សហគមន៍​ Mendocino ​ដែល​ជា​កូន​ក្រុង​ទេសចរណ៍​តូច​មួយ​នៅ​តាម​បណ្ដោយ​ឆ្នេរ​មហាសមុទ្រ​ប៉ាស៊ីហ្វិក​ ​កំពុង​ជួប​ប្រទះ​នឹង​កង្វះ​ទឹក​ប្រើ​​ ដោយ​សូម្បី​តែ​​ភោជនីយដ្ឋាន​ ក៏​តម្រូវ​ឱ្យ​ភ្ញៀវ​របស់​ខ្លួន​ប្រើ​ប្រាស់​បន្ទប់​ទឹក​ចល័ត​តាម​ចិញ្ចើម​ផ្លូវ​  ខណៈ​នាយក​ដ្ឋាន​ពន្លត់​អគ្គីភ័យ​ ប្រាប់​មន្រ្តី​មន្ទីរ​ឱ្យ​ប្រយ័ត្ន​ចំពោះ​បំពង់​ម៉ាស៊ីន​ទឹក​ក្រោម​ដី​របស់​ខ្លួន​ ក្រែង​លោ​មាន​អ្នក​លួច​បូម​ទឹក​​​។

​​កង្វះ​ទឹក​ក្នុង​​ក្រុង​នេះ​ គឺ​ជា​ឧទាហរណ៍​យ៉ាង​ច្បាស់​មួយ​​សម្រាប់​អ្វី​ដែល​​ក្រុង​ដាច់​ស្រយាល​ផ្សេង​ទៀត​នៅ​រដ្ឋ​កាលីហ្វ័រញ៉ា ​កំពុង​ជួប​ប្រទះ​ ស្រប​ពេល​ដែល​រដ្ឋ​មួយ​នេះ​ធ្លាក់​ចូល​​ទៅ​ក្នុង​គ្រោះរាំង​ស្ងួត​ជា​ថ្មី​។​ អណ្តូង​ជីក​ដោយ​ដៃ​​អាយុកាល​រាប់​សតវត្សរ៍​ក្នុង​ក្រុង​បាន​រីង​ស្ងួត​ បង្ខំ​ឲ្យ​អ្នក​ស្រុក​ ផ្ទះ​សំណាក់​ និង​ភោជនីយដ្ឋាន​នានា​ ​ទិញ​ទឹក​ដែល​​ដឹក​ចេញ​ពី​កន្លែង​ឆ្ងាយ​ៗ​ក្នុង​តម្លៃ​ពី​ ២០ ​ទៅ​ ៤៥ ​សេន​ក្នុង​មួយ​ហ្គាឡុង​ដោយ​គ្មាន​ជម្រើស​។​

លោក​ស្រី​ Julian ​Lopez ​ម្ចាស់​ភោជនីយដ្ឋាន​ Café ​Beaujolais ​ក្នុង​ក្រុង​ភាគ​ខាង​ជើង​ក្រុង​សាន់ហ្វ្រាន់ស៊ីស្កូ​មួយ​នេះ ​និយាយ​ថា​៖​ ​​«​យើង​មាន​ការ​ភ័យ​ខ្លាច​​ ថា​​នឹង​មាន​ពេល​​ដែល​យើង​គ្មាន​ទឹក​ទាល់​តែ​សោះ ហើយ​មាន​តែ​មនុស្ស​​មាន​លុយ​ទេ ​ដែល​អាច​មាន​លទ្ធភាព​​ប្រើ​»​។​

​អភិបាល​រដ្ឋ​កាលីហ្វ័រញ៉ា​លោក​ Gavin Newsom ​កាល​ពី​ខែ​ឧសភា​ បាន​ប្រកាស​ភាព​អាសន្ន​គ្រោះរាំង​ស្ងួត​នៅ​ក្នុង​ចំនួន​ ៥០​ នៃ​ស្រុក​ទាំង​ ៥៨ ​របស់​រដ្ឋ​កាលីហ្វ័រញ៉ា​ ដែល​​ស្មើ​នឹង​ប្រមាណ​ ៤២% ​នៃ​ប្រជាជន​រដ្ឋ​ ដោយ​លើក​លែង​តែ​ក្រុង​សាន់ហ្វ្រាន់ស៊ីស្កូ​ និង​​ក្រុង​​​នៅ​ភាគ​ខាង​ត្បូង​នៃ​រដ្ឋ​នេះ​ប៉ុណ្ណោះ​។​ ហើយ​កាល​ពី​នៅ​ខែ​មេសា​ក្រុង​ Mendocino ​និង​ក្រុង​ Sonoma ​បាន​​ប្រកាស​អាសន្ន​មុន​គេ​។​ រហូត​ដល់​ខែ​កក្កដា​ អភិបាល​រដ្ឋ​ដដែល​បាន​ប្រកាស​ម្ដង​ទៀត​ ដោយ​អំពាវនាវ​ឱ្យ​ប្រជាជន​ក្នុង​រដ្ឋ​កាលីហ្វ័រញ៉ា​ កាត់​បន្ថយ​ទឹក​ប្រើប្រាស់​ឱ្យ​បាន​ ១៥ ​ភាគ​រយ​។​

