ម៉ាឡេស៊ីសម្តែងការព្រួយបារម្ភពីស្ថិរភាពក្នុងតំបន់បន្ទាប់ពីមានកិច្ចព្រមព្រៀងស្តីពីនាវាមុជទឹករវាងមហាអំណាច
ប្រទេសម៉ាឡេស៊ីបានសម្តែងការព្រួយបារម្ភពីភាពជាដៃគូសន្តិសុខរបស់ប្រទេសអូស្ត្រាលី ចក្រភពអង់គ្លេស និងសហរដ្ឋអាមេរិក (AUKUS) ដែលអាចបង្កអោយមានការប្រកួតប្រជែងអាវុធនុយក្លេអ៊ែរនៅក្នុងតំបន់ឥណ្ឌូ-ប៉ាស៊ីហ្វិក ។
ការិយាល័យនាយករដ្ឋមន្ត្រីម៉ាឡេស៊ី (PMO) បាននិយាយនៅក្នុងសេចក្តីថ្លែងការណ៍មួយថា៖ «ភាពជាដៃគូនេះនឹងបង្កអោយប្រទេសមហាអំណាចផ្សេងទៀតធ្វើបន្ថែមសកម្មភាពបែបនេះនៅក្នុងតំបន់ ជាពិសេសនៅសមុទ្រចិនខាងត្បូង» ។
សេចក្តីថ្លែងការណ៍នោះបាននិយាយថា៖ «ក្នុងនាមជាប្រទេសមួយនៅក្នុងតំបន់អាស៊ាន ម៉ាឡេស៊ីប្រកាន់ខ្ជាប់នូវគោលការណ៍នៃការរក្សាអាស៊ានជាតំបន់សន្តិភាពសេរីភាព និងអព្យាក្រឹត្យភាព (ZOFPAN)» ។
នៅក្នុងភាពជាដៃគូនោះ ប្រទេសអូស្ត្រាលីនឹងសាងសង់នាវាមុជទឹកដើរដោយថាមពលនុយក្លេអ៊ែរចំនួន ៨ គ្រឿង។ ភាពជាដៃគូរបស់ភាគីទាំងបីបង្កើតឡើងក្នុងគោលបំណងពង្រឹងសមត្ថភាពយោធាដើម្បីទទួលបានកងនាវាមុជទឹកនុយក្លេអ៊ែរ និងនាវាកាំជ្រួចមីស៊ីល។
ប្រទេសចិនក៏បានថ្កោលទោសកិច្ចព្រមព្រៀងនេះថាជាការគំរាមកំហែងដោយមិនមានការទទួលខុសត្រូវខ្លាំងចំពោះស្ថិរភាពនៅក្នុងតំបន់។ កិច្ចព្រមព្រៀងនេះក៏បានធ្វើអោយបារាំងខឹងសម្បារផងដែរដោយខ្លួនបានកំពុងចរចាលក់នាវាមុជទឹកទៅអោយប្រទេសអូស្ត្រាលី។
ប្រភព៖ CNA
