អាមេរិកពិចារណាលើកិច្ចព្រមព្រៀងពាណិជ្ជកម្មឌីជីថលដើម្បីប្រឆាំងមហាអំណាចនៅអាស៊ីគឺចិន
វ៉ាស៊ីនតោន៖ មន្ត្រីសេតវិមានកំពុងពិភាក្សាសំណើកិច្ចព្រមព្រៀងពាណិជ្ជកម្មឌីជីថលដែលគ្របដណ្តប់លើសេដ្ឋកិច្ចឥណ្ឌូ-ប៉ាស៊ីហ្វិក ខណៈរដ្ឋបាលបៃដិនស្វែងរកមធ្យោបាយដើម្បីពិនិត្យមើលឥទ្ធិពលរបស់ចិននៅក្នុងតំបន់។
យោងតាមការចុះផ្សាយរបស់សារព័ត៌មាន Bloomberg ដែលបានដកស្រង់សម្ដីប្រភពដើមផ្សេងគ្នាសុំមិនបញ្ចេញឈ្មោះ សេចក្តីលម្អិតនៃកិច្ចព្រមព្រៀងសក្តានុពលស្ថិតនៅជាសេចក្តីព្រាងនៅឡើយ ប៉ុន្តែកតិកាសញ្ញាអាចត្រូវបានចូលរួមដោយបណ្តាប្រទេសដូចជា កាណាដា ឈីលី ជប៉ុន ម៉ាឡេស៊ី អូស្ត្រាលី នូវែលសេឡង់ និងសិង្ហបុរីជាដើម។ ហើយកិច្ចព្រមព្រៀងនេះទៀតសោត ក៏អាចដាក់ចេញនូវស្តង់ដារសម្រាប់សេដ្ឋកិច្ចលើប្រព័ន្ធឌីជីថល (អ៊ីនធឺណែត) រួមទាំងច្បាប់ស្តីពីការប្រើប្រាស់ទិន្នន័យ ការសម្របសម្រួលពាណិជ្ជកម្ម និងការរៀបចំគយអេឡិចត្រូនិក។
គម្រោងនេះ ក៏នឹងបង្ហាញថា រដ្ឋបាលលោក បៃដិន ចាប់អារម្មណ៍ក្នុងការស្វែងរកឱកាសពាណិជ្ជកម្មថ្មីបន្ទាប់ពីចំណាយពេលជាច្រើនខែដំបូងរបស់ខ្លួនផ្តោតលើការអនុវត្តកិច្ចព្រមព្រៀងដែលមានស្រាប់ ជាជាងការចរចាជាមួយប្រទេសអង់គ្លេស និងកេនយ៉ា ដែលបន្សល់ទុកពីរដ្ឋបាលរបស់លោក ត្រាំ។
ចំណុចចម្បងនៃគោលនយោបាយនេះ ប្រហែលជានឹងតំណាងឱ្យកិច្ចខិតខំប្រឹងប្រែងដំបូងរបស់រដ្ឋបាលលោកបៃដិន ដើម្បីបង្ហាញផែនការសេដ្ឋកិច្ចសម្រាប់តំបន់ដែលមានសេដ្ឋកិច្ចនិងយុទ្ធសាស្ត្រសំខាន់បំផុតនៅលើពិភពលោក ក្រោយពីអតីតប្រធានាធិបតីលោកដូណាល់ ត្រាំ សម្រេចចិត្តដកខ្លួនចេញពីការចរចាកិច្ចព្រមព្រៀងពាណិជ្ជកម្មភាពជាដៃគូអន្តរប៉ាស៊ីហ្វិកកាលពីឆ្នាំ ២០១៧។
មន្រ្តីសេតវិមានម្នាក់បាននិយាយថា មកទល់ពេលនេះមិនទាន់មានការសម្រេចចិត្តណាមួយកើតឡើងទេ ប៉ុន្តែរដ្ឋបាលរបស់ខ្លួនមានចេតនាធ្វើឱ្យស៊ីជម្រៅលើទំនាក់ទំនងជាមួយតំបន់ឥណ្ឌូ-ប៉ាស៊ីហ្វិក ក្នុងវិស័យជាច្រើនរួមទាំងវិស័យពាណិជ្ជកម្មឌីជីថល។
អ្នកតស៊ូមតិសម្រាប់កិច្ចព្រមព្រៀងបែបនេះ រួមមានទាំងអតីតតំណាងពាណិជ្ជកម្មស្តីទីសហរដ្ឋអាមេរិកលោក Wendy Cutler បានលើកឡើងថា វាអាចទាញយកការរៀបចំដែលមានស្រាប់នៅក្នុងតំបន់រួមមានកិច្ចព្រមព្រៀងពាណិជ្ជកម្មឌីជីថលរវាងសហរដ្ឋអាមេរិក និងជប៉ុន ក៏ដូចជាកិច្ចព្រមព្រៀងពាណិជ្ជកម្មឌីជីថលសិង្ហបុរី-អូស្ត្រាលី និងកិច្ចព្រមព្រៀងភាពជាដៃគូសេដ្ឋកិច្ចឌីជីថលសិង្ហបុរី-នូវែលសេឡង់-ឈីលី។
