ធនាគារជាតិនៃកម្ពុជា លើកទឹកចិត្តដល់សាធារណជនទាំងអស់ ធ្វើការទូទាត់តាមប្រព័ន្ធអេឡិចត្រូនិច និងប្រើប្រាស់ប្រាក់រៀលប្រកបដោយអនាម័យខ្ពស់ (មានវីដេអូ)
ភ្នំពេញ៖ ធនាគារជាតិនៃកម្ពុជា បានលើកទឹកចិត្តដល់សាធារណជនទាំងអស់ ធ្វើការទូទាត់ តាមប្រព័ន្ធអេឡិចត្រូនិក និងប្រើប្រាស់ប្រាក់រៀលប្រកបដោយអនាម័យខ្ពស់ ដើម្បីការពារការឆ្លងរីករាលដាលនៃជំងឺកូវីដ១៩ ។
បើតាមសេចក្ដីប្រកាសព័ត៌មានរបស់ធនាគារជាតិនៃកម្ពុជា ធនាគារជាតិសូមលើកទឹកចិត្តដល់សាធារណជនទាំងអស់ សូមឲ្យប្រើប្រាស់ការទូទាត់ប្រាក់រៀល តាមប្រព័ន្ធអេឡិចត្រូនិក ប្រកបដោយអនាម័យខ្ពស់ ក្នុងអំឡុងពេលនៃការផ្ទុះឡើងនៃជំងឺកូវីដ១៩ ដើម្បីបញ្ចៀសការឆ្លងរីករាលដាលនៃជំងឺកូវីដ១៩ តាមរយៈការប្រើប្រាស់ក្រដាសប្រាក់ដោយផ្ទាល់ ។ ជាមួយគ្នានេះដែរ ធនាគារជាតិនៃកម្ពុជាបានអំពាវនាវដល់គ្រប់ភាគីពាក់ព័ន្ធទាំងអស់ ជាពិសេសប្រជាជនកម្ពុជាសូមចូលរួមធ្វើការទូទាត់ប្រាក់រៀលតាមប្រព័ន្ធអេឡិចត្រូនិក ព្រោះវានឹងផ្តល់ភាពងាយស្រួលច្រើន មានអនាម័យ និងការពារបានពីការឆ្លងជំងឺកូវីដ១៩ នៅក្នុងដំណាក់កាលនៃការរាតត្បាតជាសកល នៃជំងឺដ៏កាចសាហាវនាបច្ចុប្បន្ននេះ ។ ប្រាក់រៀលតំណាងឱ្យអត្តសញ្ញាណជាតិ អធិបតេយ្យភាពជាតិ ឯករាជ្យភាពសេដ្ឋកិច្ច និង ពង្រឹងសាមគ្គីភាពសង្គម។ធ នារគារជាតិនៃកម្ពុជាសង្ឃឹម និងជឿជាក់ថា បងប្អូនប្រជាពលរដ្ឋនឹងបន្តស្មារតី សហការលើកកម្ពស់ប្រាក់រៀលជាតិ និង រួមចំណែកយ៉ាងសកម្មក្នុងការប្រឆាំងនឹងទង្វើទាំងឡាយណា ដែលប៉ះពាល់ដល់គុណតម្លៃ ប្រាក់រៀលរបស់ជាតិយើង ។
សូមជម្រាបថា រាជរដ្ឋាភិបាលបានខិតខំបង្កើនតួនាទីប្រាក់រៀលជាលំដាប់ក្នុងសេដ្ឋកិច្ច និងសង្គមប្រកបដោយនិរន្តរភាព និងជំនឿទុកចិត្តដែលបម្រើផលប្រយោជន៍ដល់ប្រជាជនកម្ពុជាគ្រប់លំដាប់ថ្នាក់ និងសេដ្ឋកិច្ចជាតិទាំងមូល ៕
