កាល​ពី​ថ្ងៃ​ទី ២៩ កក្កដា​ ក្រុមហ៊ុន​បច្ចេកវិទ្យា​ចិន Huawei បាន​ធ្វើ​ការ​បង្ហាញ​ទូរស័ព្ទ​ស៊េរី​ខ្ពស់​ដំបូង​របស់​ខ្លួន​ ដែល​ប្រើប្រាស់​កម្មវិធី​ផលិត​ក្នុង​ស្រុក​ជាជាង​ការ​ប្រើប្រាស់​កម្មវិធី​ Android របស់​អាមេរិក​ ប៉ុន្តែ​ពួកគេ​បាន​បោះបង់​បច្ចេកវិទ្យា​ទំនាក់​ទំនង​ 5G បន្ទាប់​ពី​ទណ្ឌកម្ម​ (ដាក់​បញ្ជី​ខ្មៅ)​ ដាក់​ដោយ​សហរដ្ឋអាមេរិក​បាន​ធ្វើ​ឱ្យ​មាន​ការ​លំបាក​ក្នុង​ការ​ប្រើប្រាស់​បច្ចេកវិទ្យា​សំខាន់​ៗ​។

ក្រុមហ៊ុន​ Huawei ដែល​​កាល​ពី​ឆ្នាំ​មុន​ជា​ក្រុមហ៊ុន​ផលិត​ទូរស័ព្ទ​ធំ​ជាង​គេ​ទី​២​ក្នុង​ពិភពលោក​ បាន​ប្រកាស​ថា​ទូរស័ព្ទ​ថ្មី​ P50 និង P50 Pro នឹង​ប្រើ​កម្មវិធី​ Harmony OS ផលិត​ដោយ​ក្រុមហ៊ុន​នេះ​ផ្ទាល់​។

រដ្ឋាភិបាល​អាមេរិក​បាន​រារាំង​សមត្ថភាព​ទូរស័ព្ទ​ Huawei មិន​ឱ្យ​ប្រើប្រាស់​ដោយ​ពេញលេញ​នូវ​កម្មវិធី Android OS របស់​ក្រុមហ៊ុន​អាមេរិក​ Google ធ្វើ​ឱ្យ​មាន​ផល​ប៉ះពាល់​យ៉ាង​ខ្លាំង​ទៅ​លើ​ទីផ្សារ​អន្តរជាតិ​របស់​ក្រុមហ៊ុន​នេះ​។

នាយក​ប្រតិបត្តិ​ផ្នែក​គ្រឿង​អេឡិចត្រូនិក​ប្រើប្រាស់​របស់​ Huawei លោក​ Richard Yu បាន​ធ្វើ​ការ​បង្ហាញ​ការ​បង្ហាញ​ទូរស័ព្ទ​ទាំង​ពីរ​នេះ​ក្នុង​កម្មវិធី​តូច​មួយ​តាម​អ៊ីនធឺណិត​ដោយ​និយាយ​តែ​ភាសា​ចិន​ ដែល​នេះ​គឺ​ផ្ទុយ​ស្រឡះ​នឹង​ការ​បង្ហាញ​មុន​ៗ​ចំពោះ​ទស្សនិកជន​នៅ​ជុំវិញ​ពិភពលោក​។ លោក​មិន​បាន​បញ្ជាក់​ថា​ទូរស័ព្ទ​នេះ​នឹង​មាន​លក់​នៅ​ក្រៅ​ទីផ្សារ​ចិន​ដែរ​ ឬ​ទេ​។

ជា​ទូទៅ​ក្រុមហ៊ុន Huawei នឹង​ដាក់​លក់​ទូរស័ព្ទ​ស៊េរី P របស់​ខ្លួន​នៅ​ក្នុង​ខែ​កុម្ភៈ​ឬ​ខែ​មីនា​នៅ​ក្នុង​ព្រឹត្តិការណ៍​បច្ចេកវិទ្យា​ធំ​ៗ ដែល​ប្រារព្ធ​ឡើង​នៅ​ទីក្រុង​បាសេឡូណា​ ប្រទេស​អេស្ប៉ាញ​ ឬ​ទីក្រុង​អឺរ៉ុប​ផ្សេង​ទៀត​។

