កូវីដ១៩៖ វៀតណាមនឹងទទួលវ៉ាក់សាំងពីកូវាក់ជាង៤លានដូសទៀត ទិញជាង១លានទៀត ក្នុងខែនេះនិងខែក្រោយ
ប្រទេសវៀតណាមនឹងទទួលវ៉ាក់សាំងបង្ការជំងឺកូវីដ១៩ ពីមជ្ឈមណ្ឌលកូវ៉ាក់ នៃអង្គការសុខភាពពិភពលោកចំនួនជាង៤លានដូសទៀត គឺវ៉ាក់សាំង អាស្ត្រាសេនីកា ព្រមទាំងវ៉ាក់សាំង ១.៤៨លានដូសផ្សេងទៀត ដែលវៀតណាមបានបញ្ជាទិញ ដោយវ៉ាក់សាំងទាំងនេះ នឹងមកដល់ក្នុងខែនេះ និងខែក្រោយ នេះបើតាមការចេញផ្សាយរបស់ VNexpress ថ្មីៗនេះ។
យោងតាមវៀតណាមថា ខ្លួននឹងទទួលបាន៤.១៧៧លានដូសទៀត នូវវ៉ាក់សាំងកូវីដ១៩ តាមរយៈមជ្ឈមណ្ឌលកូវ៉ាក់ ក្រោយការសម្របសម្រួលពី UNICEF (យូនីសេហ្វ)។ ប្រភពបញ្ជាក់ថា ១.៣៧៣លានដូស នឹងមកដល់នៅថ្ងៃទី២៥ មីនា ផ្សេងៗទៀត មកដល់នៅខែមេសា ជាវ៉ាក់សាំងផលិតដោយប្រទេសអង់គ្លេស។
វៀតណាមគ្រោងនឹងមានតម្រូវការវ៉ាក់សាំងកូវីដ១៩ ចំនួន១៥០លានដូស ពីប្រភពក្រៅប្រទេសផង និងប្រភពផលិតក្នុងប្រទេសផង នៅត្រឹមឆ្នាំ២០២២។ កន្លងមក វៀតណាមទទួលបានវ៉ាក់សាំង អាស្រ្តានីកា ជាង១១ម៉ឺនដូសហើយ ហើយក៏កំពុងផលិតវ៉ាក់សាំងក្នុងប្រទេសដោយខ្លួនឯងដែរ ខណៈដែលយុទ្ធនាការចាក់វ៉ាក់សាំងបានធ្វើឡើង តាំងពីថ្ងៃទី៨ មីនា ២០២១៕
