រាជធានីភ្នំពេញបានបន្ថែមផ្នែកខ្លះទៀតក្នុងខណ្ឌពោធិ៍សែនជ័យជាតំបន់លឿងទុំ ក្រោយការរកឃើញករណី ឆ្លងនៅទីនោះមិនទាន់ធ្លាក់ចុះ។ កាលពីម្សិលមិញ អភិបាលខណ្ឌពោធិ៍សែនជ័យលោក ហែម ដារិទ្ធ ត្រូវគេរាយការណ៍ថាបានរងការឆ្លងនឹងជម្ងឺកូវីដ១៩ផងដែរ។

យោងតាមសេចក្តីសម្រេចរបស់រដ្ឋបាលរាជធានីភ្នំពេញ ដែលអប្សរាណិតទទួលបាននៅថ្ងៃទី៩មិថុនានេះ គឺផ្នែកខ្លះនៃភូមិចោមចៅ៣ ក្នុងសង្កាត់ចោមចៅទី២, ផ្នែកខ្លះ នៃភូមិត្រពាំងពោធិ៍, ផ្នែកខ្លះនៃភូមិព្រៃព្រីងខាងជើង២ និងផ្នែកខ្លះនៃភូមិជម្ពូវ័ន២ ក្នុងសង្កាត់ចោមចៅទី៣ ក្នុង ខណ្ឌពោធិ៍សែនជ័យ គឺជា «តំបន់លឿងទុំ» ដែលជាតំបន់ប្រឈមហានិភ័យឆ្លងខ្ពស់។ ការកំណត់តំបន់ទំាងនេះ ជាតំបន់លឿងទុំ នឹងមានរយៈពេល១៤ថ្ងៃ ចាប់ពីថ្ងៃទី១០ ខែមិថុនា រហូតដល់ថ្ងៃទី២៣ ខែមិថុនា ឆ្នាំ២០២១។