អឺរ៉ុបចង់ប្រកួតប្រជែងយុទ្ធសាស្ត្រក្រវ៉ាត់ និងផ្លូវរបស់ចិន ជាមួយផែនការហេដ្ឋារចនាសម្ព័ន្ធពិភពលោក
កាលពីថ្ងៃច័ន្ទនេះ រដ្ឋមន្ត្រីការបរទេសនៃបណ្ដាប្រទេសជាសមាជិកសហភាពអឺរ៉ុបបានឯកភាពចាប់ផ្ដើមផែនការហេដ្ឋារចនាសម្ព័ន្ធសកលមួយដែលនឹងតភ្ជាប់អឺរ៉ុបទៅនឹងពិភពលោក ដែលនេះជាជំហានចុងក្រោយបង្អស់របស់ពួកគេ បន្ទាប់ពីមានកិច្ចព្រមព្រៀង និងកិច្ចសន្យាប្រហាក់ប្រហែលនេះ ជាមួយនឹងឥណ្ឌា ជប៉ុន និងក្រុមប្រទេសអ្នកមានទាំង៧ ឬហៅថា G7។
រដ្ឋមន្ត្រីការបរទេសអាល្លឺម៉ង់លោក Heiko Maas បានប្រាប់អ្នកសារព័ត៌មានបន្ទាប់បានជួបសមភាគីអឺរ៉ុបនៅក្រុងប្រ៊ុចសែល ប្រទេសបែលហ្ស៊ិកថា៖ «យើងឃើញប្រទេសចិនប្រើប្រាស់មធ្យោបាយសេដ្ឋកិច្ច និងហិរញ្ញវត្ថុដើម្បីបង្កើនឥទ្ធិពលនយោបាយរបស់ខ្លួននៅគ្រប់ទីកន្លែងក្នុងពិភពលោក។ វាគ្មានប្រយោជន៍អ្វីក្នុងការស្រែកថ្ងូរអំពីបញ្ហានេះទេ យើងត្រូវតែផ្ដល់ជម្រើសផ្សេង»។ លោកបានបន្ថែមទៀតថា៖ «វាសំខាន់ណាស់ដែលសហភាពអឺរ៉ុបសម្របសម្រួលវា(ផែនការហេដ្ឋារចនាសម្ព័ន្ធ) យ៉ាងជិតស្និទ្ធជាមួយសហរដ្ឋអាមេរិក»។
សហភាពអឺរ៉ុបបានចុះហត្ថលេខាលើភាពជាដៃគូជាមួយជប៉ុន និងឥណ្ឌារួចហើយ ដើម្បីសម្របសម្រួលគម្រោងដឹកជញ្ជូន ថាមពល និងឌីជីថល ដើម្បីតភ្ជាប់អឺរ៉ុបនិងអាស៊ី។ ទីក្រុងតូក្យូ និងញូដេលីមានការព្រួយបារម្ភអំពីការផ្ដល់ជំនួយ និងប្រាក់កម្ចីមិនរើសមុខដោយចិន ដែលពួកគេនិយាយថាធ្វើឱ្យបណ្ដាប្រទេសក្រីក្រជាប់ជំពាក់ក្រុងប៉េកាំង ពីព្រោះពួកគេត្រូវបង្ខំចិត្តយកបំណុលដ៏ច្រើនបែបនេះ។
យុទ្ធសាស្ត្ររបស់អឺរ៉ុប ដែលមានឈ្មោះថា «អឺរ៉ុបដែលតភ្ជាប់នឹងពិភពលោក» មិនបាននិយាយទាក់ទងនឹងប្រទេសចិនទេ ហើយរដ្ឋមន្ត្រីការបរទេសជើងចាស់លុចហ្សំបួរលោក Jean Asselborn បាននិយាយថាអឺរ៉ុបមិនគួរធ្វើប្រទេសចិនឱ្យក្លាយជាសត្រូវទេ ដោយកត់សម្គាល់ថាក្នុងមួយឆ្នាំក្រុមហ៊ុនរថយន្តអាល្លឺម៉ង់លក់រថយន្តនៅចិនបានច្រើនជាងនៅអាល្លឺម៉ង់ទៅទៀត។
ចាប់តាំងពីឆ្នាំ ២០១៣ ប្រទេសចិនបានចាប់ផ្ដើមគម្រោងសាងសង់នៅជាង ៦០ ប្រទេស ក្នុងគោលបំណងកសាងបណ្ដាញផ្លូវគោកនិងសមុទ្រ ដើម្បីតភ្ជាប់ប្រទេសខ្លួនជាមួយអាស៊ីអាគ្នេយ៍ អាស៊ីកណ្ដាល មជ្ឈិមបូព៌ា អឺរ៉ុបនិងអាហ្វ្រិក។ ក្រុងប៉េកាំងបានបដិសេធថាយុទ្ធសាស្ត្រនេះគឺមិនមែនសម្រាប់បញ្ចាំងអំណាច និងឥទ្ធិពលរបស់ខ្លួនទេ ហើយគឺគ្រាន់តែសម្រាប់បំពេញតម្រូវការរបស់ប្រជាជនសាមញ្ញប៉ុណ្ណោះ។
ប្រភព៖ Straitstimes