កាល​ពី​ចុង​សប្ដាហ៍​មុន​ ព្រឹទ្ធសភា​អាមេរិក​បាន​អនុម័ត​កញ្ចប់​ថវិកា​ចំនួន​ ១ ​ទ្រីលាន​ដុល្លារ​លើ​គម្រោង​ហេដ្ឋា​រចនា​សម្ព័ន្ធ​។ ​លោក​ស្រី ​Dianne ​Feinstein ​សមាជិក​ព្រឹទ្ធ​សភា​ជាន់​ខ្ពស់​មក​ពី​រដ្ឋ​កាលីហ្វ័រញ៉ា​បាន​ចង្អុល​បង្ហាញ​ថា​ កញ្ចប់​ថវិកា​នេះ​ផ្តោត​ជា​ពិសេស​លើ​គម្រោង​កាត់​បន្ថយ​គ្រោះរាំង​ស្ងួត​ដូច​ជា​ការ​ស្តុក​ទុក​ទឹក​ ការ​កែច្នៃ​ទឹក​ឡើង​វិញ​ និង​ការ​​ចម្រាញ់​ទឹក​ប្រៃ​ជា​ដើម​។​ យ៉ាង​ណា​មិញ​ ពល​រដ្ឋ​ក្នុង​ក្រុង​ Mendocino ​​កំពុង​ឆ្ងល់​ថា​តើ​ថវិកា​ទាំង​នោះ​នឹង​អាច​ទៅ​ដល់​ពួក​គេ​ដែរ​​ឬ​យ៉ាង​ណា ​ខណៈ​គេ​មើល​ឃើញ​ថា​ គម្រោង​នេះ​នឹង​មិន​អាច​​កើត​ឡើង​​ឆាប់​ៗ​​​ទេ​ សម្រាប់​មនុស្ស​ជា​ច្រើន​ដែល​រស់​នៅ​​ក្នុង​​ក្រុង​តូច​ៗ​នា​ភាគ​ខាង​ជើង​នៃ​រដ្ឋ​នេះ​​។​

លោក​ Ian ​Roth​ ម្ចាស់​ផ្ទះ​សំណាក់​មួយ​ក្នុង​ក្រុង​ Mendocino ​បាន​និយាយ​ថា​៖​ «​ប្រសិន​បើ​យើង​អត់​ទឹក​ ​អាជីវកម្ម​របស់​យើង​ក៏​ត្រូវ​ចប់​​។​ យើង​មិន​អាច​ប្រាប់​ភ្ញៀវ​ ឱ្យ​សម្អាត​ខ្លួន​ដោយ​ប្រើ​កន្សែង​ជូត​ដៃ​បាន​ទេ​។ ​វា​ជា​អ្វី​ដែល​ខ្ញុំ​គិត​រាល់​យប់​»​។​

​​ពលរដ្ឋ​ក្នុង​ក្រុង​នេះ​ផ្សេង​ទៀត​និយាយ​ថា​ រដ្ឋបាល​ក្រុង​ត្រូវ​គិត​គូរ​ពី​ការ​ចម្រាញ់​ទឹក​ប្រៃ​ប្រើ​ប្រាស់​ ឬ​សាង​សង់​បណ្តាញ​បំពង់​បង្ហូរ​ទឹក​ដែល​ភ្ជាប់​ជាមួយ​ទីក្រុង​ដទៃ​ទៀត​នៅ​តាម​បណ្ដោយ​ឆ្នេរ​សមុទ្រ​ដែល​មាន​ប្រជាជន​តិច​ ជា​គម្រោង​ដែល​នឹង​ចំណាយ​អស់​រាប់​លាន​ដុល្លារ​។​

