ខេត្តកណ្តាល៖ នៅព្រឹកថ្ងៃទី១៣ ខែសីហា ឆ្នាំ២០២១ ទីបញ្ជាការតំបន់ប្រតិបត្តិការសឹករងកណ្តាល បានបើកយុទ្ធនាការចាក់វ៉ាក់សាំងការពារជម្ងឺកូវីដ-១៩ ដូសទី៣ (ដូសជំរុញ Vaccine Astrazeneca) ជូននាយទាហាន នាយទាហានរង ពលទាហាន និងគ្រួសារកងទ័ព ។ ពិធីនេះក៏មានការអញ្ជើញចូលរួមជាអធិបតីភាពពី ឯកឧត្តម ឧត្តមសេនីយ៍ឯក ពូ សាប៊ុតឌី មេ​បញ្ជាការ​រង​កង​ទ័ព​ជើង​គោក​ និង​ជា​មេ​បញ្ជាការ​​យោធ​ភូមិ​ភាគ​ពិសេស និងមានការចូលរួមពី ឯកឧត្តម ឧត្តមសេនីយ៍ត្រី នៃ និយម មេបញ្ជាការតំបន់ប្រតិបត្តិការសឹករងកណ្តាល មេបញ្ជាការរង នាយសេនាធិការ នាយការិយាល័យ នាយផ្នែកសឹករង ក្រុង/ស្រុកជាច្រើនរូប ។

នៅក្នុងឱកាសធ្វើរបាយការណ៍ស្វាគមន៍ ឯកឧត្តម ឧត្តមសេនីយ៍ត្រី នៃ និយម មេបញ្ជាការតំបន់ប្រតិបត្តិការសឹករងកណ្តាល ជំនួសមុខឲ្យនាយទាហាន ពលទាហាន នៃតំបន់ប្រតិបត្តិការសឹករងកណ្តាល  សូមគោរពថ្លែងអំណរគុណសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ដែលបានផ្ដល់វ៉ាក់សាំងប្រឆាំងមេរោគកូវីដ-១៩ដូសទី៣ដែលជាដូសជំរុញប្រភេទ Astra Zeneca សម្រាប់ចាក់ជូនដល់កងទ័ព និងគ្រួសារកងទ័ព ដើម្បីការពារអាយុជីវិតទប់ស្កាត់ការឆ្លងមេរោគកូវីដ-១៩ ខណៈពេលដែលមានចំនួនអ្នកឆ្លងកើនឡើងគួរឲ្យព្រួយបារម្ភ។

ឯកឧត្តម ឧត្តមសេនីយ៍ឯក ពូ សាប៊ុតឌី មេ​បញ្ជាការ​រង​កង​ទ័ព​ជើង​គោក​ និង​ជា​មេ​បញ្ជាការ​​យោធ​ភូមិ​ភាគ​ពិសេស បានថ្លែងនូវការកោតសសើរចំពោះបងប្អូនកងទ័ពទាំងអស់ដែលមានស្មារតីនាំប្រពន្ធឬប្ដី ចូលរួមក្នុងយុទ្ធនាការដ៏មានសារ:សំខាន់នេះបានគ្រប់ៗគ្នា។ ឯកឧត្តម ក៏បានលើកឡើងពីការខិតខំរបស់រាជរដ្ឋាភិបាលពិសេសសម្ដេចតេជោហ៊ុន សែន នាយករដ្ឋមន្រ្តី ដែលជាប្រមុខរាជរដ្ឋាភិបាលក្នុងការរកវ៉ាក់សាំងពីគ្រប់ទិសទីមកចាក់ជូនមន្រ្តីរាជការ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋគ្រប់ស្រទាប់វណ្ណៈដោយមិនប្រកាន់និន្នការនយោបាយឡើយ។ ឯកឧត្តម ឧត្តមសេនីយ៍ឯក ពូ សាប៊ុតឌី  បានបន្ថែមថាទោះបីជាយើងបានចាក់វ៉ាក់សាំងដូសទី៣ ដូសជំរុញក្នុងពេលនេះហើយក្ដីបងប្អូនទាំងអស់មិនត្រូវធ្វេសប្រហែសខ្លួនឡើយ យើងអាចភ្លេចកូវីដតែកូវីដមិនភ្លេចយើងទេដូច្នេះ ត្រូវតែបន្តការប្រុងប្រយ័ត្នជាប់ជានិច្ច និងអនុវត្តន៍តាម ការណែនាំរបស់ក្រសួងសុខាភិបាល អនុវត្តនូវវិធានការ ៣ការពារនិង៣កុំ របស់សម្តេចតេជោ ហ៊ុន សែន ទើបយើងជៀសផុតពីការឆ្លងនូវមេរោគដ៏កាចសាហាវ បំប្លែងថ្មីប្រភេទ( ដែលតា) ដែលឆ្លងលឿនរហ័សនិង មានហានិភ័យខ្ពស់ដល់អាយុជីវិត៕