវ៉ាន់៖ សារព័ត៌មានរ៉យទ័រចុះផ្សាយនៅថ្ងៃអង្គារនេះថា ប្រធានាធិបតីកោះតៃវ៉ាន់លោកស្រី ត្សៃ អ៊ីងវិន ប្រកាសបេ្តជ្ញាការពារដែនអធិបតេយ្យភាពរបស់កោះតៃវ៉ាន់ តាមរយៈការកសាងកងនាវាមុជទឹកជំនាន់ថ្មី ដែលអភិវឌ្ឍនៅក្នុងស្រុកផ្ទាល់ ដោយវាជាគម្រោងដ៏សំខាន់ទទួលបានការគាំទ្រពីសហរដ្ឋអាមេរិក ដើម្បីប្រឆាំងនឹងការកើនឡើងឥទ្ធិពលរបស់ចិន ។
ប្រធានាធិបតីកោះតៃវ៉ាន់រូបនេះ បានថ្លែងក្នុងពិធីចាប់ផ្តើមការសាងសង់កងនាវាមុជទឹកថ្មីនៅឯទីក្រុងកំពង់ផែកៅស៊ុង ភាគខាងត្បូងកោះតៃវ៉ាន់ ថា ការស្ថាបនានេះ គឺបានបង្ហាញពីឆន្ទៈដ៏ខ្លាំងក្លារបស់កោះតៃវ៉ាន់ ចំពោះពិភពលោក ដើម្បីការពារអធិបតេយ្យភាពរបស់ខ្លួន ។
សូមជម្រាបថា កោះតៃវ៉ាន់បានខិតខំប្រឹងប្រែងជាច្រើនឆ្នាំមកហើយ ដើម្បីធ្វើទំនើបកម្មកងនាវាមុជទឹករបស់ខ្លួន ដែលខ្លះមានអាយុកាលតាំងពីសង្គ្រាមលោកលើកទី២ ប៉ុន្តែនៅតែមិនអាចប្រកួតប្រជែងជាមួយកងនាវាចិនបានឡើយ ដែលរួមបញ្ជូនទាំងនាវាដែលមានសមត្ថភាពបាញ់អាវុធនុយក្លេអ៊ែរផងដែរនោះ ៕
