សេចក្តីសម្រេចមួយចុះហត្ថលេខាដោយសម្តេចនាយករដ្ឋមន្ត្រី ក្នុងការចាត់តាំងរៀបចំក្រុមមន្ត្រីដើម្បីពិនិត្យ កិច្ចការនិងសីលធម៌របស់ក្រុមឧកញ៉ា ត្រូវបានបញ្ចេញតាមបណ្តាញសង្គមថ្ងៃនេះ ក្នុងរង្វង់ដែលកំពុងមានហេតុការណ៍នៃជម្លោះមួយទាក់ទងនឹងសីលធម៌មិនល្អរបស់ឧកញ៉ា។

សេចក្តីសម្រេចដែលចុះហត្ថលេខាតាំងពីថ្ងៃ ទី ៩មេសាឆ្នាំ២០២១ ប៉ុន្តែទើបបានបញ្ចេញនូវថ្ងៃនេះ គឺជាសេចក្តីសម្រេចបង្ហាញនូវក្រុមមន្ត្រីដែលទទួលបាននូវ ភ្លើងខៀវសម្រាប់រៀបចំលិខិតបទដ្ឋានគតិយុត្តិលើការគ្រប់គ្រងឧកញ៉ា, ការផ្តល់គោរមងារឧកញានិងការ ដក ហូតគោរពងារឧកញ៉ា។ ការបញ្ចេញនូវសេចក្តីសម្រេចនោះផងដែរ គឺនៅទន្ទឹមនឹងអំពើរបស់ឧកញ៉ាខ្លះ កំពុង រងនឹងការរិះគន់ជុំវិញកត្តាអសីលធម៌ មិនគួរឲ្យគោរព។

សូមបញ្ជាក់ថាក្នុងសប្តាហ៍កន្លងមកនេះ ទង្វើរបស់ឧកញ៉ាឈ្មោះ ហេង សៀ ដែលបានហៅអតីតបវរកញ្ញា Miss Grand Cambodia 2020 កញ្ញាមាន ពេជ្ររីតា ថាជាស្ត្រី រកស៊ីផ្លូវភេទ ក្នុងពេលកំពុងមានជម្លោះជាមួយគ្នា។ សម្តីរបស់ ឧកញ៉ានោះ ត្រូវបានគេចោទថាជាសម្តីអសីលធម៌ និងបានធ្វើឲ្យកិត្តិយសរបស់ឧកញ៉ាដែលស្អាតស្អំ បានរងនឹង ភាពប្រឡាក់ប្រឡូសកិត្តិយសផងដែរ។