ស៊ូដង់នឹងប្រគល់អតីតប្រធានាធិបតីរបស់ខ្លួនទៅឱ្យតុលាការ ICC
ក្រុងខាទុំ៖ រដ្ឋាភិបាលស៊ូដង់ នឹងប្រគល់អតីតប្រធានាធិបតី Omar al-Bashir ដែលគ្រប់គ្រងប្រទេសអស់បីទសវត្សរ៍មុនធ្លាក់ពីតំណែងក្នុងឆ្នាំ ២០១៩ ទៅឱ្យតុលាការឧក្រិដ្ឋកម្មអន្តរជាតិ (ICC) រួមជាមួយមន្រ្តីផ្សេងទៀតជុំវិញជម្លោះនៅដាហ្វួរ (Darfur) ដោយប្រឈមមុខនឹងការចោទប្រកាន់ពីបទប្រល័យពូជសាសន៍ ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ។ នេះបើយោងតាមសេចក្តីថ្លែងការណ៍មួយរបស់គណៈរដ្ឋមន្ត្រីស៊ូដង់។
ការសម្រេចថ្មីនេះ ធ្វើឡើងបន្ទាប់ពីព្រះរាជអាជ្ញា ICC លោក Karim Khan បានធ្វើទស្សនកិច្ចនៅប្រទេសស៊ូដង់កាលពីថ្ងៃទី ១០ ខែសីហា។
លោក Hashem Abu Bakr al-Jaali សមាជិកក្រុមការពារលោក Bashir បានប្រាប់ CNN ថា ការសម្រេចចិត្តរបស់គណៈរដ្ឋមន្រ្តីក្នុងការប្រគល់មន្រ្តីដែល ICC បង្ហាញពីការសមគំនិតដែលរងការញុះញង់ ហើយប្រសិនបើជំហានបត្យាប័នត្រូវបានអនុវត្តនោះ វានឹងក្លាយជាគ្រោះមហន្តរាយសម្រាប់ស៊ូដង់។
ជម្លោះនៅដាហ្វួរ បានចាប់ផ្តើមនៅឆ្នាំ ២០០៣ នៅពេលដែលក្រុមឧទ្ទាមជាច្រើន បានកាន់អាវុធប្រឆាំងរដ្ឋាភិបាលនៅក្រុងខាទុំ។ ពួកគេមានការត្អូញត្អែរ ពីបញ្ហាដីធ្លី និងការកាត់ផ្តាច់ប្រវត្តិសាស្ត្រ។ ជាការឆ្លើយតប យុទ្ធសាស្ត្រប្រឆាំងកុបកម្មរបស់រដ្ឋាភិបាល បានកំណត់គោលដៅក្រុមប្រឆាំង ប៉ុន្តែត្រូវបានគេរាយការណ៍ថា បានពង្រីកទៅដល់ក្រុមកុលសម្ព័ន្ធដែលមានទំនាក់ទំនងជាមួយក្រុមបះបោរ។ កងជីវពល Janjaweed ដែលគាំទ្រដោយរដ្ឋាភិបាល ក៏ត្រូវបានគេចោទប្រកាន់ពីបទចាប់រំលោភស្ត្រីនៅដាហ្វួរ ហើយរដ្ឋាភិបាលក៏រងការចោទប្រកាន់ពីបទប្រើប្រាស់អាវុធគីមីប្រឆាំងនឹងសហគមន៍។
របាយការណ៍របស់អង្គការសហប្រជាជាតិ បានបង្ហាញថាប្រជាជនស៊ូដង់ចំនួន ៣០ ម៉ឺននាក់ ត្រូវបានសម្លាប់ ហើយ ២,៥ លាននាក់ត្រូវបានផ្លាស់ទីលំនៅក្នុងអំឡុងជម្លោះដាហ្វួរឆ្នាំ ២០០៣ ។
ក្នុងឆ្នាំ ២០០៩ ព្រះរាជអាជ្ញា ICC បានចេញដីកាចាប់ខ្លួនលោក Bashir ជាលើកដំបូងពីបទប្រល័យពូជសាសន៍ និងឧក្រិដ្ឋកម្មសង្គ្រាមទាក់ទងនឹងដាហ្វួរ។ តុលាការបានចេញដីកាចាប់ខ្លួនមួយទៀតនៅឆ្នាំ ២០១០ ប៉ុន្តែនៅឆ្នាំ ២០១៤ សំណុំរឿងនេះត្រូវបានព្យួរដោយសារតែខ្វះការគាំទ្រពីក្រុមប្រឹក្សាសន្តិសុខអង្គការសហប្រជាជាតិ។
ប្រភព៖ CNN
