នៅសប្តាហ៍ក្រោយនេះ សហរដ្ឋអាមេរិកនឹងចែកចាយវ៉ាក់សាំងបង្ការ Covid-19 របស់ក្រុមហ៊ុន Johnson & Johnson ចំនួន១១លានដូសដើម្បីចាក់ជូនពលរដ្ឋខ្លួន
អាមេរិក៖ សេតវិមាននៅថ្ងៃសុក្រនេះប្រកាសថា រដ្ឋាភិបាលអាមេរិកនឹងចែកចាយ វ៉ាក់សាំងបង្ការវីរុសកូរ៉ូណា ដែលផលិតដោយក្រុមហ៊ុន Johnson & Johnson ចំនួន១១លានដូសនៅសប្តាហ៍ក្រោយ នៅក្នុងកិច្ចខិតខំប្រឹងប្រែងជាបន្តរបស់ខ្លួន ដើម្បីទទួលបាននូវការចាក់វ៉ាក់សាំងចំនួន២០០លានដូសដល់ប្រជាជនក្នុងរយៈពេល១០០ថ្ងៃដំបូងនៃអាណត្តិរបស់លោកប្រធានាធិបតី ចូ បៃដិន ។
បើតាមលោក ចេស ហ្ស៊ីអេន (Jeff Zients) ជាអ្នកសម្របសម្រួលកិច្ចការឆ្លើយតបនឹងជំងឺកូវីដ១៩របស់សេតវិមាន សហរដ្ឋអាមេរិកនៅតែស្ថិតនៅលើផ្លូវ ដើម្បីសម្រេចគោលដៅរបស់ខ្លួន ក្នុងការធ្វើអោយមនុស្សពេញវ័យទាំងអស់ ទទួលបានការចាក់វ៉ាក់បង្ការជំងឺកូវីដ១៩នៅត្រឹមចុងខែឧសភា ឆ្នាំ២០២១ខាងមុខនេះ ។ សម្រាប់ក្រុមហ៊ុន ម៉ូឌែណា និង ភីហ្វឺហ្ស៊ឺ បានអះអាងថា ពួកគេរំពឹងថា នឹងអាចផ្គត់ផ្គង់វ៉ាក់សាំងបាន២២០លានដូសទៅតាមគ្រោងទុកនៅក្នុងត្រីមាសទី១ ឆ្នាំ២០២១ ។
ហើយកន្លងមកនេះ ក្រុមហ៊ុន Johnson & Johnson ក៏ធ្លាប់បានអះអាងដែរថា ខ្លួនត្រៀមវ៉ាក់សាំងផលិតបានជាស្រេចសរុប២០លានដូស ប៉ុន្តែការសម្រេចឲ្យដឹកជញ្ជូនទៅកាន់ទីណាខ្លះនោះ គឺត្រូវរង់ចាំការកំណត់ពីអាជ្ញាធរអាមេរិក ៕ ប្រភព៖ Reuters