​តាម​ពិត​ទៅ​ ក្រុង​ Mendocino ​មាន​ប្រភព​ទឹក​ជា​ច្រើន​នៅ​ជុំ​វិញ​ ប៉ុន្តែ​ទន្លេ​ និង​ប្រភព​ទឹក​ផ្សេង​ទៀត​ដូច​ជា​អណ្ដូង​ និង​ទឹក​ក្រោម​ដី​ ប្រែ​ជា​រីង​អស់​នា​រដូវ​ក្តៅ ​ខណៈ​ភ្លៀង​ធ្លាក់​ក៏​តិច​។​ យ៉ាង​ណា​មិញ​ ក្រុង​នេះ​មិន​មាន​ប្រព័ន្ធ​ទឹក​ដូច​ក្រុង​ដទៃ​ទេ​។​ រាល់​អាជីវកម្ម​ និង​ផ្ទះ​ទាំង​អស់​ ត្រូវ​ពឹង​ផ្អែក​លើ​អណ្ដូង​ដែល​ខ្លះ​ជីក​តាំង​ពី​សតវត្សរ៍​ឆ្នាំ​ ១៨០០​។​

ការ​នាំ​យក​ទឹក​តាម​សាឡង់​ ត្រូវ​បាន​លើក​យក​មក​ពិភាក្សា​ ប៉ុន្តែ​គ្មាន​កន្លែង​ណា​ដែល​អាច​ដាក់​វា​នៅ​តាម​ច្រាំង​ថ្ម​ចោទ​នៃ​ឆ្នេរ​ក្រុង​ Mendocino ​បាន​ទេ​ ហើយ​កប៉ាល់​ក៏​ហាក់​ធំ​ពេក​សម្រាប់​កំពង់​ផែ​នៅ​ក្រុង​ Fort​ Bragg​។​ មន្រ្តី​ក្នុង​ក្រុង​នេះ​ កំពុង​ព្យាយាម​បញ្ចុះ​បញ្ចូល​ឱ្យ​នាយកដ្ឋាន​ព្រៃឈើ​និង​ការពារ​ភ្លើង​នៃ​រដ្ឋ​កាលីហ្វ័រញ៉ា​ ឱ្យ​ធ្វើ​លំហាត់​ហ្វឹក​ហ្វឺន​ជាមួយ​យន្តហោះ​ទម្លាក់​ទឹក​ យក​ទឹក​ពី​ស្រះ​ឬ​បឹង​​​ជា​ដើម​។​

គ្រោះ​រាំង​ស្ងួត​នៅ​រដ្ឋ​កាលីហ្វ័រញ៉ា​ កំពុង​បង្ហាញ​​​ថា​ លុយ​ និង​ហេដ្ឋារចនាសម្ព័ន្ធ​ដែល​កំណត់​ថា​អ្នក​ណា​មាន​ទឹក​គ្រប់​គ្រាន់​ក្នុង​កំឡុង​​គ្រោះរាំង​ស្ងួត​​ ប្រហែល​ជា​ពិសេស​ជាង​ទឹក​ភ្លៀង​ទៅ​ទៀត​​​។ វិបត្តិ​នេះ​ និង​​​ផល​ប៉ះពាល់​នៃ​​ការ​ប្រែ​ប្រួល​អាកាស​ធាតុ​ជា​ទូទៅ​ បាន​គូស​បញ្ជាក់​ពី​ចំណុច​ខ្សោយ​របស់​សហគមន៍​តូច​ៗ​ដែល​មាន​ធន​ធាន​តិច​។​

លោក​ Jay​ Lund ​អ្នក​ជំនាញ​លើ​ប្រព័ន្ធ​ទឹក​ក្នុង​រដ្ឋ​កាលីហ្វ័រញ៉ា​នៅ​សាកល​វិទ្យាល័យ​កាលីហ្វ័រញ៉ា​បាន​និយាយ​ថា​ កង្វះ​ទឹក​ប្រើ​ប្រាស់​ជា​អ្វី​ដែល​គេ​តែង​តែ​មើល​ឃើញ​នៅ​ពេល​មាន​គ្រោះរាំង​ស្ងួត​​។ លោក​បន្ត​ថា​៖​ «​​ក្រុង​ធំៗ​ ដែល​មាន​ទ្រ​ព្យសម្បត្តិ​ច្រើន​ ​បាន​រៀប​ចំ​យ៉ាង​ល្អ​ ដោយ​មាន​ផែនការ​វែង​ឆ្ងាយ​​​​»​។

​​ផ្ទុយ​ពី​ភាគ​ខាង​ជើង​ ​ក្រុង​​នានា​នៅ​ភាគ​ខាង​ត្បូង​រដ្ឋ​កាលីហ្វ័រញ៉ា​ បាន​បង្កើត​ទុន​បំរុង​ដ៏​ធំ​មួយ​តាម​រយៈ​ការ​កសាង​អាង​ស្តុក​ទឹក​ទាំង​លើ​ និង​ក្រោម​ដី​។​ បឹង​មួយ​ចំនួន​ដូច​ជា​ Skinner ​បឹង​ ​Matthews ​បឹង​ Diamond Valley ​និង​បឹង​សិប្បនិម្មិត​ Perris ​​ដែល​ស្ថិត​នៅ​ភាគ​អាគ្នេយ៍​នៃ​​ក្រុង​ Los Angeles ​​ក្នុង​តំបន់​ខ្ពស់​រាប​មាន​អាកាស​ធាតុ​ស្ងួត​​ ជា​អាង​ស្តុក​ទឹក​ដ៏​រឹង​មាំ​ មាន​ទឹក​​ប្រហែល​ ៨០ ​ភាគ​រយ​ ឬ​ជិត​ពេញ​ព្រៀប​នៃ​មាត់​បឹង​។ ​កត្តា​នេះ​ស​ឱ្យ​ឃើញ​ថា​ ហិរញ្ញ​វត្ថុ​ និង​ផែនការ​រាប់​ទសវត្សរ៍​​ ជា​លក្ខខណ្ឌ​កំណត់​​ធន​ធាន​ទឹក​នៅ​រដ្ឋ​កាលីហ្វ័រញ៉ា​នា​ពេល​បច្ចុប្បន្ន​នេះ​​​។​ ​

​​ក្រុង​តូច​ៗ​ភាគ​ខាង​ជើង​ ដូច​ជា​ក្រុង​ Mendocino ​ក្រុង​ Fort Bragg ​និង​ក្រុង​ Ukiah ​ស្ថិត​នៅ​ក្នុង​អាកាស​ធាតុ​សើម​ ពឹង​ផ្អែក​លើ​ការ​ផ្គត់​ផ្គង់​ទឹក​ជា​ច្រើន​ពី​ប្រភព​តែ​មួយ​​។​ ​​តាម​រយៈ​នេះ​ អ្នក​ជំនាញ​ខាង​ទឹក​និយាយ​ថា​ ការ​ប្រែ​ប្រួល​អាកាស​ធាតុ​ និង​អាកាស​ធាតុ​ក្តៅ​ស្ងួត​ហួត​ហែង​រាប់​សប្ដាហ៍​នៅ​ភាគ​ខាង​ជើង​មាន​ន័យ​ថា​ ​ក្រុង​តូច​ៗ​ទាំង​នេះ​​ ត្រូវ​ចាប់​ផ្តើម​យក​ក្រុង​ភាគ​ខាង​ត្បូង​ជា​ឧទាហរណ៍​ ដោយ​បង្កើត​ប្រព័ន្ធ​ស្តុក​ទឹក​​​ពី​ប្រភព​ផ្សេង​ៗ​គ្នា​។​

​នៅ​ទូទាំង​ភាគ​ខាង​ជើង​រដ្ឋ​កាលីហ្វ័រញ៉ា​ អាង​ស្តុក​ទឹក​ជា​ច្រើន​កំពុង​ស្ថិត​ក្នុង​កម្រិត​ធ្ងន់ធ្ងរ​។ ​​កាល​ពី​សប្តាហ៍​មុន​ ស្ថានីយ៍​ផលិត​ថាមពល​នៅ​ទំនប់​វារី​អគ្គីសនី​ Oroville ​បាន​បញ្ឈប់​ការ​ផលិត​អគ្គិសនី​ជា​លើក​ដំបូង​ ដោយ​សារ​តែ​​ចំណុះ​ទឹក​​បច្ចុប្បន្ន​ធ្លាក់​ចុះ​ទាប​ពេក​​ ដោយ​មាន​ទឹក​ត្រឹម​តែ​ ២៤ ​ភាគ​រយ​ប៉ុណ្ណោះ​នៃ​ចំណុះ​ទំនប់​។​​ ​

​​អ្វី​ដែល​ត្រូវ​ដោះ​ស្រាយ​ឱ្យ​បាន​រហ័ស​បំផុត​នោះ​ គឺ​អាច​រក​ទឹក​ប្រើ​ឱ្យ​បាន​គ្រប់​គ្រាន់​រហូត​ដល់​រដូវ​ភ្លៀង​ធ្លាក់​នា​រដូវ​រងា​ ខណៈ​ដែល​ក្រុង​​នានា​នៅ​ក្បែរ​ក្រុង​ Mendocino នៅ​​ប៉ុន្មាន​សប្តាហ៍​ខាង​មុខ​នេះ​ ​អាច​នឹង​ឈប់​លក់​ទឹក​​​ឱ្យ​ក្រុង​នេះ​ទាំង​ស្រុង ​ដែល​ជា​ជំហាន​មួយ​របស់​ក្រុង​ Fort​ Bragg​ បាន​ដាក់​ចេញ​កាល​ពី​ខែ​កក្កដា​រួច​ហើយ​ ដោយ​សារ​តែ​ការ​ព្រួយ​បារម្ភ​អំពី​កង្វះ​ទឹក​ផ្ទាល់​ខ្លួន​។​