ក្រុមតាលីបង់ កាន់កាប់ស្រុកសំខាន់ៗនៅអាហ្វហ្គានីស្ថាន ខណៈដែលកងកម្លាំង រដ្ឋាភិបាលដកចេញ
ហួន ឌីណា
ក្រុមមន្រ្តីអាហ្វហ្គានីស្ថានបាននិយាយថា ពួកតាលីបង់បានកាន់កាប់ស្រុកនានាមួយចំនួននៅភាគខាងជើងប្រទេសដោយប្រដេញកងកម្លាំងរដ្ឋាភិបាលចេញ ដោយខ្លះបានរត់ទៅព្រំដែនប្រទេសជិតខាងតាហ្ស៊ីគីស្ថាន។
គណៈកម្មាធិការសន្តិសុខជាតិតាហ្ស៊ីគីស្ថានបាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យទី ០៤ មិថុនា ថា បុគ្គលិកយោធាអាហ្វហ្គានីស្ថានជាង ៣០០ នាក់បានឆ្លងកាត់ពីខេត្ត Badakhshan នៃប្រទេសអាហ្វហ្គានីស្ថាននៅពេលដែលពួកតាលីបង់ប្រដេញ មុនពេលឆ្លងព្រំដែនកាលពីល្ងាចថ្ងៃសៅរ៍។
សេចក្តីថ្លែងការណ៍ដដែលបាននិយាយថា៖ «ដោយដឹកនាំតាមគោលការណ៍មនុស្សជាតិ និងភាពជាអ្នកជិតខាងល្អ អាជ្ញាធរតាហ្ស៊ីគីស្ថានបានអនុញ្ញាតឱ្យកងកម្លាំងរដ្ឋាភិបាលអាហ្វហ្គានីស្ថានដកថយឆ្លងចូលទៅក្នុងទឹកដីរបស់ខ្លួន»។
រាប់តាំងពីពាក់កណ្ដាលខែមេសា នៅពេលដែលប្រធានាធិបតីអាមេរិកលោក Joe Biden បានប្រកាសដកទ័ពចេញពីអាហ្វហ្គានីស្ថាន ជាអ្វីដែលលោកហៅថាការបញ្ចប់សង្រ្គាមជារៀងរហូត ពួកតាលីបង់បានបោះជំហានទៅមុខពាសពេញប្រទេស ហើយអស្ថេរភាពចេះតែបន្តកើនឡើង។ ប៉ុន្តែតំបន់សំខាន់បំផុតរបស់ក្រុមនេះ គឺនៅប៉ែកកណ្តាលនៃភាគខាងជើងរបស់ប្រទេស ដែលជាមូលដ្ឋានរឹងមាំរបស់សម្ព័ន្ធមិត្តអាមេរិកតាំងពីឆ្នាំ ២០០១។
ក្រោមកិច្ចព្រមព្រៀងមួយជាមួយក្រុមសកម្មប្រយុទ្ធ អាមេរិកនិងសម្ព័ន្ធមិត្តណាតូរបស់ខ្លួន បានយល់ព្រមដកកងទ័ពទាំងអស់ជាថ្នូរនឹងការប្តេជ្ញាចិត្តរបស់ពួកតាលីបង់មិនឲ្យក្រុមអាល់កៃដា ឬក្រុមជ្រុលនិយមផ្សេងទៀត ធ្វើប្រតិបត្តិការនៅក្នុងតំបន់ខ្លួនគ្រប់គ្រង។
មកទល់ពេលនេះ ពួកតាលីបង់បានកាន់កាប់ប្រហែលមួយភាគបីនៃស្រុកទាំង ៤២១ របស់អាហ្វហ្គានីស្ថាន គឺកើនឡើងជាបន្តបន្ទាប់ ក្រោយពីអាមេរិកនិងសម្ព័ន្ធមិត្តណាតូចាប់ផ្ដើមដកទ័ព។
យ៉ាងណាមិញ សមាជិកក្រុមប្រឹក្សាខេត្តលោក Mohib-ul Rahman បាននិយាយថា ការកើនឡើងនៅភាគឦសាននៃខេត្ត Badakhshan របស់ក្រុមសកម្មប្រយុទ្ធក្នុងប៉ុន្មានថ្ងៃថ្មីៗនេះ ភាគច្រើនមិនមានការប្រយុទ្ធនោះទេ។
លោក Rahman បាននិយាយថា ទាហាន ប៉ូលីស និងទាហានស៊ើបការណ៍អាហ្វហ្គានីស្ថានរាប់រយនាក់ បានប្រគល់ប៉ុស្តិ៍យោធារបស់ខ្លួន ហើយរត់ភៀសខ្លួនទៅកាន់ក្រុង Faizabad នៃខេត្ត Badakhshan។ លោកបន្ថែមថា ទោះបីជា កិច្ចប្រជុំសន្តិសុខមួយកំពុងត្រូវបានគេធ្វើឡើងនាព្រឹកថ្ងៃអាទិត្យនេះ ដើម្បីរៀបចំផែនការពង្រឹងបរិវេណជុំវិញ Faizabad ក្ដី ក៏មានមន្ត្រីជាន់ខ្ពស់ខេត្តមួយចំនួនបានធ្វើដំណើរទៅរដ្ឋធានីកាប៊ុលវិញដែរ។
