អភិបាលខេត្តកណ្ដាល បកស្រាយជុំវិញរឿងមន្ត្រី ចុះចាប់ហាមឃាត់ពលរដ្ឋមិនឲ្យសម្លាប់សត្វពពែ
ខេត្តកណ្តាល ៖ បន្ទាប់ពីមានប្រតិកម្មពីសម្តេចតេជោ ហ៊ុន សែន ករណីមន្ត្រីហាមពលរដ្ឋមិនឲ្យសម្លាប់សត្វពពែ រួចមក លោក គង់ សោភ័ណ្ឌ អភិបាលខេត្តកណ្ដាល បានបកស្រាយជុំវិញរឿងនេះ នាថ្ងៃទី១៨ កញ្ញា ២០២១ ។
លោក គង់ សោភ័ណ្ឌ អភិបាលខេត្តកណ្ដាល បានគោរពរាយការណ៍ជូនសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា យ៉ាងដូច្នេះថា ក្នុងនាមរដ្ឋបាលខេត្តកណ្តាល ករណីមន្ត្រីកសិកម្មនៃមន្ទីរកសិកម្ម រុក្ខាប្រមាញ់ និងនេសាទខេត្តកណ្តាល ធ្វើការឃាត់សួរប្រជាពលរដ្ឋដែលដឹកជញ្ជូនសាច់សត្វពពែ ដូចខាងក្រោម ៖
ករណីនេះ កើតឡើងនៅវេលាម៉ោង៦ព្រឹក ថ្ងៃទី១៧ ខែកញ្ញា ឆ្នាំ២០២១ នៅចំណុចភូមិព្រែកតាព្រហ្ម ឃុំកំពង់អុស ស្រុកពញាឮ ខេត្តកណ្តាល ។
មូលហេតុ នៃការឃាត់សួររបស់មន្ត្រីបសុពេទ្យស្រុកពញាឮ ៖ ដោយសារប្រជាពលរដ្ឋដឹកជញ្ជូនសាច់សត្វពពែ ចំនួន១៧គីឡូក្រាម ដោយគ្មានលិខិតអនុញ្ញាត ។
ករណីនេះ មិនមែនជាការកាប់សាច់សត្វ ដើម្បីហូបជាលក្ខណៈគ្រួសារទេ ប៉ុន្តែជាប្រភេទអាជីវកម្មលើសាច់សត្វ ដោយប្រជាពលរដ្ឋបាននាំចូលសត្វពពែ មកពីខេត្តបន្ទាយមានជ័យ មកកាប់សាច់លក់រាល់ថ្ងៃ ប្រជាជនទាំង ២៥នាក់ បាននាំចូល មួយថ្ងៃ៥០ក្បាល ។ គាត់មិនព្រម ចូលសត្តឃាតដ្ឋាន ហើយនៅតែកាប់ តាមផ្ទះ ចោលសំណល់តាមដងទន្លេ ធ្វើឲ្យកខ្វក់បរិស្ថាន និងងាយចម្លងជំងឺដល់ សត្វ ឬមនុស្ស (ចម្ងាយពីផ្ទះបងប្អូនអាជីវករ ដល់ទីតាំងសត្តឃាតដ្ឋានប្រមាណ ៨០០ម៉ែត្រប៉ុណ្ណោះ) ។
មន្ត្រីជំនាញ បានជំរុញឲ្យគាត់ចូលសត្តឃាតដ្ឋាន ប៉ុន្តែដោយសារការមិនត្រូវរ៉ូវតម្លៃគ្នា រវាងម្ចាស់សត្តឃាតដ្ឋាន និងអាជីវករកាប់សាច់ ដោយតម្លៃសត្តឃាតមួយក្បាលតម្លៃ ៩,០០០រៀល ប៉ុន្តែអាជីវករស្នើសុំបង់ត្រឹមតែ ៤,០០០រៀល ទើបបងប្អូនបន្តកាប់តាមផ្ទះ ។
មន្ត្រីជំនាញ បានប្រជុំណែនាំ ជាច្រើនដង និងរយៈពេលចុងក្រោយនេះ គាត់សុំពន្យាពេលមួយខែ ដើម្បីរៀបចំមុខរបរគាត់ ។ កន្លងហួស១ខែ នៅតែមិនព្រម ដោះស្រាយគ្នា តាមច្បាប់អាជីវកម្ម ទើបមន្ត្រីជំនាញចុះចាប់សាច់ អោយធ្វើកិច្ជសន្យា ឈប់កាប់សាច់លក់ តាមផ្ទះទៀត និងត្រូវមានលិខិតអនុញ្ញតិអាជីវកម្ម ពិឃាដសត្វ ។
