លោក ចូ បៃដិន បញ្ចេញផែនការហេដ្ឋារចនាសម្ព័ន្ធមានទំហំទឹកប្រាក់២ទ្រីលានដុល្លារ ដើម្បីធ្វើទំនើបកម្មបណ្ដាញដឹកជញ្ជូន ការបង្កើតការងារ និងបង្កើនការវិនិយោគនៅសហរដ្ឋអាមេរិក
អាមេរិក៖ ប្រធានាធិបតីអាមេរិកលោក ចូ បៃដិន បានបញ្ចេញផែនការហេដ្ឋារចនាសម្ព័ន្ធ ដែលមានកញ្ចប់ថវិកាទំហំ២ទ្រីលានដុល្លារនៅថ្ងៃពុធនេះ ដើម្បីធ្វើទំនើបកម្មបណ្ដាញដឹកជញ្ជូន ការបង្កើតការងាររាប់លានកន្លែង និងបង្កើនការវិនិយោគ ដែលអាចជំរុញឱ្យសហរដ្ឋអាមេរិកទប់ទល់ឥទ្ធិពលចិននៅលើឆាកសេដ្ឋកិច្ចសកល ។
គោលនយោបាយនៅដំណាក់កាលដំបូងនៃរដ្ឋបាលលោក ចូ បៃដិន គឺកម្មវិធី “Build Back Better” ឬ “កសាងត្រឡប់មកវិញកាន់តែប្រសើរ” ដែលរូបលោកបានកំណត់ផែនការនេះ នៅអំឡុងពេលថ្លែងសន្ទរកថាក្នុងទីក្រុងភីតស្បឺក (Pittsburg) ដើម្បីបកស្រាយលំអិតពីការបោះទុនវិនិយោគដ៏ធំសម្បើម មិនធ្លាប់មានក្នុងរយៈពេល៨ឆ្នាំមកនេះ ។ ពាក់ព័ន្ធនឹងផែនការហេដ្ឋារចនាសម្ព័ន្ធ លោក ចូ បៃដិន បាននិយាយថា នៅថ្ងៃនេះ ខ្ញុំស្នើឡើងនូវផែនការមួយសម្រាប់ជាតិ… ដែលនឹងកសាងសេដ្ឋកិច្ចដ៏មានតម្លាភាព… ផ្ដល់ឱ្យអ្នកគ្រប់គ្នានូវឱកាសជោគជ័យ ហើយនឹងបង្កើតសេដ្ឋកិច្ចមួយមានភាពរឹងមាំបំផុត ដែលពឹងលើខ្លួនឯង និងសេដ្ឋកិច្ចប្រកបដោយភាពច្នៃប្រឌិតនៅក្នុងពិភពលោក ។
បើតាមផែនការហេដ្ឋារចនាសម្ព័ន្ធខាងលើនេះ ទឹកប្រាក់៦២០ពាន់លានដុល្លារនឹងត្រូវផ្គត់ផ្គង់ដល់វិស័យដឹកជញ្ជូន ក្នុងនោះរួមមានទាំងការកែលម្អផ្លូវប្រវែង៣ម៉ឺន២ពាន់គីឡូម៉ែត្រ ការជួសជុលស្ពានរាប់ពាន់កន្លែង និងបង្កើនកញ្ចប់ថវិកាសម្រាប់សេវាដឹកជញ្ជូនសាធារណៈ ៕ ប្រភព៖ Reuters
