ការសិក្សា៖ ការបំពុលបរិយាកាស អាចកាត់បន្ថយអាយុកាលរបស់ប្រជាជនឥណ្ឌា ៩ឆ្នាំ
របាយការណ៍ពីក្រុមស្រាវជ្រាវមួយរបស់អាមេរិក និយាយថា ការបំពុលខ្យល់អាចកាត់បន្ថយអាយុកាលរបស់ប្រជាជនឥណ្ឌាបាន ៩ ឆ្នាំ។ នេះបើតាមឱ្យដឹងពីសារព័ត៌មាន BBC។
ការសិក្សានេះ និយាយថាប្រជាជនចំនួន ៤៨០ លាននាក់នៅភាគខាងជើងប្រទេសឥណ្ឌាប្រឈមនឹង « កម្រិតនៃការបំពុលបរិយាកាសធ្ងន់ធ្ងរបំផុតនៅលើពិភពលោក» ហើយយូរៗ ទៅកម្រិតខ្ពស់ទាំងនេះ បានពង្រីកដល់ផ្នែកផ្សេងទៀតនៃប្រទេសនេះផងដែរ។
ប្រភពដដែលបានបន្ថែមថា គោលនយោបាយការពារការបំពុលអាកាស អាចបន្ថែមអាយុជីវិតមនុស្សរហូតដល់ ៥ឆ្នាំ។ ទីក្រុងនានានៅក្នុងប្រទេសឥណ្ឌា ត្រូវបានគេស្គាល់ថាជាតំបន់ ដែលមានការបំពុលបរិយាកាសច្រើនជាងគេនៅលើពិភពលោក ហើយខ្យល់អាកាសអាក្រក់បានសម្លាប់មនុស្សជាងមួយលាននាក់ជារៀងរាល់ឆ្នាំ។
របាយការណ៍របស់វិទ្យាស្ថានគោលនយោបាយថាមពលនៅសាកលវិទ្យាល័យឈីកាហ្គោ (EPIC) និយាយថា តំបន់ភាគខាងជើងប្រទេសឥណ្ឌា ត្រូវទទួលរងកម្រិតបំពុលបរិស្ថានច្រើនជាងតំបន់នានាលើពិភពលោក ដល់ទៅ ១០ ដងឯណ្ណោះ។
ការបំពុលបរិយាកាសនេះ បានរីករាលដាលអស់ជាច្រើនទសវត្សរ៍មកហើយ តាំងពីតំបន់នេះទៅរដ្ឋភាគខាងលិច និងភាគកណ្តាលឥណ្ឌា ដូចជាម៉ាហារ៉ាសត្រា និងម៉ាឌាប្រាដេស ដែលបច្ចុប្បន្នមនុស្សជាមធ្យម ត្រូវបានកាត់បន្ថយអាយុជីវិតពី ២ ទៅកន្លះទៅ ៣ ឆ្នាំ បើប្រៀបធៀបទៅនឹងដើមឆ្នាំ ២០០០ ។ ទិន្នន័យថ្មីពី របាយការណ៍សន្ទស្សន៍គុណភាពខ្យល់អាកាសរបស់ EPIC និយាយថា ប្រជាជននៅរដ្ឋធានីដេលី អាចនឹងបន្ថែមអាយុជីវិតរបស់ពួកគេរហូតដល់ ១០ ឆ្នាំ ប្រសិនបើការបំពុលបរិយាកាសត្រូវបានកាត់បន្ថយ ដើម្បីបំពេញតាមការណែនាំរបស់អង្គការសុខភាពពិភពលោក (WHO)។
