ការបង្រ្កាបដ៏បង្ហូរឈាមរបស់យោធាមីយ៉ាន់ម៉ា ធ្វើអោយចំនួនអ្នកស្លាប់កើនដល់៥២០នាក់ ខណៈក្រុមឧទ្ទាមភាគតិចគំរាមវាយប្រហាររដ្ឋាភិបាលយោធា
មីយ៉ាន់ម៉ា៖ ការស្លាប់របស់ជនស៊ីវិលក្នុងការបង្ក្រាបរបស់យោធាមីយ៉ាន់ម៉ាទៅលើក្រុមបាតុករនោះ បានកើនឡើងដល់៥២១០នាក់ហើយ ខណៈដែលក្រុមឧទ្ទាមប្រដាប់ដោយអាវុធភាគតិចនៅថ្ងៃអង្គារនេះ បានគំរាមវាយប្រហាររដ្ឋាភិបាលយោធា ប្រសិនបើមិនបញ្ឈប់សកម្មភាពដ៏សាហាវនេះ ។
សមាគមជំនួយអ្នកទោសនយោបាយ (AAPP) បាននិយាយថា សរុបជនស៊ីវិលដែលត្រូវបានសម្លាប់គិតត្រឹមយប់ថ្ងៃអង្គារម្សិលមិញ មានចំនួន៥២១នាក់ ប៉ុន្តែចំនួននេះនឹងបន្តកើនឡើងទៀត ដោយសារនៅមានអ្នករបួសធ្ងន់ជាច្រើន ។ ជាមួយគ្នានេះពលរដ្ឋមីយ៉ាន់ម៉ារាប់ពាន់បានភៀសខ្លួនទៅប្រទេសថៃ និងកំពុងលាក់ខ្លួននៅក្នុងព្រៃពីការវាយប្រហារតាមផ្លូវអាកាសរបស់រដ្ឋាភិបាលមីយ៉ាន់ម៉ា ។ ជុំវិញបញ្ហានេះដែរ នាយករដ្ឋមន្ត្រីថៃលោក ប្រាយុទ្ធ ចាន់អូចា បានបដិសេធថា កម្លាំងសន្តិសុខប្រទេសរបស់លោក បានបញ្ជូនជនភៀសខ្លួនទៅប្រទេសមីយ៉ាន់ម៉ាវិញ ដែលបានឆ្លងដែនចូលប្រទេសថៃពីការវាយប្រហារតាមផ្លូវអាកាសរបស់យោធាមីយ៉ាន់ម៉ា ។
លោក ប្រាយុទ្ធ បន្ថែមថា រដ្ឋាភិបាលរបស់លោកបានត្រៀមជំរំរួចរាល់ហើយ សម្រាប់ដាក់ជនភៀសខ្លួនមកពីប្រទេសមីយ៉ាន់ម៉ា ហើយបើតាមអាជ្ញាធរថៃនោះ ជនភៀសខ្លួនមីយ៉ាន់ម៉ាប្រមាណ៣ពាន់នាក់បានឆ្លងដែនចូលទឹកដីថៃកាលពីថ្ងៃអាទិត្យចុងសប្តាហ៍មុននេះ ។ ដោយឡែកសារព័ត៌មានមីយ៉ាន់ម៉ា អ៊ីរ៉ាវ៉ាឌី បានផ្សាយថា ជនជាតិភាគតិចខារិនជាង១ម៉ឺននាក់បានរត់ចោលផ្ទះសម្បែងរបស់ខ្លួនពីការវាយប្រហារតាមផ្លូវអាកាសរបស់យោធានៅស្រុក ផាពុន ក្នុងរដ្ឋខារិន ៕ ប្រភព៖ AP