វិធានការ របស់រដ្ឋបាលខេត្តកណ្តាល ៖
-បានណែនាំដល់មន្ទីរកសិកម្ម រុក្ខាប្រមាញ់ និងនេសាទខេត្ត និងអភិបាលស្រុក សម្របសម្រួល និងផ្តល់លក្ខណៈងាយស្រួលក្នុងការផ្តល់លិខិតអនុញ្ញាត ចំពោះប្រជាពលរដ្ឋដែលប្រកបអាជីវកម្មសាច់សត្វ ។ ប៉ុន្តែក្នុងករណីប្រជាពលរដ្ឋធ្វើការកាប់សាច់សត្វហូបជាលក្ខណៈគ្រួសារ គឺត្រូវអនុញ្ញាតជូនពួកគាត់ និងហាមដាច់ខាតការរំខាននានា ។
-ជំរុញការសម្របសម្រួលការងារបច្ចេកទេស និងការចចារតម្លៃរវាងម្ចាស់សត្តឃាតដ្ឋាន និងអាជីវករប្រកបអាជីវកម្មសាច់សត្វ
នៅថ្ងៃចន្ទ ទី២០ ខែកញ្ញា ឆ្នាំ២០២១ នៅសាលាស្រុកពញ៉ាឮ ។
-ក្រើនរម្លឹកមន្ត្រីជំនាញបសុព្យាបាលខេត្ត មានសម្តី ឥរិយាបទ របៀបរបបការងារអោយល្អប្រសើរ ជាមួយប្រជាជន អាជីវករ ។
រដ្ឋមន្ត្រីក្រសួងកសិកម្ម ឆ្លើយតបរឿងមន្ត្រីចុះចាប់ហាមឃាត់ពលរដ្ឋមិនឲ្យកាប់ពពែ យកសាច់ ដោយឯកឧត្តម វេង សាខុន បានឆ្លើយតបតាមរយៈការខមិន យ៉ាងដូច្នេះថា «ការចិញ្ចឹមសត្វ និងការសម្លាប់សត្វក្នុងគោលបំណង ដើម្បីផ្គត់ផ្គង់ជីវភាពក្នុងគ្រួសារ គឺពុំមានទោសទណ្ឌ និងមានចែងនៅក្នុងច្បាប់ស្តីពីសុខភាពសត្វ និងផលិតកម្មសត្វ នោះទេ ហើយក៏គ្មានជាប់ពាក់ព័ន្ធទៅការប្រព្រឹត្តបទល្មើសអ្វីដែរ លើកលែងតែការសម្លាប់សត្វក្នុងគោលបំណងធ្វើអាជីកម្មតែប៉ុណ្ណោះ» ។
ជុំវិញករណីនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ថ្ងៃទី១៨ ខែកញ្ញា ឆ្នាំ២០២១ បានបញ្ជាឲ្យឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដឹកនាំកិច្ចប្រជុំដោះស្រាយជាកញ្ចប់ ទាំងក្របខណ្ឌគោលនយោបាយច្បាប់ និងលខិតបទដ្ឋាននានា ពាក់ព័ន្ធករណីប្រជាពលរដ្ឋសម្លាប់ពពែ នៅតាមផ្ទះរបស់ពួកគាត់ ។
សម្តេចតេជោ ហ៊ុន សែន បញ្ជាក់ថា ដំណាក់ការដែលយើងកំពុងស្ថិតនៅ គឺជាដំណាក់ការកសិ-ពាណិជ្ជកម្ម ដែលកសិករយើងមិនគ្រាន់តែដាំដុះ ឬចិញ្ចឹមសត្វ ដើម្បីផ្គត់ផ្គង់ក្នុងគ្រួសារប៉ុណ្ណោះទេ តែក៏ដើម្បីផ្គត់ផ្គង់ទីផ្សារផងដែរ ។ ក្នុងពេលជាមួយគ្នាក៏ត្រូវគិតដល់បញ្ហាសុខភាពសាធារណៈ ជំងឺឆ្លងដែលចេញពីសត្វ ដែលធ្វើចរាចរក្នុងទីផ្សារ បញ្ហាអានាម័យ។ល។
