អតិផរណានៅតំបន់ចាយប្រាក់អឺរ៉ូកើនឡើងដល់ ៣ ភាគរយ
អតិផរណានៅក្នុងតំបន់ចាយប្រាក់អឺរ៉ូ កើនឡើងដល់កម្រិតខ្ពស់បំផុតក្នុងរយៈពេលជិតមួយទសវត្សរ៍ ដោយបន្ថែមសម្ពាធលើធនាគារកណ្តាលអឺរ៉ុប ដើម្បីបន្ថយល្បឿននៃការទិញមូលបត្របំណុលរបស់ខ្លួន។
សន្ទស្សន៍ថ្លៃទំនិញប្រើប្រាស់ប្រចាំឆ្នាំនៃតំបន់ឈានដល់ ៣ ភាគរយនៅក្នុងខែសីហា កើនឡើងពី ២,២ ភាគរយនៅក្នុងខែកក្កដា ខ្ពស់ជាងអត្រាឆ្នាំមុន និងការរំពឹងទុករបស់អ្នកសេដ្ឋកិច្ចភាគច្រើន ដែលជាលទ្ធផលនៃការស្ទុះងើបឡើងវិញនៃសេដ្ឋកិច្ចនាពេលថ្មីៗនេះ។
តម្លៃទំនិញប្រើប្រាស់មិនដែលកើនឡើងយ៉ាងឆាប់រហ័សបែបនេះទេ នៅក្នុងប្លុកនៃប្រទេសទាំង១៩ ចាប់តាំងពីខែវិច្ឆិកា ឆ្នាំ ២០១១ នៅពេលធនាគារកណ្តាលអឺរ៉ុបទើបតែដំឡើងអត្រាការប្រាក់សម្រាប់តំបន់។ អត្រាអតិផរណាខ្ពស់បំផុតចន្លោះពី ៤,៥ ទៅ ៥ ភាគរយគឺនៅអេស្តូនី លីទុយអានី និងបែលហ្ស៊ិក។ បច្ចុប្បន្នមានតែប្រទេសចំនួន ៤ ប៉ុណ្ណោះដែលមានអតិផរណាក្រោម ២ ភាគរយ ធ្លាក់ចុះពី ១៦ ប្រទេសកាលពីខែមីនា។
អ្នកជំនាញថា ការស្ទុះងើបឡើងវិញនៃសេដ្ឋកិច្ចពីផលប៉ះពាល់នៃជំងឺរាតត្បាត ថ្លៃថាមពលខ្ពស់ ការផ្លាស់ប្តូរនៃការកាត់បន្ថយពន្ធបន្ថែមរបស់អាល្លឺម៉ង់កាលពីឆ្នាំមុន និងការរាំងស្ទះដល់ចង្វាក់ផ្គត់ផ្គង់ ជាកត្តាដែលធ្វើឱ្យមានកំណើនអតិផរណា។
កាលពីឆ្នាំមុន តម្លៃថាមពលកើនឡើង ១៥,៤ ភាគរយ គ្រឿងស្រវឹងនិងថ្នាំជក់បានកើនឡើង ២ ភាគរយ និងទំនិញឧស្សាហកម្មកើនឡើង ២,៧ ភាគរយ។ អតិផរណាស្នូល (Core Inflation) ដែលមិនរាប់បញ្ចូលថាមពល ម្ហូបអាហារ គ្រឿងស្រវឹង និងថ្នាំជក់ កើនឡើងទ្វេដងដល់ ១,៦ ភាគរយដែលជាកម្រិតខ្ពស់បំផុតចាប់តាំងពីឆ្នាំ ២០១២។
សេដ្ឋវិទូភាគច្រើនរំពឹងថា អតិផរណានឹងធ្លាក់ចុះម្តងទៀតនៅឆ្នាំក្រោយដោយសារកត្តានាំហេតុបណ្តោះអាសន្នបច្ចុប្បន្នថយចុះ។ ជាមួយគ្នានេះ អតិផរណាក៏កំពុងកើនឡើងនៅក្នុងប្រទេសជាច្រើន ខណៈដែលសេដ្ឋកិច្ចពិភពលោកកំពុងងើបឡើងវិញពីផលប៉ះពាល់នៃជំងឺរាតត្បាត ដោយបង្កើនសម្ពាធលើធនាគារកណ្តាលឱ្យចាប់ផ្តើមកាត់បន្ថយការជំរុញសេដ្ឋកិច្ចដោយប្រើរូបិយវត្ថុដែលខ្លួនបានចាប់ផ្តើមកាលពីឆ្នាំមុន។
