ថៃ៖ ខេត្តចំនួន២០ ខ្យល់គ្មានសុវត្ថិភាព ខណៈការឆ្លងកូវីដ១៩នៅតែច្រើន ក្នុងប្រទេស
ប៉ុន្មានសប្តាហ៍ចុងក្រោយមកនេះ បើទោះបីជាប្រទេសថៃនៅតែមានការឆ្លងជំងឺកូវីដ១៩ ក្នុងចំនួនច្រើន ១ថ្ងៃ អាចមានចាប់ពីរាប់សិបនាក់ដល់ជាង១០០នាក់ ឬថ្ងៃខ្លះឈានដល់២០០នាក់ក៏ដោយ មានខេត្តចំនួន២០នៅប្រទេសថៃកំពុងរងគ្រោះពីគុណភាពខ្យល់ដែលគ្មានសុវត្ថិភាព សំដៅលើភាគលម្អិតនៃខ្យល់ពុល PM2.5 នេះបើតាមការិយាល័យគ្រប់គ្រងគុណភាពខ្យល់និងសម្លេងរបស់ថៃ កាលពីថ្ងៃសៅរ៍ ទី២៧ មីនា ម្សិលមិញ។
ខេត្តទាំង២០ដែលមានការបំពុលខ្យល់កម្រិតខ្ពស់នោះរួមមាន Chiang Rai, Mae Hong Son, Chiang Mai, Nan, Phrae, Uttaradit, Sukhothai, Phitsanulok, Kamphaeng Phet, Nong Khai Loei, Nakhon Phanom, Sakon Nakhon, Khon Kaen, Kalasin, Roi Et, Chaiyaphum, Ubon Ratchathani, Nakhon Ratchasima និង Buriram ។
យ៉ាងណាក៏ដោយ រាជធានី-ខេត្តដែលមានករណីឆ្លងជំងឺកូវីដ១៩ច្រើននោះ មិនត្រូវបានព្រមានពីខ្យល់ពុលទេ ដូចជា បាងកក និង សាមុត សាខន ជាដើម។
ពាក់ព័ន្ធនឹងបញ្ហាជំងឺកូវីដ១៩ ម្សិលមិញនេះ ថៃរកឃើញឆ្លង៨០នាក់ទៀត និងស្លាប់ម្នាក់ទៀត ខណៈដែលអ្នកកូវីដ១៩សរុបក្នុងប្រទេស កើនដល់២៨៦៥៧នាក់ ស្លាប់៩៣នាក់៕ ប្រភពពី The Nation
