សេចក្តីរាយការណ៍បញ្ជាក់ថា ហេតុការណ៍នោះបានកើតឡើងកាលពីវេលាម៉ោង៦កន្លះល្ងាចថ្ងៃទី១១ ខែសីហា ឆ្នាំ២០២១ ស្ថិតក្នុងភូមិសំរោង ឃុំត្រពាំងគង ស្រុកសំរោងទង ខេត្តកំពង់ស្ពឺ។

យោងតាមរបាយការណ៍ អធិការនគរបាលស្រុកសំរោងទង បានអោយដឹងថា ករណីរថយន្តដឹកកម្មករមួយគ្រឿង បានបុកជាមួយរថយន្តដឹកឥដ្ឋ មួយគ្រឿងទៀត បណ្តាលអោយកម្មករកម្មការិនី ដែលជិះលើរថយន្តសរុបចំនួន ៣៥នាក់ ក្នុងនោះបានបណ្តាលអោយកម្មករ៣នាក់បានស្លាប់បាត់បង់ជីវិតនិងកម្មករផ្សេងទៀតរងរបួសធ្ងន់ស្រាលផងដែរ។

ស្នងការរងនគរបាលខេត្តកំពង់ស្ពឺ លោកឧត្តមសេនីយ៍ត្រី តាប់ លន បានអោយដឹងថាចំពោះមូលហេតុដែលបង្កអោយកើតមានជាគ្រោះថ្នាក់ចរាចរណ៍នោះកើតឡើងសមត្ថកិច្ចជំនាញកំពុងធ្វើការស្រាវជ្រាវ។ ចំណែកវត្ថុតាងកម្លាំងសមត្ថកិច្ចបាន យកមករក្សាទុកជាបណ្ដោះអាសន្ន ដើម្បីកសាងសំណុំរឿងចាត់ការនីតិវិធី បន្ដ ។