យោងតាមការព្យាករណ៍របស់ក្រសួងធនធានទឹក និងឧតុនិយមនៅថ្ងៃទី១៥មិថុនានេះ បានឲ្យដឹងថា នាសប្ដាហ៏ខាងមុខពោលគឺចាប់ពីថ្ងៃទី១៦ដល់ថ្ងៃទី២២មិថុនាឆ្នាំ២០២១ ប្រទេសកម្ពុជានឹងទទួលឥទ្ធិពលពីខ្យល់មូសុងនិរតីក្នុងកម្រិតពីមធ្យមទៅបង្គួរគួបផ្សំនឹងប្រពន្ធ័សម្ពាធទាបនៅភាគខាងលើ។ ស្ថានភាពបែបនោះនឹងធ្វើឲ្យបណ្ដាខេត្តនៅតំបន់ទំនាបកណ្ដាល អាចនឹងមានភ្លៀងធ្លាក់ក្នុងកម្រិតពីតិចទៅបង្គួរ។ ទន្ទឹមនឹងនោះ បាតុភូតផ្គរ រន្ទះ ខ្យល់កន្ត្រាក់ ក៍អាចកើតមានផងដែរ។ នៅបណ្ដាខេត្ត ជាប់ជួរភ្នំដងរែក និងខ្ពង់រាបឦសានវិញ អាចនឹងមានភ្លៀងធ្លាក់ក្នុងកម្រិតពីមធ្យមទៅបង្គួរ ជាពិសេសនៅភាគឦសាន ភាគខាងជើងនៃជួរភ្នំដងរែក។ ឯបាតុភូតផ្គរ រន្ទះ ខ្យល់កន្ត្រាក់ ក៍អាចកើតមានផងដែរ។ ចំណែកនៅតំបន់មាត់សមុទ្រវិញ អាចនឹងមានភ្លៀងធ្លាក់ក្នុងកម្រិតពីតិចទៅបង្គួរ។ ទន្ទឹមនឹងនោះ ក៏អាចមានខ្យល់ ភ្លៀង ផ្គរ រន្ទះ គួបផ្សំនិងរលកសមុទ្រមធ្យមផងដែរ។