អារ៉ាប៊ីសាអ៊ូឌីតច្រានចោលការជំទាស់របស់អារ៉ាប់រួមចំពោះកិច្ចព្រមព្រៀងOPEC+
សុខ វេងឈាង
កាលពីថ្ងៃអាទិត្យនេះ រដ្ឋមន្ត្រីក្រសួងថាមពលប្រទេសអារ៉ាប៊ីសាអ៊ូឌីតបានច្រានចោលការជំទាស់របស់ប្រទេសជិតខាងអេមីរ៉ាតអារ៉ាប់រួម (UAE) ចំពោះកិច្ចព្រមព្រៀងស្នើឡើងដោយសមាជិកអង្គការនៃប្រទេសនាំចេញប្រេង+១០ (OPEC+) ហើយអំពាវនាវឱ្យមាន «ការសម្របសម្រួល និងភាពសមហេតុផល» ដើម្បីសម្រេចលើកិច្ចព្រមព្រៀងនៅពេលដែលក្រុមនេះប្រជុំម្ដងទៀតនៅថ្ងៃចន្ទ។
នេះគឺជាការប៉ះទង្គិចដ៏កម្ររវាងសម្ព័ន្ធទាំងពីរនេះ ខណៈពេលដែលផលប្រយោជន៍ជាតិនៃប្រទេសទាំងពីរកាន់តែខុសគ្នាខ្លាំងឡើងៗ ហើយឈានដល់ការកំពប់ទៅលើការកំណត់គោលនយោបាយនៃ OPEC+ នៅចំពេលមួយដែលអ្នកប្រើប្រាស់នៅជុំវិញពិភពលោកត្រូវការកំណត់តម្លៃប្រេងសមរម្យសម្រាប់ការងើបឡើងវិញពីវិបត្តិជំងឺកូវីដ១៩។
កាលពីថ្ងៃសុក្រសមាជិក OPEC+ បានបោះឆ្នោតបង្កើនផលិតកម្មប្រេងឆៅដោយប្រមាណ ២ លានបារ៉ែលក្នុងមួយថ្ងៃចាប់ពីខែសីហាដល់ខែធ្នូឆ្នាំ ២០២១ ហើយនឹងបន្តការកាត់បន្ថយផលិតកម្មប្រចាំថ្ងៃដែលនៅសល់រហូតដល់ចុងឆ្នាំ ២០២២ ដើម្បីធានាស្ថិរភាពតម្លៃ។ អេមីរ៉ាតអារ៉ាប់រួមបានយល់ព្រមចំពោះការបង្កើនផលិតកម្ម ប៉ុន្តែជំទាស់នឹងការបន្តការកាត់បន្ថយផលិតកម្ម ធ្វើឱ្យការចរចាថ្ងៃសុក្របរាជ័យក្នុងការសម្រេចលើកិច្ចព្រមព្រៀងណាមួយ។
រដ្ឋមន្ត្រីថាមពលអារ៉ាប៊ីសាអ៊ូឌីតព្រះអង្គម្ចាស់ Abdulaziz bin Salman បានប្រាប់ទូរទស្សន៍រដ្ឋ Al Arabiya ថា៖ «ការបន្តគឺជាមូលដ្ឋាន ហើយមិនមែនជាបញ្ហាបន្ទាប់បន្សំទេ»។ លោកបានបន្តទៀតថា៖ «អ្នកត្រូវថ្លឹងថ្លែងរវាងការដោះស្រាយស្ថានភាពទីផ្សារបច្ចុប្បន្ន និងការរក្សាសមត្ថភាពសម្រាប់ប្រតិកម្មចំពោះការអភិវឌ្ឍខាងមុខ ប្រសិនបើអ្នកទាំងអស់គ្នាចង់បង្កើនផលិតកម្មនោះត្រូវតែមានការបន្តការកំណត់»។
OPEC+ បានប្រឈមនឹងសម្ពាធយ៉ាងខ្លាំង និងជម្រើសផ្ទុយគ្នា នៅពេលដែលតម្លៃប្រេងឆៅធ្លាក់ចុះយ៉ាងខ្លាំងកាលពីឆ្នាំមុន បន្ទាប់ការរីករាលដាលជំងឺកូវីដ១៩បានបំផ្លាញតម្រូវការ។ ដើម្បីរក្សាស្ថិរភាពតម្លៃពួកគេបានព្រមព្រៀងគ្នាកាត់បន្ថយផលិតកម្មអស់ជិត ១០ លានបារ៉ែលក្នុងមួយថ្ងៃចាប់ពីខែឧសភាឆ្នាំ ២០២០ ដោយគ្រោងនឹងបង្កើនផលិតកម្មវិញនៅចុងខែមេសាឆ្នាំ ២០២២។
បើសិនបង្កើនផលិតកម្មឥឡូវនេះ ខណៈពេលយុទ្ធនាការចាក់វ៉ាក់សាំងមានសំទុះដែលជំរុញក្ដីសង្ឃឹមនៃការស្ដារសេដ្ឋកិច្ច ពួកគេអាចបង្កើនចំណូលរបស់ពួកគេ ប៉ុន្តែការផលិតប្រេងច្រើនពេក ខណៈពេលដែលតម្រូវការមិនទាន់កើន អាចធ្វើឱ្យតម្លៃប្រេងដែលទើបតែងើបឡើង ធ្លាក់ចុះវិញ។ ផ្ទុយទៅវិញអ្នកវិភាគមួយចំនួនបានយល់ឃើញថាការកើនឡើងនៃតម្លៃប្រេងឆៅអាចបង្កអតិផរណានៅជុំវិញពិភពលោក ធ្វើឱ្យការស្ដារសេដ្ឋកិច្ចឡើងវិញមានការលំបាកខ្លាំង។
