ថ្ងៃនេះ! មន្ត្រីអាមេរិកប្រជុំសម្រេចថាតើគួរចាក់ Pfizer ដូសទី៣ ឬអត់
ក្រុមហ៊ុផលិតឱសថអាមេរិក Pfizer បានឱ្យដឹងថា ខ្លួននឹងជួបជាមួយអាជ្ញាធរសុខាភិបាលសហព័ន្ធ នាថ្ងៃទី១២ កក្កដា ២០២១នេះ ដើម្បីពិភាក្សាគ្នាពីតម្រូវការចាំបាច់ នៃការចាក់វ៉ាក់សាំង COVID-19 របស់ខ្លួនសម្រាប់ដូសទី ៣។
កាលពីប៉ុន្មានថ្ងៃមុននេះ ក្រុមហ៊ុន Pfizer និងក្រុមហ៊ុនអាល្លឺម៉ង់ជាដៃគូ BioNTech បានប្រកាសពីផែនការស្នើសុំការអនុញ្ញាត ពីអាជ្ញាធរនិយតករអាមេរិក និងអឺរ៉ុបក្នុងការចាក់វ៉ាក់សាំង COVID-19 ដូសទី ៣ នៅក្នុងបរិបទដែលវីរុសបម្លែងថ្មី Delta កំពុងឆ្លងរាតត្បាតនៅជុំវិញពិភពលោក និងបន្ទាប់ពីមានសេចក្ដីរាយការណ៍ នៅក្នុងប្រទេសអ៉ីស្រាអែលថា វ៉ាក់សាំង Pfizer បានថយចុះប្រសិទ្ធភាព ក្នុងការបង្ការការឆ្លងជំងឺដ៏កាចសាហាវមួយនេះ។
យ៉ាងណាក៏ដោយ រដ្ឋបាលចំណីអាហារ និងឱសថ ព្រមជាមួយនិងមជ្ឈមណ្ឌលសម្រាប់គ្រប់គ្រង និងបង្ការជំងឺឆ្លងរបស់សហរដ្ឋអាមេរិកធ្លាប់បានអះអាងថា បច្ចុប្បន្នប្រជាជនអាមេរិកមិនទាន់ត្រូវការ ចាក់វ៉ាក់សាំងដូសទី ៣ ជាចាំបាច់នោះទេ៕
