លោក ស៊ី ជិនពីង និងលោក គីម ជុងអ៊ុន ផ្លាស់ប្តូរសារអបអរសាទរគ្នាស្តីពីខួបលើកទី៦០ នៃសន្ធិសញ្ញាមិត្តភាពទ្វេភាគី (មានវីដេអូ)
ចិន៖ ប្រធានាធិបតីចិនលោក ស៊ី ជិនពីង និងមេដឹកនាំកូរ៉េខាងជើងលោក គីម ជុនអ៊ុន បានសន្យាពង្រឹងចំណងមិត្តភាពឈានដល់កម្រិតថ្មី នៅពេលមេដឹកនាំទាំងពីរបានផ្លាស់ប្តូរសារអបអរសាទរគ្នា ស្តីពីខួបលើកទី៦០ នៃសន្ធិសញ្ញាមិត្តភា ពទ្វេភាគី ។
លោក ស៊ី ជិនពីង បានសរសើរសន្ធិសញ្ញាឆ្នាំ១៩៦១ ដែលបានលើកកម្ពស់សន្តិភាពថ្នាក់តំបន់ និងសកល ហើយថា រដ្ឋាភិបាលទីក្រុងប៉េកាំង និងព្យុងយ៉ាងបានគាំទ្រគ្នាទៅវិញទៅមកយ៉ាងមុតមាំ និងធ្វើការជាមួយគ្នា ដើម្បីពង្រឹងទំនាក់ទំនងរាប់ឆ្នាំ ។ លោក ស៊ី បន្ថែមថា លោកបានត្រៀមខ្លួនរួចហើយ ដើម្បីធ្វើការងារជាមួយលោក គីម សម្រាប់កិច្ចសហប្រតិបត្តិការមិត្តភាពទ្វេភាគី សំដៅឈានដល់កម្រិតថ្មីមួយ និងនាំផលប្រយោជន៍កាន់តែច្រើនដល់ប្រទេសទាំងពីរ និងប្រជាជនរបស់ខ្លួន ។ ទន្ទឹមនេះ លោក គីម បាននិយាយថា សន្ធិសញ្ញាទ្វេភាគីបានដើរតួនាទីយ៉ាងសំខាន់ក្នុងការធានាសន្តិភាព និងស្ថេរភាពនៅអាស៊ីប្រឆាំងនឹងកម្លាំងអារិភាពក្នុងតំបន់ ហើយថា ប្រទេសជិតខាងទាំងពីរបានចែករំលែកមានគោលជំហរថេរ ដើម្បីអភិវឌ្ឍមិត្តភាព និងទំនាក់ទំនងសហប្រតិបត្តិការទៅវិញទៅមកឥតឈប់ឈរ ។
គួរកត់សម្គាល់ ស្ថិតក្រោមសន្ធិសញ្ញាឆ្នាំ១៩៦១ ប្រទេសចិន និងកូរ៉េខាងជើងត្រូវតែការពារគ្នាទៅវិញទៅមកដោយស្វ័យប្រវត្តិ នៅពេលប្រទេសណាមួយរងការវាយប្រហារ ៕ ប្រភព៖ CGTN
