ម៉ាឡេស៊ីរកបាននាយករដ្ឋមន្ត្រីថ្មី បញ្ចប់វិបត្តិនយោបាយជាងមួយសប្ដាហ៍
ម៉ាឡេស៊ីបានរកឃើញនាយករដ្ឋមន្ត្រីថ្មីជំនួសលោក Muhyiddin Yassin កាលពីថ្ងៃសុក្រកន្លងទៅ។ នាយករដ្ឋមន្ត្រីថ្មីនោះគឺ លោក Ismail Sabri Yaakob ដែលជាអ្នកនយោបាយមកពីអង្គការរួបរួមជាតិម៉ាឡេ ឬ ហៅកាត់ថា UMNO។
បុរសជនជាតិម៉ាឡេវ័យ ៦១ឆ្នាំរូបនេះ បានស្បថចូលកាន់តំណែងនៅថ្ងៃសៅរ៍ ក្រោយអធិបតីរបស់ព្រះចៅស៊ុលតង់ម៉ាឡេស៊ី Al-Sultan Abdullah Ri’ayatuddin Al-Mustafa Billah Shah នៅរាជវាំងម៉ាឡេស៊ី នាឯក្រុងកូឡាឡាំពួរ។ លោកជានាយករដ្ឋមន្ត្រីលើកទី៩ហើយរបស់ម៉ាឡេស៊ី ចាប់តាំងពីប្រទេសនេះប្រកាសឯករាជ្យពីអង់គ្លេស។
តួនាទីបន្ទាន់របស់លោក Ismail Sabri គឺ កិច្ចការប្រយុទ្ធប្រឆាំងនឹងជំងឺកូវីដ-១៩។ នេះបើតាមបន្ទូលរបស់ព្រះចៅស៊ុលតង់ម៉ាឡេស៊ី។
លោកត្រូវបានតែងតាំងកាលពីថ្ងៃសុក្រកន្លងទៅ បន្ទាប់ពីមានសន្និសីទនៃស្ដេចស៊ុលតង់ប្រចាំរដ្ឋនីមួយៗនៃម៉ាឡេស៊ីចំនួន ៩រូប។ កាលពីថ្ងៃអង្គារកន្លងទៅ សភាជាន់ទាបម៉ាឡេស៊ីត្រូវបានបង្គាប់ ដោយព្រះមហាក្សត្រឱ្យជ្រើសតាំងនាយករដ្ឋមន្ត្រី។
បើតាមការចុះផ្សាយរបស់ Channel News Asia ក្នុងចំណោមសមាជិកសភា ២២០រូប ១១៤រូបដែលជាសំឡេងភាគច្រើនបោះឆ្នោតគាំទ្រលោក Ismail Sabri ខណៈ ១០៥រូបបោះឆ្នោតគាំទ្រអ្នកនយោបាយប្រឆាំងចាស់វស្សានៅម៉ាឡេស៊ីលោក Anwar Ibrahim។
លោក Muhyiddin Yassin បានលាលែងពីតំណែងជាផ្លូវការកាលពីថ្ងៃច័ន្ទសប្ដាហ៍ ក្រោយពីប្រទេសនេះជួបវិបត្តិនយោបាយអស់មួយរយៈ។
ក្រោយពីលោក Ismail Sabri ត្រូវបានតែងតាំងជានាយករដ្ឋមន្ត្រី មេដឹកនាំសម្ព័ន្ធគណបក្សប្រឆាំងលោក Anwar ក៏ប្រកាសគាំទ្រការតែងតាំងនេះ ហើយលោកក៏បានជំរុញឱ្យអ្នកគាំទ្ររបស់លោកទទួលយកការតែងតាំងនេះ៕
ប្រភព៖ CNA
