ក្រសួងការពារជាតិជប៉ុនប៉ងចង់បង្កើនថវិកាសម្រាប់វិស័យយោធា ទប់ទល់នឹងការគំរាមកំហែង
ក្រសួងការពារជាតិជប៉ុនកាលពីថ្ងៃអង្គារកន្លងទៅ បានធ្វើការដាក់សំណើបង្កើនកញ្ចប់ថវិការហូតទៅដល់ប្រមាណ ៥,៤៨ទ្រីលានយ៉េន ឬ ប្រហាក់ប្រហែលនឹង ៤៩ប៊ីលានដុល្លារ សម្រាប់ចំណាយលើវិស័យយោធាក្នុងឆ្នាំ២០២២។
យោងតាមឯកសារសំណើកញ្ចប់ថវិកាសម្រាប់ឆ្នាំ២០២២ ជប៉ុនមានបំណងបន្តអភិវឌ្ឍសមត្ថភាពរបស់ខ្លួនតាមរយៈការស្រាវជ្រាវបច្ចេកវិទ្យាថ្មីៗនានា ហើយព្រមទាំងបំប៉នសមត្ថភាពយោធារបស់ខ្លួនផ្នែកអវកាស ផ្នែកប្រព័ន្ធសន្តិសុខអ៊ីនធឺណិត ក៏ដូចជាផ្នែកអេឡិចត្រូម៉ាញេទិចផងដែរ។
បន្ថែមពីលើនេះ តាមរយៈកញ្ចប់ថវិកានេះជប៉ុនក៏មានបំណងក្នុងការការពារកោះដាច់ស្រយាលរបស់ខ្លួន ដោយក្នុងនោះក៏មានប្រជុំកោះជម្លោះ Senkaku ដែលកាន់កាប់ដោយជប៉ុន និងទាមទារដោយចិន និងតៃវ៉ាន់ផងដែរ។
យ៉ាងណាមិញ សំណើថវិកានេះអាចនឹងត្រូវធ្វើការវិសោធនកម្មដោយក្រសួងហិរញ្ញវត្ថុជប៉ុន មុននឹងបញ្ជូនទៅកាន់គណៈរដ្ឋមន្ត្រី។ ប្រសិនបើគ្រប់យ៉ាងមិនប្រែប្រួលនោះទេ កញ្ចប់ថវិកាសម្រាប់វិស័យការពារជាតិជប៉ុនមានការកើនឡើងរយៈពេល ១០ឆ្នាំជាប់គ្នាហើយ ដោយឆ្នាំ២០២២ អាចនឹងកើនពីកញ្ចប់ឆ្នាំ២០២១ប្រមាណ ២,៦%។
ការបង្កើនកញ្ចប់ថវិកានេះធ្វើឡើងបន្ទាប់ពីជប៉ុនបានចេញផ្សាយនូវសៀវភៅសការពារជាតិរបស់ខ្លួនកាលពីខែកក្កដាកន្លងទៅ ដោយចាត់ទុកថាការបង្កើនអានុភាពយោធានុយក្លេអ៊ែររបស់កូរ៉េខាងជើងជាការគំរាមកំហែង ខណៈសកម្មភាពរបស់ចិននៅក្បែរប្រជុំកោះជម្លោះបង្កជាការព្រួយបារម្ភយ៉ាងធ្ងន់ធ្ងរដល់សន្តិសុខជាតិរបស់ជប៉ុន៕
