កូរ៉េខាងជើង៖ អាមេរិក និងកូរ៉េខាងត្បូងនឹងប្រឈមមុខការគំរាមកំហែងថ្មីចំពោះសមយុទ្ធយោធា
ក្រុងសេអ៊ូល៖ លោកស្រី គីម យ៉ូជុង (Kim Yo Jong) មន្រ្តីកូរ៉េខាងជើងដ៏មានអំណាច និងជាប្អូនស្រីរបស់មេដឹកនាំលោក គីម ជុងអ៊ុន បាននិយាយកាលពីថ្ងៃអង្គារថា ប្រទេសកូរ៉េខាងត្បូង និងសហរដ្ឋអាមេរិក នឹងប្រឈមមុខការគំរាមកំហែងផ្នែកសន្តិសុខកាន់តែខ្លាំង ដោយសារតែការធ្វើសមយុទ្ធយោធារួមគ្នាប្រចាំឆ្នាំរបស់ខ្លួនដែលចាប់ផ្តើមនៅសប្តាហ៍នេះ។ នេះបើយោងតាមការរាយការណ៍ របស់ទីភ្នាក់ងារសារព័ត៌មានរ៉យទ័រ។
លោកស្រី បាននិយាយនៅក្នុងសេចក្តីថ្លែងការណ៍មួយ ចេញផ្សាយដោយទីភ្នាក់ងារព័ត៌មានរដ្ឋ KCNA ថា សមយុទ្ធនេះគឺជាសកម្មភាពដែលបំផ្លាញខ្លួនឯង និងមិនគួរឱ្យស្វាគមន៍ បង្កការគំរាមកំហែងដល់ប្រជាជនកូរ៉េខាងជើង និងបង្កើនភាពតានតឹងនៅឧបទ្វីបកូរ៉េ។ លោកស្រីបន្តថា៖ «សហរដ្ឋអាមេរិក និងកូរ៉េខាងត្បូង នឹងប្រឈមមុខការគំរាមកំហែងសន្តិសុខធ្ងន់ធ្ងរជាងមុន ដោយសារមិនអើពើនឹងការព្រមានរបស់យើងម្តងហើយម្តងទៀត ជំរុញឱ្យមានការធ្វើសមយុទ្ធសង្គ្រាមដ៏គ្រោះថ្នាក់»។
លោកស្រី គីម បានចោទប្រកាន់កូរ៉េខាងត្បូងថា ក្បត់ការប្រព្រឹត្តរបស់ខ្លួនឯង ដោយធ្វើសមយុទ្ធភ្លាមៗ មិនបានប៉ុន្មានផងក្រោយក្រុងព្យុងយ៉ាង និងសេអ៊ូល និយាយគ្នាអំពីការបន្ធូរបន្ថយភាពតានតឹង។
អ្នកនាំពាក្យក្រសួងការពារជាតិអាមេរិកលោក Martin Meiners បានបដិសេធមិនធ្វើអត្ថាធិប្បាយលើសេចក្តីថ្លែងការណ៍របស់កូរ៉េខាងជើង ដោយថាវាប្រឆាំងនឹងគោលនយោបាយសមយុទ្ធ។ ចំណែកឯអ្នកនាំពាក្យក្រសួងការពារជាតិកូរ៉េខាងត្បូង ក៏បានបដិសេធមិនធ្វើអត្ថាធិប្បាយដូចគ្នា ដោយលើកឡើងថា ប្រទេសទាំងពីរនៅតែពិភាក្សាអំពីពេលវេលា ទំហំ និងវិធីសាស្ត្រនៃសមយុទ្ធជាប្រចាំ។
ប្រទេសកូរ៉េខាងត្បូង និងសហរដ្ឋអាមេរិក បានចាប់ផ្តើមសមយុទ្ធយោធាបឋមរបស់ខ្លួនកាលពីថ្ងៃអង្គារ ទោះបីជាមានការព្រមានពីកូរ៉េខាងជើងពីមុនមកក្ដី។ សមយុទ្ធបែបនេះ ត្រូវបានកាត់បន្ថយក្នុងរយៈពេលប៉ុន្មានឆ្នាំចុងក្រោយ ដើម្បីសម្រួលដល់កិច្ចចរចាលុបចោលកម្មវិធីនុយក្លេអ៊ែរ និងមីស៊ីលរបស់ក្រុងព្យុងយ៉ាង ជាថ្នូរនឹងការបន្ធូរបន្ថយទណ្ឌកម្មរបស់អាមេរិក។ យ៉ាងណាមិញ កិច្ចចរចានេះបានដួលរលំនៅឆ្នាំ ២០១៩។
លោកស្រី គីម និយាយថា សកម្មភាពយោធាអាមេរិកបង្ហាញពីចរិកពុតត្បុតរបស់ក្រុងវ៉ាស៊ីនតោន ចំពោះការឈ្លានពាននៅឧបទ្វីបកូរ៉េ ហើយសន្ដិភាពនឹងអាចធ្វើទៅបាន លុះត្រាតែសហរដ្ឋអាមេរិករុះរើកម្លាំងយោធាដែលខ្លួនដាក់ពង្រាយប្រមាណជាង ២៨ ៥០០០ នាក់នៅកូរ៉េខាងត្បូង។
ព្រភព៖ Reuters
