ឥណ្ឌាជួបពិភាក្សាជាមួយមន្ត្រីជាន់ខ្ពស់តាលីបង់លើកដំបូងចាប់ពីការដួលរលំទីក្រុងកាប៊ុល
ក្រសួងការបរទេសឥណ្ឌាបាននិយាយថាកាលពីថ្ងៃអង្គារ ទី៣១ សីហាឯកអគ្គរដ្ឋទូតរបស់ខ្លួនប្រចាំប្រទេសកាតាបានជួបជាមួយមន្ត្រីជាន់ខ្ពស់ក្រុមតាលីបង់ ដែលជាជួបប្រជុំផ្លូវការដំបូងចាប់តាំងពីក្រុមជ្រុមនិយមនេះចូលកាន់កាប់ប្រទេសអាហ្វហ្គានីស្ថាន។
លោកឯកអគ្គរដ្ឋទូតឌីប៉ាក មីតតាលបានជួបជាមួយលោកសឺរ ម៉ូហាម៉េដ អាបាស ស្តានីកហ្សៃប្រធានការិយាល័យនយោបាយតាលីបង់ប្រចាំក្រុងដូហា។ ក្រសួងការបរទេសឥណ្ឌាបាននិយាយភាគីទាំងពីរបានពិភាក្សាអំពីសុវត្ថិភាពរបស់ជនជាតិឥណ្ឌាដែលមានវត្តមាននៅអាហ្វហ្គានីស្ថាន។
លោកមីតតាលក៏បានបង្ហាញការព្រួយបារម្ភរបស់ឥណ្ឌាថាក្រុមឧទ្ទាមប្រឆាំងឥណ្ឌានៅអាចបន្តប្រើប្រាស់ទឹកដីអាហ្វហ្គានីស្ថានដើម្បីធ្វើការវាយប្រហារនៅឥណ្ឌា។ ឥណ្ឌាមានការព្រួយយ៉ាងខ្លាំងចំពោះក្រុមតាលីបង់ដោយសារក្រុមនេះមានទំនាក់ទំនងយ៉ាងជិតស្និតជាមួយសត្រូវរបស់ឥណ្ឌា គឺប្រទេសប៉ាគីស្ថាន៕
