ប្រធានាធិបតីបារាំងសុំការអភ័យទោសពីអតីតយុទ្ធជនអាល់ហ្សេរី ដែលតស៊ូដើម្បីបារាំងក្នុងសង្គ្រាមទាមទារឯករាជ្យ
ប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) សុំការអភ័យទោសពីអតីតយុទ្ធជនអាល់ហ្សេរី Harkis ដែលតស៊ូដើម្បីបារាំងក្នុងអំឡុងសង្គ្រាមទាមទារឯករាជ្យរបស់ប្រទេសខ្លួន ដោយថាបារាំងបរាជ័យចំពោះកាតព្វកិច្ចរបស់ខ្លួនសម្រាប់ក្រុមនេះ។
ម៉ូស្លីមអាល់ហ្សេរីរាប់សែននាក់ដែលគេស្គាល់ថាជាក្រុម Harkis បម្រើការជាជំនួយការនៅក្នុងកងទ័ពបារាំងក្នុងអំឡុងសង្គ្រាមជាមួយក្រុមអ្នកប្រយុទ្ធដើម្បីឯករាជ្យអាល់ហ្សេរី ប្រឆាំងនឹងអាណានិគមបារាំងចន្លោះពីឆ្នាំ ១៩៥៤ ដល់ ១៩៦២។
យោងតាមទីភ្នាក់ងារព័ត៌មាន AFP អតីតយុទ្ធជនទាំងនេះជាច្រើននាក់រស់នៅក្នុងស្ថានភាពក្រីក្រក្នុងជំរំតង់ បន្ទាប់ពីរដ្ឋាភិបាលបារាំងបដិសេធមិនទទួលស្គាល់សិទ្ធិរបស់ពួកគេដើម្បីរស់នៅប្រទេសអឺរ៉ុបមួយនេះ ហើយអ្នកដែលនៅសេសសល់នៅអាល់ហ្សេរីក៏ត្រូវប្រឈមមុខនឹងការសងសឹកយ៉ាងព្រៃផ្សៃក្នុងនាមជាអ្នកសហការជាមួយប្រទេសអណានិគម។ គេប៉ាន់ប្រមាណថា អតីតយុទ្ធជនរហូតជាង ២០០ ០០០ នាក់បានប្រយុទ្ធដើម្បីបារាំង ប៉ុន្តែមានតែ ៤២ ០០០ នាក់ប៉ុណ្ណោះ ដែលអនុញ្ញាតឱ្យផ្លាស់ទីលំនៅទៅបារាំងបន្ទាប់ពីអាល់ហ្សេរីទទួលឯករាជ្យ។
ថ្លែងទៅកាន់អ្នកចូលរួមពី Harkis និងក្រុមគ្រួសាររបស់ពួកគេជាង ៣០០ នាក់នៅប៉ារីស លោក Macron និយាយថា៖ «តាំងនាមឱ្យប្រទេសបារាំង ខ្ញុំសូមប្រកាសថា សាធារណរដ្ឋបារាំងជំពាក់បំណុលអតីតយុទ្ធជន Harkis ។ ចំពោះយុទ្ធជនដែលត្រូវគេបោះបង់ចោល ចំពោះគ្រួសាររបស់ពួកគេដែលបានរងទុក្ខវេទនាក្នុងជំរំពន្ធនាគារ ចំពោះការបដិសេធ ខ្ញុំសូមអភ័យទោស យើងនឹងមិនភ្លេចឡើយ»។
សុន្ទរកថាកាលពីថ្ងៃចន្ទ គឺជាសក្ខីភាពចុងក្រោយបង្អស់ក្នុងការប៉ុនប៉ងជាបន្តបន្ទាប់របស់ប្រធានាធិបតីបារាំង ដើម្បីដោះស្រាយបញ្ហាទុក្ខព្រួយជាប្រវត្តិសាស្ត្រជាមួយអាល់ហ្សេរី ក្នុងក្តីសង្ឃឹមធ្វើឱ្យទំនាក់ទំនងរវាងប្រទេសទាំងពីរមានភាពប្រសើរឡើងវិញចាប់តាំងពីប្រទេសអាល់ហ្សេរីទទួលឯករាជ្យនៅឆ្នាំ ១៩៦២។
កាលពីខែមីនា រដ្ឋាភិបាលរបស់លោក Macron សារភាពថាកងទ័ពរបស់ខ្លួន បានធ្វើទារុណកម្ម និងសម្លាប់សកម្មជនអាល់ហ្សេរីដ៏លេចធ្លោម្នាក់កាលពីជាង ៦០ ឆ្នាំមុន។ ក្នុងសុន្ទរកថាដដែល លោក Macron ក៏គូសបញ្ជាក់ពីផែនការសម្រាប់គណៈកម្មការមួយដើម្បីស្តាប់អំពីជំរំបារាំងកំសត់ដែលអតីតយុទ្ធជន និងកូនៗរបស់ពួកគេត្រូវបង្ខំឱ្យរស់នៅ។
ប្រភព៖ BBC
