អាហ្វហ្គានីស្ថានប្ដេជ្ញាដណ្ដើមដែនដីមកវិញ ខណៈពេលការដកកងទ័ពអាមេរិកបានរួចរាល់ជាង៩០%
សុខ វេងឈាង
កាលពីថ្ងៃអង្គារនេះ រដ្ឋាភិបាលអាហ្វហ្គានីស្ថានបានប្ដេជ្ញាដណ្ដើមយកស្រុកទាំងអស់ដែលបានបាត់បង់ទៅអោយក្រុមតាលីបង់ បន្ទាប់ការដកកងកម្លាំងប្រដាប់អាវុធរបស់សហរដ្ឋអាមេរិកចេញពីប្រទេសនេះជិតរួចរាល់អស់។
កងកុម្ម៉ង់ដូអាហ្វហ្គានីស្ថានរាប់រយនាក់ត្រូវបានដាក់ពង្រាយដើម្បីទប់ទល់នឹងការវាយលុកយ៉ាងសាហាវរបស់ក្រុមឧទ្ទាមនៅភាគខាងជើងប្រទេស មួយថ្ងៃបន្ទាប់ពីទាហានជាង ១០០០ នាក់បានភៀសខ្លួនពីការវាយប្រហារទៅប្រទេសតាហ្ស៊ីគីស្ថាន។
អគ្គបញ្ជាការដ្ឋានមជ្ឈិមបូព៌ារបស់អាមេរិកការដកខ្លួនកងប្រដាប់អាវុធអាមេរិកចេញពីអាហ្វហ្គានីស្ថាន ដែលបានបញ្ជាដោយប្រធានាធិបតីចូ បៃដិនកាលពីខែមេសា ហើយមកទល់ពេលនេះបានរួចរាល់ជាង ៩០% ហើយគេគូសបញ្ជាក់ថាការទទួលខុសរបស់អាហ្វហ្គានីស្ថានក្នុងការប្រយុទ្ធជាមួយក្រុមតាលីបង់កាន់តែកើនឡើង។
ការប្រយុទ្ធគ្នាបានផ្ទុះឡើងនៅខេត្តជាច្រើនទូទាំងប្រទេស ប៉ុន្តែក្រុមឧទ្ទាមបានផ្ដោតជាចម្បងទៅលើភាគខាងជើងនៃប្រទេសនេះ ដោយបានចូលកាន់កាប់ស្រុកជាច្រើនក្នុងរយៈពេលពីរខែកន្លងមកនេះ។
ទីប្រឹក្សាសន្តិសុខអាហ្វហ្គានីស្ថានលោក Hamdullah Mohib ថា៖ «មានសង្គ្រាម មានសម្ពាធ។ ពេលខ្លះអ្វីៗ កើតឡើងទៅតាមបំណងរបស់យើអ ពេលខ្លះមិនទេ ប៉ុន្តែយើងនឹងបន្តការពារប្រជាជនអាហ្វហ្គានីស្ថាន»។
លោកបន្ថែមទៀតថា៖ «យើងគ្រោងនឹងដណ្ដើមស្រុកទាំងនេះមកវិញ»។
កងទ័ព និងកងជីវពលគាំទ្ររដ្ឋាភិបាល ត្រូវបានគេដាក់ពង្រាយនៅភាគខាងជើងនៃខេត្ត Takhar និង Badakhshan ដែលជាកន្លែងក្រុមតាលីបង់បានសម្រុកចូលកាន់កាប់ហើយជារឿយៗដោយគ្មានការតបតវិញ។
ក្រុមមន្ត្រីការពារជាតិអាហ្វហ្គានីស្ថាន បាននិយាយថាពួកគេមានបំណងផ្ដោតលើការធានាសុវត្ថិភាពទីក្រុងធំៗ ផ្លូវសំខាន់ៗ និងទីក្រុងតំបន់ព្រំដែនដែលប្រឈមមុខនឹងការវាយប្រហាររបស់តាលីបង់។ ប៉ុន្តែការប្រយុទ្ធគ្នានៅភាគខាងជើង បានបង្ខំឱ្យរុស្សីបិទស្ថានកុងស៊ុលរបស់ខ្លួន នៅក្នុងទីក្រុងធំ Mazar-i-Sharif ក្បែរព្រំដែនជាមួយប្រទេសអ៊ូបេគីស្ថាន។
ល្បឿននិងភាពងាយស្រួលនៃការចូលកាន់កាប់តំបន់ខាងជើងដោយតាលីបង់ប្រកបដោយប្រសិទ្ធភាព គឺតំណាងឱ្យការប៉ះទង្គិចផ្លូវចិត្តយ៉ាងខ្លាំងដល់រដ្ឋាភិបាលអាហ្វហ្គានីស្ថាន។
