យោធាអាមេរិកទុកពេលឱ្យលោកបៃដិន២៤ម៉ោង ក្នុងការសម្រេចពន្យារពេលការជម្លៀសចេញអាហ្វហ្គានីស្ថាន
កាលពីថ្ងៃចន្ទនេះ យោធាសហរដ្ឋអាមេរិកបានប្រាប់លោកប្រធានាធិបតីចូ បៃដិនថាលោកត្រូវតែសម្រេចចិត្តនៅថ្ងៃអង្គារនេះថានឹងពន្យារការជម្លៀសចេញពីអាហ្វហ្គានីស្ថានឱ្យហួសពីថ្ងៃទី ៣១ សីហាដែរ ឬទេ នេះបើតាមការរាយការណ៍របស់សារព័ត៌មាន CNN ខណៈពេលដែលតាលីបង់បានព្រមានថាការពន្យារណាមួយនឹងបង្ក «ផលវិបាក»។
ប្រភពរបស់ CNN និយាយថាទីប្រឹក្សាយោធាបានប្រាប់សេតវិមានថាការសម្រេចចិត្តត្រូវតែធ្វើឡើងនៅថ្ងៃអង្គារនេះ ដើម្បីមានពេលវេលាគ្រប់គ្រាន់ដើម្បីដកកងទ័ពចំនួន ៥.៨០០ នាក់ដែលបច្ចុប្បន្នកំពុងស្ថិតនៅអាកាសយានដ្ឋានក្រុងកាប៊ុល។ ប្រសិនបើលោកបៃដិនយល់ស្របនឹងការពន្យារ យោធារំពឹងថានឹងមាន «ពីរបីថ្ងៃបន្ថែមទៀត» នៃការព្យាយាមជម្លៀសមនុស្សឱ្យបានច្រើនបំផុត មុនពេលការដកទ័ពអាមេរិកចាប់ផ្ដើមដែលអាចនៅចុងសប្ដាហ៍នេះ។
នៅត្រឹមថ្ងៃចន្ទលោកបៃដិនគឺនៅកំពុងពិចារណានៅឡើយ ប៉ុន្តែទីប្រឹក្សារបស់លោកជាច្រើនមានការប្រឆាំងចំពោះការពន្យារ ដោយមានការព្រួយបារម្ភអំពីស្ថានភាពសន្តិសុខនៅអាកាសយានដ្ឋាន។ ក្នុងរយៈពេលប៉ុន្មានថ្ងៃចុងក្រោយនេះ ក្រុមមន្ត្រីអាមេរិកបានឃ្លាំមើលការគំរាមកំហែងពីក្រុមភេរវកម្ម ដោយផ្អែកព័ត៌មានជាប់លាប់ នឹងគួរឱ្យទុកចិត្តបានថាស្ថានភាពវឹកវរនៅខាងក្រៅអាកាសយានដ្ឋានបានក្លាយជាគោលដៅរបស់ក្រុម ISIS និងក្រុមភេរវកម្មផ្សេងទៀត។
ឱសានវាទរបស់ក្រសួងការពារជាតិអាមេរិកចំពោះលោកបៃដិន ធ្វើឡើងបន្ទាប់ក្រុមតាលីបង់បានប្រកាសត្រូវតែដកទ័ពចេញទាំងអស់ត្រឹមថ្ងៃកំណត់ ទី៣១ សីហា បើសិនមិនចង់មាន «ផលវិបាក។
មន្ត្រីយោធាអាមេរិកនិយាយថាបច្ចុប្បន្នពួកគេនៅតែមានគម្រោងគោរពតាមថ្ងៃកំណត់ ជាមួយការបង្កើនល្បឿននៃជើងហោះហើរជម្លៀសមនុស្សចេញរាប់ពាន់នាក់ជារៀងរាល់ថ្ងៃហើយយោធាអាមេរិកថែមទាំងចូលទីក្រុងកាប៊ុលតាមការចាំបាច់ដើម្បីទៅយកមនុស្ស។