ក្នុង​កម្មវិធី​នេះ​លោក Yu បាន​និយាយ​ថា​៖ «ដោយ​សារ​តែ​ទណ្ឌកម្ម​របស់​អាមេរិក​ទូរស័ព្ទ​ស្មាតហ្វូន​ស៊េរី​ថ្មី​របស់​យើង​មិន​អាច​ដំណើរ​ការ​លើ​បច្ចេកវិទ្យា​តភ្ជាប់​ 5G ទេ​ បើ​ទោះ​បី​ជា​ច្បាស់​ណាស់​ថា​យើង​ជា​មេដឹកនាំ​បច្ចេកវិទ្យា​ 5G លើ​ពិភពលោក​»​។ លោក​បាន​បន្ត​ទៀត​ថា​៖ «ប៉ុន្តែ​ជា​មួយ​នឹង​ការ​តភ្ជាប់ 4G Wi-Fi 6 និង​បច្ចេកវិទ្យា​ AI ​របស់​យើង​ យើង​នៅ​តែ​អាច​ផ្ដល់​នូវ​ប្រសិទ្ធភាព​ខ្ពស់​ដូច​ទូរស័ព្ទ 5G ទាំង​អស់​»​។

ក្រុមហ៊ុន​ Huawei គឺ​ក្នុង​ចំណោម​អ្នក​ប្រើប្រាស់​បច្ចេកវិទ្យា​ 5G ដំបូង​គេ​។ កាល​ពី​ឆ្នាំ​២០១៩ ទូរស័ព្ទ Mate 30 របស់​ក្រុមហ៊ុន​នេះ​គឺ​ជា​ទូរស័ព្ទ​ប្រើប្រាស់​ម៉ូដឹម​ 5G ដំបូង​គេ​ក្នុង​វិស័យ​ទូរស័ព្ទ​ស្មាតហ្វូន​។ តាំង​ពី​ពេល​នោះ​មក​ទូរស័ព្ទ​របស់​ក្រុមហ៊ុន​ Samsung Xiaomi និង​គូ​ប្រជែង​ Huawei បាន​ប្រើប្រាស់​បច្ចេកវិទ្យា​ Huawei នៅ​លើ​ទូរស័ព្ទ​របស់​ពួកគេ​។

ទូរស័ព្ទ​ P50 ថ្មី​នឹង​ប្រើ​បន្ទះ​ឈីប​ Kirin 9000 ដែល​រៀប​ចំ​រចនាបថ​ដោយ​ Huawei ផ្អែក​លើ​បច្ចេកវិទ្យា​របស់​ក្រុមហ៊ុន​អង់គ្លេស​ ARM ហើយ​ក៏​នឹង​ប្រើប្រាស់​បន្ទះ​ឈីប Snapdragon 888 4G របស់​ក្រុមហ៊ុន​អាមេរិក​ Qualcome​។

នេះ​គឺ​ជា​សញ្ញា​ដំបូង​ដែល​បង្ហាញ​ថា​ក្រុមហ៊ុន​ Huawei អាច​នៅ​ប្រើ​បច្ចេកវិទ្យា​បែប​នេះ​បាន​ បើ​ទោះ​បី​ជា​អាមេរិក​បាន​ដាក់​ក្រុមហ៊ុន​នេះ​ក្នុង​បញ្ជី​ខ្មៅ​ក៏​ដោយ​។ កាល​ពី​ឆ្នាំ​ ២០១៩ ក្រុង​វ៉ាស៊ីនតោន​បាន​ដាក់​ក្រុមហ៊ុន​ Huawei ក្នុង​បញ្ជី​ខ្មៅ​ ដោយ​ការ​ព្រួយ​បារម្ភ​អំពី​សន្តិសុខ​ជាតិ ហើយ​ក្រោយ​មក​បាន​ធ្វើ​វិសោធនកម្ម​ច្បាប់​គ្រប់គ្រង​ការ​នាំចេញ​របស់​ខ្លួន​ដើម្បី​រារាំង​រាល់​ការ​នាំ​ចេញ​បន្ទះ​ឈីប និង​គ្រឿង​បន្លាស់​ដែល​គ្មាន​អាជ្ញាប័ណ្ណ​ទៅ​ឱ្យ​ក្រុមហ៊ុន​នេះ សូម្បី​តែ​ពី​អ្នក​ផ្គត់ផ្គង់​មិនមែន​អាមេរិក​ក៏​ដោយ ប្រសិន​បើ​ពួកគេ​បាន​ប្រើប្រាស់​បច្ចេកវិទ្យា​អាមេរិក​។