តំបន់នេះធ្លាប់ជាទីតាំងមូលដ្ឋានសម្រាប់ក្រុមប្រឆាំងរបបតាលីបង់ «សម្ព័ន្ធមិត្តខាងជើង» ក្នុងអំឡុងពេលសង្គ្រាមស៊ីវិលដ៏គួរឱ្យសាហាវក្នុងទសវត្សឆ្នាំ ១៩៩០ ហើយមិនដែលត្រូវបានសត្រូវវាយបែកទេ។
សេចក្ដីថ្លែងការណ៍របស់វិមានប្រធានាធិបតី Ashraf Ghani បានស្តីបន្ទោសតាលីបង់ចំពោះ«ការបង្ហូរឈាមនិងការបំផ្លិចបំផ្លាញទាំងអស់» ដោយបន្ថែមថារដ្ឋាភិបាលរបស់លោកនឹងមិនចុះចាញ់ក្រុមឧទ្ទាមទេ។
ប៉ុន្តែកាលពីថ្ងៃចន្ទកងទ័ពរដ្ឋាភិបាលអាហ្វហ្គានីស្ថានជាង ១.០០០ នាក់បានភៀសខ្លួនចូលទៅក្នុងប្រទេសតាហ្ស៊ីគីស្ថាន។
ទាហានម្នាក់បាននិយាយថា៖«យើងត្រូវតែបោះបង់ចោលមូលដ្ឋានរបស់យើងពីព្រោះគ្មានការសម្របសម្រួលឬការយកចិត្តទុកដាក់ណាមួយក្នុងចំណោមមេបញ្ជាការរបស់យើងដើម្បីទប់ទល់នឹងការវាយប្រហារនោះទេ។
ប៉ុន្តែលោក Mohib បាននិយាយថាទាហានដែលបានភៀសខ្លួនកំពុងវិលត្រឡប់ ហើយនឹងចូលរួមជាមួយកម្លាំងសន្តិសុខវិញ។ លោកបាននិយាយថា៖« ពួកគេប្រហែលជាបានបោះបង់ចោលមុខតំណែងរបស់ពួកគេពីព្រោះពួកគេបានអស់គ្រាប់រំសេវ ឬពួកគេអស់គ្រឿងផ្គត់ផ្គង់ ប៉ុន្តែគ្មាននរណាម្នាក់រត់ចោលជួរទៅចូលរួមជាមួយតាលីបង់ឡើយ»។
ការចាកចេញរបស់អាមេរិកចេញពីមូលដ្ឋានអាកាស Bagram ដែលបានផ្តល់ជំនួយអាកាសចាំបាច់សម្រាប់ការប្រយុទ្ធ បានបង្កើនភាពលំបាកនៃវិបត្តិដែលប្រឈមដោយកងកម្លាំងរដ្ឋាភិបាលអាហ្វហ្គានីស្ថាន។ រដ្ឋាភិបាលហាក់ដូចជាមានការខ្មាសអៀនចំពោះការមិនដឹងអំពីការចាកចេញរបស់អាមេរិកពីមូលដ្ឋាន Bagram នៅព្រឹកថ្ងៃសុក្រសប្ដាហ៍មុន ធ្វើឱ្យទាហានអាហ្វហ្គានីស្ថានជាច្រើនភ្ញាក់ផ្អើលពេលដែលមិនឃើញមានមនុស្សក្នុងមូលដ្ឋានអាកាសនេះ។
ការដកចេញកងទ័ពលោកខាងលិចយ៉ាងឆាប់រហ័សនេះបានធ្វើឱ្យមានការព្រួយបារម្ភថាក្រៅពីក្រុមតាលីបង់ ក្រុងភេរវករផ្សេងទៀតដូចជាអាល់កៃដា និងរដ្ឋអ៊ីស្លាម អាចនឹងរើបម្រាស់ឡើងវិញ ដែលអាចបង្កអស្ថិរភាពបន្ថែមទៀតទាំងក្នុងតំបន់ និងពិភពលោក។
រដ្ឋាភិបាលរុស្សីបាននិយាយថាពួកគេត្រៀមប្រើមូលដ្ឋានទ័ពនៅតាហ្ស៊ីគីស្ថាន ដែលជាមូលដ្ឋានរបស់រុស្សីធំជាងគេលើដែនដីបរទេស ដើម្បីរក្សាស្ថិរភាពប្រទេសសម្ព័ន្ធមិត្តក្នុងតំបន់ប្រសិនបើស្ថានភាពនៅអាហ្វហ្គានីស្ថានកាន់តែនដុនដាប។
Source:
