ចក្រភពអង់គ្លេស៖ ចិន និងរុស្សីត្រូវការចាំបាច់សម្រាប់ «ឥទ្ធិពលបន្ធូរបន្ថយ» លើតាលីបង់
រដ្ឋមន្ត្រីក្រសួងការបរទេសអង់គ្លេសលោកដូមីនិក រ៉ាបបាននិយាយថាទីក្រុងឡុងដុងត្រូវតែងាកទៅរករុស្ស៊ី និងចិនដើម្បីអនុវត្ត «ឥទ្ធិពលបន្ធូរបន្ថយ» លើក្រុមឧទ្ទាមតាលីបង់ បើទោះបីជាមានការមិនទុកចិត្តគ្នារវាងចក្រភពអង់គ្លេស និងរដ្ឋាភិបាលទាំងនោះក៏ដោយ។
លោករ៉ាបបានប្រាប់កាសែត The Sunday Telegraph ថា៖ «យើងនឹងត្រូវនាំប្រទេសដែលមានឥទ្ធិពលបន្ធូរបន្ថយដូចជាចិន និងរុស្សីជាដើម បើទោះបីជាយើងមិនពេញចិត្តក៏ដោយ»។
ការត្រឡប់មកកាន់អំណាចរបស់តាលីបង់នៅប្រទេសអាហ្វហ្គានីស្ថាន បានធ្វើឱ្យប្រទេសលោកខាងលិចមានការព្រួយបារម្ភថានឹងមានការត្រឡប់មកវិញនៅជំនឿជ្រុលនិយម រួមជាមួយការរំលោភសិទ្ធមនុស្ស និងសិទ្ធស្ត្រី។ អ្នកវិភាគជាច្រើនបានគិតថាប្រទេសចិន និងរុស្សីអាចប្រើប្រាស់ឥទ្ធិពលរបស់ពួកគេដើម្បីធ្វើឱ្យក្រុមតាលីបង់បន្ធូរបន្ថយភាពជ្រុលនិយមរបស់ពួកគេ ដែលជាអ្វីលោកខាងលិចបានបរាជ័យ។
ប៉ុន្តែកិច្ចសហប្រតិបត្តិការរវាងចក្រភពអង់គ្លេស និងប្រទេសទាំងពីរអាចនឹងមានការលំបាក។
ថ្មីៗនេះអង់គ្លេសនិងចិនមានភាពមិនចុះសម្រុងគ្នាលើបញ្ហាផ្សេងៗរួមទាំងទីក្រុងហុងកុង និងការចោទប្រកាន់ពីការរំលោភសិទ្ធិមនុស្សលើជនជាតិភាគតិចអ៊ុយហ្គ័រនៅតំបន់ស៊ីនជាំង។
ទំនាក់ទំនងរបស់អង់គ្លេសជាមួយរុស្ស៊ីមានភាពតានតឹងតាំងពីឆ្នាំ២០១៤ បន្ទាប់ពីរុស្សីកាត់យកឧបទ្វីបគ្រីមៀររបស់ប្រទេសអ៊ុយក្រែន។ ភាពតានតឹងបានកើនឡើងបន្ថែមទៀតកាលពីឆ្នាំ២០១៨ ដោយសារការប៉ុនប៉ងបំពុលអតីតភ្នាក់ងារចារកម្មសម្ងាត់រុស្សីលោក Sergei Skripal ដែលបានក្បត់រុស្សីហើយបានផ្ដល់ព័ត៌មានសម្ងាត់ឱ្យទីភ្នាក់ងារចារកម្មអង់គ្លេស ដែលជួយក្នុងការចាប់ខ្លួនភ្នាក់ងារចារកម្មរុស្សីរាប់រយនាក់។ ថ្មីៗនេះអង់គ្លេសបានបង្កើនកិច្ចសហប្រតិបត្តិការជាមួយប្រទេសអ៊ុយក្រែន ហើយបានប្រឈមដាក់គ្នាដោយផ្ទាល់ជាមួយរុស្សីនៅតំបន់សមុទ្រខ្មៅ៕
ប្រភព៖ Reuters