សកម្មភាព​នេះ​បាន​កាត់​ផ្ដាច់​ទំនាក់ទំនង​រវាង​ក្រុមហ៊ុន​ Huawei និង​ក្រុមហ៊ុន​ផលិត​ឈីប​ធំ​ៗ​ ដូច​ជា​ TSMC  Mediatek  និង​ Qualcome ហើយ​ធ្វើ​ឱ្យ​ក្រុមហ៊ុន​នេះ​បាត់បង់​ផ្នែក​សំខាន់​សម្រាប់​ផលិត​ទូរស័ព្ទ​ដែល​អាច​ប្រកួត​ប្រជែង​ជា​មួយ​ក្រុមហ៊ុន​ផ្សេង​បាន​។

ដោយ​មើល​ឃើញ​ថា​អាច​មាន​ការ​កាត់ផ្ដាច់​ការ​ផ្គត់ផ្គង់​នា​ពេល​អនាគត​ក្រុមហ៊ុន​ Huawei បាន​ធ្វើ​ការ​ទិញ​បន្ទះ​ស្តុក​ទុក​ក្នុង​បរិមាណ​ដ៏​ធំ​មួយ​ដើម្បី​ត្រៀម​សម្រាប់​ព្រឹត្តិការណ៍​ដូច​ការ​ដាក់​ចូល​បញ្ជី​ខ្មៅ​ជា​ដើម​។ តាំង​ពី​ពេល​ត្រូវ​ដាក់​ចូល​បញ្ជី​ខ្មៅ​មក​ ទូរស័ព្ទ​ផលិត​ដោយ​ Huawei គឺ​ប្រើប្រាស់​បន្ទះ​ឈីប​ដែល​បាន​ទិញ​ស្តុក​ទុក​តាំង​ពី​មុន​ ឬ​ក្នុង​ឆ្នាំ​ ២០១៩​។

វិធានការណ៍​ទាំង​នេះ​បាន​ធ្វើ​ឱ្យ​ប៉ះពាល់​យ៉ាង​ខ្លាំង​ដល់​ទីផ្សារ​របស់​ក្រុមហ៊ុន​នេះ​។ ចំណែក​ទីផ្សារ​ស្មាតហ្វូន​អន្តរជាតិ​របស់​ក្រុមហ៊ុន Huawei បាន​ធ្លាក់​ចុះ​ពី​ ២០ ភាគរយ​នៅ​អំឡុង​ខែ​មេសា-មិថុនា​ឆ្នាំ ២០២០ មក​នៅ​ត្រឹម​ ៤ ភាគរយ​នៅ​ត្រីមាស​ទី ១ នៃ​ឆ្នាំ​នេះ​។ នៅ​ទីផ្សារ​ក្នុង​ស្រុក​វិញ​ក្រុមហ៊ុន​ Huawei បាន​ធ្លាក់​ដល់​លេខ​រៀង​ទី ៦ ដោយ​មាន​ចំណែក​ទីផ្សារ​ត្រឹម​តែ​ ៨,៣ ភាគរយ​ប៉ុណ្ណោះ​៕

ប្រភព៖ FT