កីឡាករប៉ារ៉ាឡាំពិកសញ្ជាតិអាហ្វហ្កានីស្ថាន២រូបជម្នះរាល់ឧបសគ្គចេញទៅប្រកួតនៅតូក្យូដោយសុវត្ថិភាព
នៅពេលយន្តហោះរបស់ខ្លួនហោះឆ្ពោះទៅទីក្រុងតូក្យូលោក Andrew Parsons ប្រធានគណៈកម្មាធិការប៉ារ៉ាឡាំពិកអន្តរជាតិបានទទួលបានដំណឹងមិនសប្បាយចិត្តមួយគឺ អត្តពលិកពីរនាក់មកពីអាហ្វហ្គានីស្ថាននឹងមិនអាចហោះហើរ ដោយសុវត្ថិភាពពីទីក្រុងកាប៊ុលទៅកាន់ ប្រទេសជប៉ុនដើម្បីចូលរួមការប្រកួតកីឡាឡើយ។
ប្រទេសអាហ្វហ្កានីស្ថាននិងជាពិសេសអាកាសយានដ្ឋាននៅក្នុងរដ្ឋធានីកាប៊ុល បានធ្លាក់ចូលទៅក្នុងភាពច្របូកច្របល់បន្ទាប់ពីការចូលកាន់កាប់របស់ក្រុមតាលីបង់ កាលពីពីរសប្តាហ៍មុនដោយមានប្រជាជនអាហ្វហ្គានីស្ថានរាប់ពាន់នាក់ អស់សង្ឃឹមក្នុងការ ព្យាយាមជម្លៀសចេញពីប្រទេស។ក្នុងសន្និសីទសារព័ត៌មានមួយភ្លាមៗបន្ទាប់ពីលោកParsons បានចុះចត នៅទីក្រុងតូក្យូអ្នករៀបចំកម្មវិធីបានប្រកាសថា អត្តពលិកទាំងពីរនាក់គឺ Zakia Khudadadi វ័យ ២២ឆ្នាំនឹងប្រកួតក្នុងវិញ្ញាសារតេក្វាន់ដូដែលជាកីឡាបើកឆាកប៉ារ៉ាឡាំពិក និងHossain Rasouli អាយុ ២៦ ឆ្នាំ គ្រោងនឹងប្រកួតក្នុង ការប្រណាំងរយះចម្ងាយខ្លី។លោក Toshiro Muto នាយកប្រតិបត្តិនៃគណៈកម្មាធិការរៀបចំកម្មវិធីទីក្រុងតូក្យូបានមានប្រសាសន៍ថា៖ «ខ្ញុំ សង្ឃឹមថាពួកគេកំពុងចំណាយពេលរបស់ពួកគេដោយសុវត្ថិភាពនៅក្នុងប្រទេសអាហ្វហ្កានីស្ថាន» ។
មួយសប្តាហ៍ក្រោយមក នៅក្នុងការបង្ហាញការគោរពចំពោះគណៈប្រតិភូអវត្តមានពី ប្រទេសអាហ្វហ្កានីស្ថាន អ្នកស្ម័គ្រចិត្តប៉ារ៉ាឡាំពិកម្នាក់បានកាន់ទង់ជាតិអាហ្វហ្កានីស្ថាន កំឡុងពេលហែក្បួនអត្តពលិកក្នុងពិធីបើកនៅពហុកីឡដ្ឋានជាតិអូឡាំពិក។នេះក៏ជាសញ្ញាមួយដែលអ្នករៀបចំកម្មវិធីសង្ឃឹមថាអត្តពលិកទាំងពីរ នៅតែអាចទៅដល់ទីក្រុងតូក្យូមកចូលរួមប្រកួតបាន។ នៅយប់ថ្ងៃសៅរ៍សប្ដាហ៌មុន ដោយជម្នះរាល់ភាពលំបាកជាច្រើនក្នុងពេលធ្វើដំណើ Zakia Khudadadi និង Hossain Rasouli បានចុះចតនៅអាកាសយានដ្ឋាន ហាណេដា(Haneda))ក្នុងទីក្រុងតូក្យូអមដំណើរដោយលោក Arian Sadiqi ប្រធានបេសកកម្ម របស់ក្រុមប៉ារ៉ាឡាំពិកអាហ្វហ្គានីស្ថាន។