អ្នកនាំពាក្យក្រុមតាលីបង់លោក Zabihullah Mujahid បានបញ្ជាក់ពីសម្ដីរបស់លោក Rahman ដែលថាការរឹបអូសស្រុកនានារបស់ក្រុមខ្លួន បានធ្វើឡើងដោយគ្មានការប្រយុទ្ធគ្នានោះទេ។
ក្រុមមន្រ្តីអាហ្វហ្គានីស្ថានបាននិយាយកាលពីថ្ងៃអាទិត្យថា ក្រុមតាលីបង់ក៏បានកាន់កាប់ស្រុកសំខាន់មួយនៅក្នុងអតីតមូលដ្ឋានរបស់ខ្លួននៅខេត្ត Kandahar បន្ទាប់ពីការប្រយុទ្ធគ្នាពេញមួយយប់ជាមួយកងកម្លាំងរដ្ឋាភិបាលអាហ្វហ្គានីស្ថាន។
ការរឹបអូសស្រុក Panjwai ភាគខាងត្បូងនៃខេត្ត Kandahar របស់ពួកសកម្មប្រយុទ្ធកើតឡើងតែពីរថ្ងៃប៉ុណ្ណោះ បន្ទាប់ពីកងកម្លាំងអាមេរិកនិងណាតូ បានដកចេញពីមូលដ្ឋានអាកាស Bagram ដ៏សំខាន់របស់ខ្លួននៅជិតរដ្ឋធានីកាប៊ុល ពីកន្លែងដែលក្រុមនេះបានដឹកនាំប្រតិបត្តិការអស់រយៈពេល ២០ ឆ្នាំប្រឆាំងនឹងពួកតាលីបង់ និងសម្ព័ន្ធមិត្តអាល់កៃដា។
ជាច្រើនឆ្នាំកន្លងមកនេះ កងកម្លាំងរបស់តាលីបង់ និងរដ្ឋាភិបាលអាហ្វហ្គានីស្ថាន បានប៉ះទង្គិចគ្នាជាញឹកញាប់នៅជុំវិញស្រុក Panjwai ដោយក្រុមប្រដាប់អាវុធមានបំណងកាន់កាប់តំបន់ដែលនៅជិតក្រុង Kandahar ខេត្ត Kandahar ដែលជាកន្លែងកំណើតរបស់ខ្លួន។
បើតាមអភិបាលស្រុក Panjwai លោក Hasti Mohammad ពួកតាលីបង់បានកាន់កាប់ទីស្នាក់ការប៉ូលីសស្រុក និងអគារការិយាល័យអភិបាល។
ទន្ទឹមជាមួយគ្នានេះ ពួកតាលីបង់បានបង្កើនយុទ្ធសាស្ត្រកាន់តែខ្លាំងឡើងៗ លើតំបន់ភាគខាងជើងដែលស្ថិតនៅក្រោមការគ្រប់គ្រងរបស់ខ្លួន តាមព្រំដែនរបស់ប្រទេសអាហ្គានីស្ថានជាមួយរដ្ឋអាស៊ីកណ្តាលផ្សេងទៀត។ កាលពីខែមុន ក្រុមនេះបានកាន់កាប់ក្រុង Imam Sahib ដែលជាក្រុងមួយក្នុងខេត្ត Kunduz ជាប់ប្រទេសអ៊ូសបេគីស្ថាន ហើយគ្រប់គ្រងផ្លូវពាណិជ្ជកម្មសំខាន់មួយ។
ប្រភព៖
- Taliban seizes key districts in Afghanistan as gov’t forces flee https://www.aljazeera.com/news/2021/7/4/taliban-seizes-key-districts-in-afghanistan-as-govt-forces-flee
- Hundreds of Afghan security forces flee as districts fall to Taliban https://www.theguardian.com/world/2021/jul/04/hundreds-of-afghan-security-forces-flee-as-districts-fall-to-taliban
- Afghanistan: All foreign troops must leave by deadline – Taliban https://www.bbc.com/news/world-asia-57714808
