នាយករដ្ឋមន្ត្រីប៉ាគីស្ថាន៖ អាមេរិកចាត់ទុកប៉ាគីស្ថានថាមានប្រយោជន៍សម្រាប់តែសម្អាតភាពរញ៉េរញ៉ៃនៅអាហ្វហ្គានីស្ថាន
នាយករដ្ឋមន្ត្រីប៉ាគីស្ថានលោកអ៊ីមរ៉ាន ខានបានចោទប្រកាន់សហរដ្ឋអាមេរិកថាចាត់ទុកប្រទេសរបស់លោកមានប្រយោជន៍តែនៅក្នុងបរិបទនៃការសម្អាត «ភាពរញ៉េរញ៉ៃ» ដែលខ្លួនបន្សល់ទុក បន្ទាប់ពីការដកខ្លួនចេញពីសង្គ្រាមជិត ២០ ឆ្នាំនៅប្រទេសអាហ្វហ្គានីស្ថាន។
ក្រុងវ៉ាស៊ីនតោន គឺកំពុងដាក់សម្ពាធលើប៉ាគីស្ថានឱ្យប្រើប្រាស់ឥទ្ធិពលរបស់ខ្លួនលើក្រុមតាលីបង់ដើម្បីសម្រុះសម្រួលឱ្យមានកិច្ចព្រមព្រៀងសន្តិភាព ខណៈពេលដែលការចរចារវាងក្រុមឧទ្ទាមនេះ និងរដ្ឋាភិបាលអាហ្វហ្គានីស្ថានកំពុងជាប់គាំង ហើយអំពើហិង្សាបានកើនឡើងយ៉ាងខ្លាំង។
លោកខានបាននិយាយពីគេហដ្ឋានរបស់លោកថា៖ «ប៉ាគីស្ថានគ្រាន់តែត្រូវបានគេចាត់ទុកថាមានប្រយោជន៍នៅក្នុងបរិបទនៃការដោះស្រាយបញ្ហារញ៉េរញ៉ៃដែលបានបន្សល់ទុកបន្ទាប់ពីការព្យាយាមអស់រយៈពេល ២០ ឆ្នាំដើម្បីស្វែងរកដំណោះស្រាយយោធា នៅពេលដែលគ្មានដំណោះស្រាយ»។
សហរដ្ឋអាមេរិក នឹងដកកងទ័ពរបស់ខ្លួនចេញត្រឹមថ្ងៃទី ៣១ ខែសីហា ២០ ឆ្នាំបន្ទាប់ពីផ្ដួលរំលំរដ្ឋាភិបាលតាលីបង់ក្នុងឆ្នាំ ២០០១។ ប៉ុន្តែខណៈពេលដែលអាមេរិកចាកចេញក្រុមតាលីបង់សព្វថ្ងៃនេះគ្រប់គ្រងទឹកដីច្រើនជាងនៅចំណុចណាមួយចាប់តាំងពីពេលធ្លាក់ពីអំណាច។
ទីក្រុងកាប៊ុល និងរដ្ឋាភិបាលលោកខាងលិចមួយចំនួន និយាយថាការគាំទ្ររបស់ប៉ាគីស្ថានចំពោះក្រុមឧទ្ទាមបានអនុញ្ញាតឱ្យក្រុមនេះទប់ទល់នឹងសង្គ្រាមជាមួយលោកខាងលិច។ ការចោទប្រកាន់ថាគាំទ្រតាលីបង់ បើទោះបីជាសម្ព័ន្ធមិត្តរបស់អាមេរិក គឺចំណុចតានតឹងមួយក្នុងទំនាក់ទំនងរវាងក្រុងវ៉ាស៊ីនតោន និងក្រុងអ៊ីស្លាម៉ាបាត។ ប៉ាគីស្ថានបានច្រានចោលការចោទប្រកាន់ទាំងនេះ។
យ៉ាងណាមិញលោកខានក៏បាននិយាយអំពីការប្រែប្រួលទំនាក់ទំនងជាមួយអាមេរិកផងដែរថា៖ «ខ្ញុំគិតថាឥឡូវនេះអាមេរិកបានសម្រេចថាប្រទេសឥណ្ឌាគឺជាដៃគូយុទ្ធសាស្ត្ររបស់ពួកគេហើយខ្ញុំគិតថានេះជាមូលហេតុជាមានការវិធីទាក់ទងថ្មីជាមួយប៉ាគីស្ថាន»។
លោកខាននិយាយថាប៉ាគីស្ថាន «បានធ្វើការបញ្ជាក់យ៉ាងច្បាស់» ថាខ្លួនមិនចង់មានមូលដ្ឋានយោធាអាមេរិកនៅក្នុងប្រទេសខ្លួន បន្ទាប់ពីអាមេរិកបានដកកងទ័ពចេញពីអាហ្វហ្គានីស្ថាន៕
ប្រភព៖ Reuters
