អភិបាលរដ្ឋចំនួន២៦នាក់ចេញសេចក្តីថ្លែងការណ៍រួមមួយថ្កោលទោសការប្រើហិង្សាប្រឆាំងនឹងពលរដ្ឋអាស៊ីនៅសហរដ្ឋអាមេរិក
អាមេរិក៖ ជាផ្នែកមួយនៃកិច្ចខិតខំប្រឹងប្រែង ដើម្បីបញ្ជាក់អំពី «ទិវាជាតិនៃសកម្ម ភាព និងការផ្សះផ្សា» នៅថ្ងៃសុក្រសប្តាហ៍នេះ អភិបាលរដ្ឋចំនួន២៦នាក់នៅសហរដ្ឋអាមេរិកបានចេញសេចក្តីថ្លែងការណ៍រួមមួយថ្កោលទោសចំពោះការប្រើហិង្សាលើជនជាតិអាមេរិកដើមកំណើតអាស៊ី ដែលត្រូវបានគេមើលឃើញថា កើនឡើងចាប់តាំងពីការឆ្លងរាតត្បាតនៃវីរុសកូវីដ១៩មួយឆ្នាំកន្លងទៅនេះ ។
បើតាមសេចក្តីថ្លែងការណ៍រួមខាងលើនេះ យើងថ្កោលទោសរាល់ការរើសអើងពូជសាសន៍ និងអំពើហិង្សា រួមទាំងការស្អប់ខ្ពើមប្រឆាំងនឹងសហគមន៍ជនជាតិអាស៊ី-ប៉ាស៊ីហ្វិកដែលនៅសហរដ្ឋអាមេរិក (AAPI) របស់យើង ហើយយើងត្រូវតែធ្វើបន្ថមទៀត ដើម្បីការពារ ការលើកស្ទួយ និងគាំទ្រសហគមអាស៊ី-អាមេរិក ។ សេចក្តីថ្លែងការណ៍រួមដដែលនេះបានសង្កត់ធ្ងន់ថា ការបាត់បង់គួរឲ្យសោកស្តាយនៃអ្នកជាទីស្រឡាញ់នៅទីក្រុងអាត្លង់តា ដែលធ្វើឲ្យមនុស្ស៨នាក់ស្លាប់ រាប់បញ្ចូលទាំងជនជាតិអាមេរិកដើមកំណើតអាស៊ី៦នាក់ផងនោះ គឺជាផ្នែកនៃសោកនាដកម្មដ៏ឈឺចាប់ និងយូរអង្វែងនៃទង្វើស្អប់ខ្ពើមទៅលើជនជាតិអាមេរិកដើមកំណើតអាស៊ីនៅសហរដ្ឋអាមេរិកទូទាំងសហគមន៍ ។
សូមបញ្ជាក់ថា យោងតាម Stop AAPI Hate ដែលជាអង្គការសង្គមមិនរកប្រាក់ចំណេញ មានមូលដ្ឋាននៅរដ្ឋកាលីហ្វញ៉ា កំពុងកត់ត្រា និងចងក្រងសកម្មភាពអំពើហិង្សាលើពលរដ្ឋអាមេរិកដើមកំណើតអាស៊ី-ប៉ាស៊ីហ្វិកថា ខ្លួនទទួលបានរបាយការណ៍ជិត៣ពាន់៨រយករណីនៃការវាយប្រហារ ឬការរំលោភបំពានទៅលើប្រជាជនអាស៊ីចាប់ពីខែមីនា ឆ្នាំ២០២០ ដល់ខែកុម្ភៈ ឆ្នាំ២០២១ ៕ ប្រភព៖ ស៊ីនហួរ
