តុលាការចិនផ្តន្ទាទោសអ្នកជំនួញកាណាដារយៈពេល ១១ ឆ្នាំ
កាលពីថ្ងៃពុធនេះ តុលាការចិនបានផ្តន្ទាទោសអ្នកជំនួញជនជាតិកាណាដាដោយត្រូវជាប់ពន្ធនាគាររយៈពេល១១ ឆ្នាំក្នុងដោយត្រូវគេមើលឃើញថាជាការសងសឹកចំពោះការចាប់ខ្លួននាយកប្រតិបត្តិជាន់ខ្ពស់របស់ក្រុមហ៊ុន Huawei ។
តុលាការកម្រិតមធ្យមនៃទីក្រុងដាន់ដុង(Dandong) បាននិយាយថា លោក Michael Spavor ត្រូវបានផ្តន្ទាទោសដោយដាក់ពន្ធនាគារពីបទចារកម្ម និងបញ្ជូនរឿងសម្ងាត់របស់រដ្ឋទៅប្រទេសក្រៅ។ ការជំនុំជម្រះនេះត្រូវបានធ្វើឡើងកាលពីខែមីនា ប៉ុន្តែសាលក្រមមិនត្រូវបានបញ្ចេញរហូតមកដល់ពេលនេះ។ កំឡុងពេលដែលលោក Spavor ត្រូវបានផ្តន្ទាទោស សវនាការបទបត្យាប័នរបស់នាយកប្រតិបត្តិជាន់ខ្ពស់របស់ក្រុមហ៊ុន Huawei លោកស្រី Meng Wanzhou បានឈានដល់ដំណាក់កាលដ៏សំខាន់នៅប្រទេសកាណាដា។
លោក Spavor និងអតីតអ្នកការទូតកាណាដាលោក Michael Kovrig ត្រូវបានឃុំខ្លួននៅប្រទេសចិនកាលពីចុងឆ្នាំ ២០១៨ ប៉ុន្មានថ្ងៃបន្ទាប់ពីលោកស្រី Meng ត្រូវបានចាប់ខ្លួននៅក្នុងប្រទេសកាណាដាតាមបញ្ជារបស់សហរដ្ឋអាមេរិកពីបទឆបោកដែលមានជាប់ពាក់ព័ន្ធនឹងជំនួញរបស់ក្រុមហ៊ុន Huawei នៅអ៊ីរ៉ង់។
តាមការស្រង់សម្តីរបស់សារព័ត៌មាន The Washington Post កាលពីថ្ងៃទី ១១ សីហានាយករដ្ឋមន្រ្តីកាណាដា លោក Justin Trudeau បាននិយាយថា៖ «រឿងនេះគឺអយុត្តិធម៌ និងពិតជាមិនអាចទទួលយកបានទេ»។ លោកបានបន្តនិយាយថា ការជំនុំជម្រះក្តីនេះមិនបានបំពេញសូម្បីតែស្តង់ដារអប្បបរមាដែលទាមទារដោយច្បាប់អន្តរជាតិ ។
លោក Trudeau បាននិយាយថា អាទិភាពកំពូលរបស់ប្រទេសកាណាដាគឺនៅតែធានាការដោះលែងជនជាតិកាណាដាទាំងពីរ ហើយប្រទេសកាណាដានឹងបន្តធ្វើការជានិច្ចដើម្បីនាំអ្នកទាំងពីរត្រឡប់មកវិញអោយបានឆាប់តាមដែលអាចធ្វើទៅបាន។
គួរបញ្ជាក់ផងដែរថា ឯកអគ្គរដ្ឋទូតកាណាដាប្រចាំទីក្រុងប៉េកាំងលោក Dominic Barton បានធ្វើដំណើរទៅទីក្រុង Dandong ប្រទេសចិនដើម្បីចូលរួមសវនាការរបស់លោក Spavor ក្រោយមកលោកបានប្រាប់អ្នកសារព័ត៌មានថា រដ្ឋអាជ្ញាបានចោទប្រកាន់លោក Spavor ថាបានថតរូបនៅជុំវិញអាកាសយានដ្ឋាន ឬកន្លែងដែលមិនគួរថតនៅក្នុងប្រទេសចិនរួមទាំងយន្តហោះយោធាផងដែរ។ នេះបើយោងតាមការរាយការណរបស់សារព័ត៌មាន New York Times។
ចំពោះភាគីអាមេរិកដែលទាមទារអោយមានការចាប់ខ្លួនលោកស្រី Meng វិញ ប្រធានាធិបតីអាមរិក លោក Joe Biden បាននិយាយថា លោកនឹងស្វែងរកការធានាអោយមានការដោះលែងជនជាតិកាណាដាទាំងពីររូប។ ប៉ុន្តែនោះអាចតម្រូវអោយសហរដ្ឋអាមេរិកទម្លាក់ ឬកែប្រែសំណុំរឿងប្រឆាំងនឹងលោកស្រី Meng ដើម្បីអោយលោកស្រីអាចត្រលប់ទៅប្រទេសចិនវិញ។
រដ្ឋាភិបាលចិនបានបដិសេធដែលថា លោក Spavour និងលោក Kovrig ត្រូវបានឃុំខ្លួនជាចំណាប់ខ្មាំងនយោបាយ។ ក្នុងការទាមទារអោយមានការដោះលែងលោកស្រី Meng មន្រ្តីចិនបាននិយាយម្តងហើយម្តងទៀតថា នាយកប្រតិបត្តិកក្រុមហ៊ុនបច្ចេកវិទ្យារូបនេះគឺជាជនរងគ្រោះនៃការជ្រៀតជ្រែករបស់អាមេរិក។ ទីក្រុងប៉េកាំងបានចោទកាណាដាពីបទចាប់ជំរិតលោកស្រី Meng និងជាអ្នកសមគំនិតជាមួយសហរដ្ឋអាមេរិក។
ស្ថានទូតចិនប្រចាំនៅទីក្រុង Ottawa ប្រទេសកាណាដានៅក្នុងសេចក្តីថ្លែងការណ៍តាមអ៊ិនធរណេតអំពីការផ្តន្ទាទោសជនជាតិកាណាដាថា ស្ថាប័នតុលាការចិនដោះស្រាយរឿងក្តីដោយឯករាជ្យស្របតាមច្បាប់។ សេចក្តីថ្លែងការណ៍បានបន្តសរសេរថា ម៉្យាងវិញទៀតកាណាដាបានឃុំខ្លួនលោកស្រី Meng ដែលជាជនជាតិចិនដែលគ្មានកំហុស ហើយមិនបានរំលោភច្បាប់កាណាដាទាល់តែសោះ។
ប្រភព៖ The New York Times
