កូរ៉េខាងជើង៖ កូរ៉េខាងជើងបានបញ្ជាក់នៅថ្ងៃព្រហស្បត្តិ៍នេះថា សហរដ្ឋអាម៉េរិកមិនមានជំហរធ្វើការអត្ថាធិប្បាយលើកិច្ចការអន្តរកូរ៉េឡើយ និងគួរតែរក្សាភាពស្ងៀមស្ងាត់ បើសិនចង់ឱ្យការបោះឆ្នោតប្រធានាធិបតី នាពេលខាងមុខនេះរបស់ខ្លួនដំណើរការដោយរលូន នេះបើតាមសារព័ត៌មាន CNA នៅថ្ងៃទី១១ ខែមិថុនា ឆ្នាំ២០២០ ។

ការលើកឡើងបែបនេះរបស់រដ្ឋាភិបាលក្រុងព្យុងយ៉ាងត្រូវបានធ្វើឡើង បន្ទាប់ពីក្រសួងការបរទេសអាម៉េរិកបាននិយាយថា ខ្លួនមានការខកចិត្តជាខ្លាំងចំពោះកូរ៉េខាងជើង ដែលបានសម្រេចចិត្តផ្អាកបណ្តាញទូរស័ព្ទ ទំនាក់ទំនងបន្ទាន់ ជាមួយកូរ៉េខាងត្បូងកាលពីដើមសប្តាហ៍នេះ ។

ទន្ទឹមគ្នា អគ្គនាយកកិច្ចការអាម៉េរិកប្រចាំក្រសួងការបរទេសកូរ៉េខាងជើងលោក ខ្វុង ជុង ហ្គាន់ បានប្រាប់សហរដ្ឋអាម៉េរិកថា ការរក្សាភាពស្ងៀមស្ងាត់មិនត្រឹមតែជាផលប្រយោជន៍ របស់សហរដ្ឋអាម៉េរិកប៉ុណ្ណោះទេ ប៉ុន្តែវាក៏មានអត្ថប្រយោជន៍ផងដែរ សម្រាប់ការបោះឆ្នោតប្រធានាធិបតីប្រកបដោយភាពជោគជ័យនាពេលខាងមុខ ៕