អ៊ុយក្រែន និងណាតូធ្វើសមយុទ្ធនៅសមុទ្រខ្មៅ បន្ទាប់ពីការប្រឈមមុខដាក់គ្នារវាងរុស្សី-អង់គ្លេស
សុខ វេងឈាង
កាលពីថ្ងៃសៅរ៍ ទី១០ កក្កដា ប្រទេសអ៊ុយក្រែន និងអង្គការណាតូបានបញ្ចប់ការធ្វើសមយុទ្ធរយៈពេលពីសប្ដាហ៍នៅសមុទ្រខ្មៅ ដែលមានការចូលរួមពីនាវាចម្បាំងរាប់សិបគ្រឿង នៅក្នុងការបង្ហាញពីទំនាក់ទំនងនិងសមត្ថភាពការពាររបស់ពួកគេ បន្ទាប់ពីមានការប្រឈមមុខដាក់គ្នារវាងកងកម្លាំងប្រដាប់អាវុធរុស្សី និងនាវាចម្បាំងចក្រភពអង់គ្លេសនៅដែនសមុទ្រនេះកាលពីខែមុន។
ការធ្វើសមយុទ្ធ Sea Breeze 2021 មានការចូលរួមពីនាវាចម្បាំងចំនួនជាង ៣០ គ្រឿងនិងយន្តហោះជាង ៤០ មកពីបណ្ដាប្រទេសជាសមាជិកអង្គការណាតូ និងប្រទេសអ៊ុយក្រែន។ មេបញ្ជាការនាវាអាមេរិកដែលបានចូលរួមក្នុងសមយុទ្ធ USS Ross លើកឡើងថាសមយុទ្ធនេះត្រូវបានរៀបចំឡើងដើម្បីធ្វើប្រតិបត្តិការរួមគ្នានៃឧបករណ៍ និងបុគ្គលិករបស់ប្រទេសដែលបានចូលរួម កាន់់តែប្រសើរឡើង។
«យើងចង់បង្ហាញដល់មនុស្សគ្រប់គ្នា សហគមន៍អន្តរជាតិថាគ្មានប្រទេសណាមួយអាចទាមទារផ្ដាច់មុខសមុទ្រខ្មៅតែឯងបាន ឬដែនទឹកអន្តរជាតិណាមួយបានទេ» ឧត្ដមនាវីត្រីកងទ័ពជើងទឹកអាមេរិកលោក John D. John បាននិយាយបែបនេះ ហើយបន្តទៀតថា៖ «ដែនទឹកទាំងនោះជាកម្មសិទ្ធិរបស់សហគមន៍អន្តរជាតិ ហើយយើងប្ដេជ្ញាធានាថាប្រទេសទាំងអស់មានសិទ្ធចេញចូលផ្លូវទឹកអន្តរជាតិ»។
ក្រសួងការពារជាតិរុស្ស៊ីអោយដឹងថាខ្លួនបានតាមដានសមយុទ្ធ Sea Breeze យ៉ាងដិតដល់។ ស្របពេលជាមួយគ្នានេះដែរ យោធារុស្សីក៏បានធ្វើសមយុទ្ធជាច្រើននៅសមុទ្រខ្មៅ និងភាគនិរតីនៃប្រទេសរុស្ស៊ី ដោយមានយន្តហោះចម្បាំងធ្វើការសមទម្លាក់គ្រាប់បែក និងការដាក់ពង្រាយមីស៊ីលការពារដែនសមុទ្រចម្ងាយឆ្ងាយ។
កាលពីខែមុន រុស្សី អះអាងថាយោធារបស់ខ្លួនបានធ្វើការបាញ់ និងទម្លាក់គ្រាប់បែកព្រមាននាវាចម្បាំងអង់គ្លេស HMS Defender ដើម្បីដេញនាវានេះចេញឆ្ងាយពីតំបន់ក្បែរឧបទ្វីបគ្រីមៀ ដែលមូស្គូអះអាងថាជាដែនទឹករបស់ខ្លួន។ រុស្សីបានថ្កោលទោសសកម្មភាពរបស់នាវាអង់គ្លេសថាជាការញុះញង់ឱ្យមានរឿង ហើយលើកក្រោយរុស្សីអាចនឹងពន្លិចនាវានឹងហ៊ានធ្វើបែបនេះ។យ៉ាងណាមិញ អង់គ្លេស ដែលមិនទទួលស្គាល់ថាការកាត់យកគ្រីមៀដោយរុស្សីកាលពីឆ្នាំ ២០១៤ បាននិយាយថានាវាខ្លួនមិនបានរងការបាញ់ព្រមានទេ ហើយសកម្មភាពបានធ្វើការឆ្លងកាត់ដែនទឹកអ៊ុយក្រែនដោយស្របច្បាប់៕