ព័ត៌មានលម្អិតជាច្រើននៃដំណើររបស់ពួកគេមិនត្រូវបានប្រាប់ឲ្យដឹងនោះទេហើយមន្រ្តីពាក់ព័ន្ធ បាននិយាយថា អត្តពលិកនឹងមិននិយាយជាមួយប្រព័ន្ធផ្សព្វផ្សាយព័ត៌មានក្នុងអំឡុងការប្រកួតប៉ារ៉ាឡាំពិកឡើយ។ អ្នករៀបចំប៉ារ៉ាឡាំពិកឆ្នាំនេះ បាននិយាយថា ការមកដល់ប្រទេសជប៉ុន ពាក់ព័ន្ធនឹងជំហានជាច្រើននិងជំនួយពីអង្គការនិងរដ្ឋាភិបាលជាច្រើន។
លោក Parsons បាននិយាយថាទាំងគណៈកម្មាធិការប៉ារ៉ាឡាំពិកអន្តរជាតិនិងគណៈកម្មាធិការរៀបចំនៅទីក្រុងតូក្យូគឺមិនជាប់ពាក់ព័ន្ធដោយផ្ទាល់ក្នុងការជម្លៀសនេះឡើយ។ នៅក្នុងសេចក្តីថ្លែងការណ៍មួយចេញភ្លាមៗ បន្ទាប់ពីអត្តពលិកអាហ្វហ្គានីស្ថានបានមកដល់ទីក្រុងតូក្យូ គាត់បានអរគុណ«រដ្ឋាភិបាលជាច្រើន» ដូចជាមជ្ឈមណ្ឌលកីឡានិងសិទ្ធិមនុស្ស នៅទីក្រុងហ្សឺណែវ អង្គការសិទ្ធិមនុស្សសម្រាប់ទាំងអស់គ្នានៅអូស្ត្រាលី គណៈកម្មាធិការប៉ារ៉ាឡាំពិកបារាំង សមាគមប៉ារ៉ាឡាំពិកអង់គ្លេស និងសមាគមន៏តេក្វាន់ដូពិភពលោក។
អ្នកស្រី Alison Battisson ស្ថាបនិកអង្គការសិទ្ធិមនុស្សដើម្បីទាំងអស់គ្នាដែលផ្តល់ជំនួយផ្នែកច្បាប់ដល់ជនភៀសខ្លួន បាននិយាយថាអ្នកស្រីបានធ្វើការជាមួយអ្នកស្រី Nikki Dryden អតីតកីឡាអូឡាំពិក កាណាដាដែលបានក្លាយជាមេធាវីសិទ្ធិមនុស្សបានបញ្ចុះបញ្ចូលរដ្ឋាភិបាលអូស្ត្រាលី ឱ្យទទួលយកអត្តពលិកនិងសម្របសម្រួលជាមួយកងទ័ពអូស្ត្រាលីដែលឈរជើងនៅទីក្រុងកាប៊ុល។ អ្នកស្រី Battisson បាននិយាយថានៅពេលដែលកីឡាករប៉ារ៉ាឡាំពិកទាំងពីរ មកដល់អាកាសយានដ្ឋានក្រុង តូក្យូពួកគេបានចែករំលែកទីតាំងរបស់ពួកគេទាំងពីររ ដោយប្រើការតាមដានជីភីអេស នៅលើទូរស័ព្ទដៃរបស់ពួកគេដូច្នេះសកម្មជន ដែលជាអ្នកជួយអាចដឹកនាំពួកគេទៅកាន់ផ្លូវចេញដែលមានសុវត្ថិភាព។
