ក្រុមបាតុករគាំទ្រលោកត្រាំមួយចំនួនតូចប្រមូលផ្ដុំនៅមុខសភា ក្រោមការឃ្លាំមើលយ៉ាងខ្លាំងពីប៉ូលិស
កាលពីថ្ងៃសៅរ៍ ទី១៨ កញ្ញា ប៉ូលិស និងអ្នកសារព័ត៌មានមានចំនួនធំជាងបាតុករ នៅក្នុងបាតុកម្មរៀបចំដោយអ្នកគាំទ្ររបស់អតីតប្រធានាធិបតីអាមេរិកលោកដូណាល់ ត្រាំពីមុខអគារកាពីតូលរបស់សភាអាមេរិក ដើម្បីបង្ហាញការគាំទ្រចំពោះអ្នកចូលរួមកុបកម្មវាយលុកចូលអគារនេះកាលពីថ្ងៃទី ៦ មករាដើមឆ្នាំនេះកន្លងទៅ។
ប៉ូលិសរាប់រយនាក់ល្បាតនៅបរិវេណវិមានកាពីតូល ហើយរបងកម្ពស់ជាងពីរម៉ែត្រត្រូវបានសាងសង់នៅជុំវិញទីនោះ ខណៈពេលដែលក្រសួងការពារជាតិអាមេរិកបានបម្រុងទាហានឆ្មាំជាតិមួយរយនាក់សម្រាប់ការដាក់ពង្រាយបើសិនចាំបាច់។ វិធានការទាំងនេះបង្ហាញពីភាពព្រួយបារម្ភរបស់អាជ្ញាធរអំពីការកើតឡើងការវាយប្រហារដូចកាលពីថ្ងៃ ៦ មករាម្ដងទៀត។
បាតុករប្រមាណ ១០០ ទៅ ២០០នាក់ បានប្រមូលផ្ដុំនៅមុខអគារសភាអាមេរិក ដោយខ្លះមានកាន់ទង់នៃក្រុមស្ដាំជ្រុលនិយម។ ចំនួននេះគឺតិចជាងការរំពឹងទុក ៧០០ នាក់របស់អ្នករៀបចំ ដែលរៀបចំការបាតុកម្មនេះដើម្បីបំពេញបំណងនៃកិច្ចខិតខំប្រឹងប្រែងរបស់អ្នកគាំទ្ររបស់លោកត្រាំក្នុងសរសេរប្រវត្តិសាស្ត្រឡើងវិញនៃការវាយប្រហារលើអគារកាពីតូល បន្ទាប់ពីការចាញ់ឆ្នោតរបស់លោក។
ក្រុមបាតុករ បានអះអាងថា អ្នកវាយលុកចូលទៅបំផ្លាញអគារកាពីតូល ដែលត្រូវបានអាជ្ញាធរចាប់ខ្លួន និងបញ្ជូនទៅតុលាការគឺជា «អ្នកទោសនយោបាយ» ហើយទាមទារអាជ្ញាធរឱ្យដោះលែងពួកគេ។ មនុស្សជាង ៦០០ នាក់ត្រូវបានចាប់ខ្លួនបន្ទាប់ពីការវាយប្រហារថ្ងៃ ៦ មករា ដែលបានធ្វើឱ្យមនុស្សបួននាក់ស្លាប់។ អយ្យការ និងអ្នកជំនាញច្បាប់បាននិយាយច្បាប់សំណុំរឿងព្រហ្មទណ្ឌប្រឆាំងបុគ្គលទាំងនេះគឺធ្វើឡើងដោយស្របច្បាប់ និងគ្រប់គ្រងដោយត្រឹមត្រូវ។
ក្រុមបាតុករក៏នៅមានជំនឿដោយគ្មានមូលដ្ឋានថាលោកត្រាំបានឈ្នះការបោះឆ្នោតប្រធានាធិបតីឆ្នាំ ២០២០ ប៉ុន្តែលទ្ធផលត្រូវបានគេក្លែងបន្លំឱ្យលោកចូ បៃដិនឈ្នះវិញ៕
ប្រភព៖ Reuters