លោក Cutler បាននិយាយថា កិច្ចព្រមព្រៀងពាណិជ្ជកម្មឌីជីថលនឹងធ្វើឱ្យសហរដ្ឋអាមេរិកវិលត្រឡប់មករកល្បែងពាណិជ្ជកម្មនៅអាស៊ីវិញ ខណៈពេលដែលខ្លួនពិចារណាលើគុណសម្បត្តិនៃការចូលរួមឡើងវិញក្នុងកិច្ចព្រមព្រៀងទូលំទូលាយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP)។
ចំណែកឯលោក Charles Freeman អនុប្រធានជាន់ខ្ពស់សម្រាប់កិច្ចការអាស៊ីនៅសភាពាណិជ្ជកម្មសហរដ្ឋអាមេរិកក្រុងវ៉ាស៊ីនតោនបាននិយាយថា៖ «យើងពេញចិត្តនឹងការចរចានៃកិច្ចព្រមព្រៀងឌីជីថលជាពិសេសក្នុងករណីដែលមិនមានកិច្ចព្រមព្រៀងភាពជាដៃគូអន្តរប៉ាស៊ីហ្វិក (TPP)។ យើងចង់ឃើញកិច្ចព្រមព្រៀងដែលផ្អែកលើការឆ្ពោះទៅមុខ និងបែបណាមួយនៅក្នុងតំបន់ ជាពិសេសជាគំរូសម្រាប់កិច្ចព្រមព្រៀងពិភពលោក»។
កិច្ចព្រមព្រៀងបែបនេះ អាចរារាំងការជាប់គាំងនយោបាយមួយចំនួនដែលបានធ្វើឱ្យស្ទះដល់ការចរចាពាណិជ្ជកម្មពីមុនរួមទាំងការប្រឆាំងពីសហជីពកម្មករ។ លើសពីនេះ វាក៏មិនត្រូវការអនុម័តរបស់សភា ខណៈដែលសមាជិកមកពីបក្សប្រជាធិបតេយ្យបានប្រឆាំងនឹងកិច្ចព្រមព្រៀងបែបនេះអស់រយៈពេលជាច្រើនឆ្នាំមកហើយ សូម្បីតែក្នុងចំណោមគណបក្សសាធារណរដ្ឋ ក៏មានការគាំទ្រតិចតួចចំពោះកតិកាសញ្ញាពាណិជ្ជកម្មសេរីទូលំទូលាយដែរ។
លោក Nigel Cory នាយករងផ្នែកគោលនយោបាយពាណិជ្ជកម្មនៃមូលនិធិបច្ចេកវិទ្យា និងការបង្កើតថ្មី បាននិយាយថា៖ «បញ្ហាប្រឈមមួយ ក្នុងចំណោមបញ្ហាប្រឈមជាច្រើនជាមួយគោលនយោបាយពាណិជ្ជកម្មទំនើប គឺស្វែងយល់ថាតើត្រូវធ្វើយ៉ាងណាដើម្បីថ្លឹងថ្លែងនូវផលប្រយោជន៍ប្រកួតប្រជែងផ្សេងៗគ្នា ក្នុងកិច្ចព្រមព្រៀងដ៏ទូលំទូលាយជាមួយផលិតកម្ម ពលកម្ម កសិកម្ម សេវាកម្ម ច្បាប់ សម្រាប់បរិស្ថាន»។
យ៉ាងណាមិញ រដ្ឋបាលលោក បៃដិន នឹងត្រូវបំពេញសំណើរនេះជាមួយនឹង «គោលនយោបាយពាណិជ្ជកម្មផ្តោតលើកម្មករ» ដែលគូសបញ្ជាក់ដោយតំណាងពាណិជ្ជកម្មអាមេរិកលោកស្រី Katherine Tai ។ មន្ត្រីរដ្ឋបាលខ្លះបានបង្ហើបជាសាធារណៈ អំពីកិច្ចព្រមព្រៀងសក្តានុពលមួយ។
លោក Kurt Campbell មន្ត្រីជាន់ខ្ពស់របស់សេតវិមានទទួលបន្ទុកកិច្ចការតំបន់អាស៊ី បាននិយាយកាលពីថ្ងៃទី ៦ ខែកក្កដា ថា៖ «ដើម្បីឱ្យសហរដ្ឋអាមេរិកមានប្រសិទ្ធិភាពនៅអាស៊ី យើងចាំបាច់ត្រូវបញ្ជាក់ឱ្យច្បាស់ថា យើងមានផែនការសេដ្ឋកិច្ចមួយដែលមានការភ្ជាប់គ្នាជាបន្តបន្ទាប់»។
ប្រភព៖ Straitstimes