អ្នកនាំពាក្យក្រសួងការពារជាតិអាមេរិកលោកចន ឃឺប៊ីនិយាយថាក្រសួងនឹងរៀបចំបេសកកម្មតាមថ្ងៃកំណត់ទី៣១ សីហា ហើយបន្ថែមទៀតថា៖ «នោះគឺជាបេសកកម្មដែលយើងត្រូវបានចាត់តាំងដោយអគ្គមេបញ្ជាការ នោះគឺជាអ្វីដែលយើងកំពុងព្យាយាមប្រតិបត្តិ»។
បើទោះបីជាទីប្រឹក្សាជាន់ខ្ពស់របស់លោកជាច្រើន បានបង្ហាញជាសាធារណៈថាការពន្យារហួសថ្ងៃទី៣១ សីហាក៏ដោយ ក៏លោកបៃដិននៅនិយាយថាប្រសិនបើចាំបាច់បេសកកម្មជម្លៀសអាចបន្តរហូតដល់ខែកញ្ញា។ លោកបៃដិននិយាយកាលពីថ្ងៃអាទិត្យថា៖ «មានការពិភាក្សាគ្នានៅក្នុងយោធាអំពីការពង្រីក។ ក្ដីសង្ឃឹមរបស់ខ្ញុំគឺយើងនឹងមិនចាំបាច់ពន្យារទៀតទេ»។
សមាជិកសភាតំណាងមកពីបក្សប្រជាធិបតេយ្យលោកអាដាម ស៊ីហ្វ ដែលជាប្រធានគណៈកម្មាធិការចារកម្មនៃសភាតំណាង បានប្រាប់អ្នកយកព័ត៌មានថាបន្ទាប់ស្ដាប់ការរាយការណ៍របស់មន្ត្រីចារកម្មអំពីស្ថានភាពនៅអាហ្វហ្គានីស្ថាន លោកមិនជឿជាក់ថាបេសកកម្មជម្លៀសមិនធ្វើរួចទាំងស្រុងនៅក្នុងរយៈពេលប្រាំបីថ្ងៃខាងមុខនេះទេ។
លោកបៃដិនត្រូវបានគេរំពឹងថានឹងប្រកាសការសម្រេចចិត្តរបស់លោកក្នុងកិច្ចប្រជុំតាមសន្និសីទវីដេអូនៃមេដឹកនាំក្រុមប្រទេសអ្នកមាន G7។
រដ្ឋាភិបាលចក្រភពអង់គ្លេសបានប្រកាសថានៅក្នុងកិច្ចប្រជុំខាងមុខនេះលោកនាយករដ្ឋមន្ត្រីបូរីស ចនសុននឹងស្នើឱ្យអាមេរិកពន្យារបេសកកម្មរបស់ពួកគេ។
ប្រទេសបារាំងក៏បានសម្ដែងការព្រួយបារម្ភអំពីពេលវេលាកំណត់ដែលនឹងមកដល់ ដោយនិយាយថាពួកគេត្រូវការពេលវេលាបន្ថែមទៀតដើម្បីបញ្ចប់ការជម្លៀស។
រដ្ឋមន្ត្រីការបរទេសអាល្លឺម៉ង់លោក Heiko Maas បាននិយាយថាលោកកំពុងពិភាក្សាជាមួយសម្ព័ន្ធមិត្តណាតូ និងក្រុមតាលីបង់ដើម្បីរក្សាប្រតិបត្តិការជម្លៀសក្រោយការផុតកំណត់។
កាលពីថ្ងៃសៅរ៍ប្រធានគោលនយោបាយការបរទេសសហភាពអឺរ៉ុបលោក Josep Borrell បាននិយាយថាការជម្លៀសបុគ្គលិកអាហ្វហ្គានីស្ថានរាប់ម៉ឺននាក់ និងក្រុមគ្រួសាររបស់ពួកគេមុនថ្ងៃកំណត់គឺមិនអាចទៅរួចទេ៕
ប្រភព៖ Reuters
