ភ្នំពេញៈ ប្រមុខការពារជាតិកម្ពុជា សម្តេចពិជ័យសេនា ទៀ បាញ់ បានគាំទ្រចំពោះក្រសួងសុខាភិបាលដែលឱ្យប្រជាពលរដ្ឋដែលមានលទ្ធភាព ក៏ដូចជាវិស័យឯកជន ចូលរួមជាមួយរាជរដ្ឋាភិបាលកម្ពុជា ដឹកនាំដោយសម្តេចអគ្គមហាសេនាបតីតេជោ ហ៊ុន សែន ក្នុងការបង្កើតភាពស៊ាំសហគមន៍ តាមរយៈការរ៉ាប់រងថ្លៃវ៉ាក់សាំង ដើម្បីការពារអាយុជីវិតខ្លួន ក្រុមគ្រួសារ ញាតិមិត្ត និងសហគមន៍របស់យើងពីជំងឺកូវីដ-១៩។

សម្តេចពិជ័យសេនា បានមានប្រសាសន៍ប្រាប់ AMS នៅថ្ងៃទី០២ ខែកញ្ញានេះថា ទាំងអស់គ្នាផ្តោតលើការយកចិត្តទុកដាក់ប្រយុទ្ធប្រឆាំងជាមួយជំងឺកូវីដ-១៩ ឱ្យបានទូលំទូលាយពីគ្រប់សមត្ថភាព និងគ្រប់មជ្ឈដ្ឋានទាំងអស់ ដែលបានចូលរួម គឺជាភាពប្រពៃហើយ។ ចំពោះកិច្ចការងារនេះ ជាការងារមួយដ៏សមស្រប សម្តេចក៏គាំទ្រចំពោះការណែនាំរបស់ក្រសួងសុខាភិបាលឱ្យប្រជាពលរដ្ឋដែលមានលទ្ធភាព ក៏ដូចជាវិស័យឯកជន ចូលរួមជាមួយរាជរដ្ឋាភិបាលកម្ពុជា ដឹកនាំដោយសម្តេចអគ្គមហាសេនាបតីតេជោ ហ៊ុន សែន ក្នុងការបង្កើតភាពស៊ាំសហគមន៍ តាមរយៈការរ៉ាប់រងថ្លៃវ៉ាក់សាំង។ ការចូលរួមនេះ មិនមែនបង្កើតនូវភាពស៊ាំតែមួយមុខទេ គឺវាអាចនឹងរួមចំណែកនៅគ្រប់ផ្នែកទាំងអស់ និងគ្រប់វិធានការទាំងអស់ដែលប្រយុទ្ធប្រឆាំងជាមួយកូវីដ-១៩។

ទាក់ទងការចាក់វ៉ាក់សាំងដូសទី៣ ឬដូសជំរុញជូនដល់កងទ័ព និងគ្រួសារកងទ័ព សម្តេចពិជ័យសេនា ទៀ បាញ់ ប្រមុខការពារជាតិកម្ពុជា បានបញ្ជាក់ថា ចំពោះការចាក់ដូសជំរុញនេះ កងទ័ពក៏ដូចជាក្រុមគ្រួសារកងទ័ព បានថ្លែងអំណរគុណយ៉ាងជ្រាលជ្រៅចំពោះសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដែលបានផ្តល់ការយកចិត្តទុកដាក់។ ដោយមកដល់ពេលនេះ ជាង៩០ភាគរយ ជិត១០០ភាគរយ បានចាក់ដូសជំរុញ៕
ដោយៈពលជ័យ