តំណាងមីយ៉ាន់ម៉ាមិនឡើងថ្លែងសុន្ទរកថានៅវេទិកាអង្គការសហប្រជាជាតិឡើយ
មីយ៉ាន់ម៉ា នឹងមិនមានតំណាងណាមួយឡើងនិយាយនៅវេទិកាមហាសន្និបាតអង្គការសហប្រជាជាតិឡើយនៅឆ្នាំ២០២១នេះ ស្របពេលថ្នាក់ដឹកនាំពិភពលោកនានាថ្លែងសុន្ទរកថានៅទីស្នាក់ការអង្គការនេះនាឯទីក្រុងញូវយ៉ក ទោះក្នុងទម្រង់មកដោយផ្ទាល់ក្ដី ឬ ដោយខ្សែអាត់វីដេអូថតទុកជាមុនក្ដី។
ជារៀងរាល់ឆ្នាំ មុនពេលដែលសម័យប្រជុំថ្មីត្រូវបានបើក មេដឹកនាំពិភពលោកនានា ច្រើនតែមកជួបប្រជុំគ្នានៅបុរីញូវយ៉ក ដើម្បីមកបកស្រាយពីគោលជំហរនានារបស់ខ្លួនទៅកាន់ពិភពលោក។ សម្រាប់ឆ្នាំ២០២១ នេះ វេទិកាដេញដោលមតិនេះចាប់ផ្ដើមឡើងនៅថ្ងៃទី២១ ខែកញ្ញា រហូតដល់ថ្ងៃទី២៧ ខែកញ្ញា។
សម្រាប់ករណីមីយ៉ាន់ម៉ាវិញ មុននឹងកិច្ចប្រជុំចាប់ផ្ដើម កាលវិភាគព្រាងមួយបានបង្ហាញឱ្យឃើញថា តំណាងអចិន្ត្រៃយ៍របស់ប្រទេសអាស៊ីអាគ្នេយ៍នេះប្រចាំនៅអង្គការសហប្រជាជាតិគឺ លោក Kyaw Moe Tun ជាអ្នកត្រូវឡើងនិយាយនៅឆាកស្ថាប័នពិភពលោកនេះ នៅថ្ងៃចុងក្រោយ ពោលគឺនៅថ្ងៃច័ន្ទសប្ដាហ៍នេះ។
អ្នកនាំពាក្យអង្គការសហប្រជាជាតិលោក Stephane Dujarric បានប្រាប់ទៅកាន់អ្នកសារព័ត៌មានតាមសារអេឡិចត្រូនិកថា «ស្ថិតក្នុងចំណុចនេះ មីយ៉ាន់ម៉ាមិនឡើងនិយាយនោះទេ»។
ចំណែកឯលោក Kyaw Moe Tun ខ្លួនឯងផ្ទាល់បានប្រាប់បញ្ជាក់ទៅកាន់សារព័ត៌មាន Reuters ថា លោកក៏នឹងមិនថ្លែងសុន្ទរកថាណាមួយនៅវេទិកាអង្គការសហប្រជាជាតិនោះទេ។
លោកបានលើកឡើងថា «ខ្ញុំដកឈ្មោះ ពីបញ្ជីត្រូវឡើងនិយាយ ហើយនឹងខ្ញុំនឹងមិនបកស្រាយអ្វីឡើយនៅក្នុងវេទិកាដេញដោលមតិទូទៅនេះ»។
អាសនៈមីយ៉ាន់ម៉ាប្រចាំអង្គការសហប្រជាជាតិនៅមានភាពចម្រូងចម្រាសនៅឡើយ ក្រោយពីក្រុមយោធាធ្វើរដ្ឋប្រហារទម្លាក់រដ្ឋាភិបាលស៊ីវិលដឹកនាំដោយគណបក្សសម្ព័ន្ធជាតិដើម្បីប្រជាធិបតេយ្យ កាលពីខែកុម្ភៈកន្លងទៅ។
បន្ទាប់ពីមានព្រឹត្តិការណ៍ថ្ងៃទី១ ខែកុម្ភៈ ទាំងខាងយោធា និងខាងស៊ីវិល ដែលតំណាងដោយរដ្ឋាភិបាលរួបរួមជាតិមីយ៉ាន់ម៉ា (NUG) បានអះអាងរៀងៗខ្លួនថា ខ្លួនមានសិទ្ធិស្របច្បាប់ក្នុងការគ្រប់គ្រងប្រទេសមីយ៉ាន់ម៉ា។
ក្រោយពេលរដ្ឋប្រហារ លោក Kyaw Moe Tun បានកក្រើកពិភពលោក ដោយប្រកាសថា លោកជាទូតតំណាងឱ្យរដ្ឋាភិបាលស៊ីវិល ហើយព្រមទាំងថ្កោលទោសការធ្វើរដ្ឋប្រហារ ដោយក្រុមយោធាទៀតផង។ បន្ទាប់មក ក្រសួងការបរទេស ដែលតែងតាំងដោយយោធា បានប្រកាសបណ្ដេញលោកចេញពីតំណែង ហើយចោទលោកក្រោមបទក្បត់ជាតិ។
អ្វីដែលកាន់ស្មុគស្មាញទៅទៀតនោះគឺ លោក Wunna Muang Lwin បានសរសេរសំបុត្រទៅកាន់លោក អង់តូនីញ៉ូ ហ្គូទែរ៉េស អគ្គលេខាធិការអង្គការសហប្រជាជាតិ កាលពីខែឧសភា ស្ដីពីការតែងតាំងអតីតកងទ័ពជើងអាកាសមីយ៉ាន់ម៉ា ធ្វើជាទូតនៅអ.ស.ប. ជំនួសលោក Kyaw Moe Tun។
ជាធម្មតា រាល់ការសម្រេចលើភាពស្របច្បាប់របស់តំណាងណាមួយ ជាសមត្ថកិច្ចរបស់គណៈកម្មការទទួលសារតាំងរបស់ស្ថាប័នពិភពលោកនេះ។ គណៈកម្មការនេះមានសមាជិក ៩ប្រទេស ដោយក្នុងនោះក៏មានសហរដ្ឋអាមេរិក ចិន និងរុស្ស៊ីផងដែរ។
ចាប់តាំងពីពេលនោះមក មិនមានការសម្រេចច្បាស់លាស់ណាមួយថា ក្រុមណាមួយជាអ្នកតំណាងមីយ៉ាន់ម៉ានោះទេ ប៉ុន្តែលោក Kyaw Moe Tun នៅបន្តកាន់តំណែងដដែល ហើយថែមទាំងបោះឆ្នោតយល់ព្រមលើសេចក្ដីសម្រេចចិត្តរបស់មហាសន្និបាតអង្គការសហប្រជាជាតិកាលពីខែមិថុនា ដែលធ្វើការអំពាវនាវមិនឱ្យមាន «លំហូរចូលនៃអាវុធ» ទៅកាន់មីយ៉ាន់ម៉ាទៀតផង។
ពាក់ព័ន្ធនឹងរឿងនេះដែរ បើតាមការចុះផ្សាយរបស់ព្រឹត្តិបត្រព័ត៌មាន Foreign Policy នៅក្នុងខែកញ្ញានេះ សហរដ្ឋអាមេរិក និងចិន បានព្រមព្រៀងក្រៅផ្លូវការក្នុងការសម្រេចចិត្តរក្សានូវវត្តមានរបស់លោក Kyaw Moe Tun នៅប្រថាប់លើអាសនៈមីយ៉ាន់ម៉ាក្នុងអង្គការសហប្រជាជាតិដដែល រហូតដល់មានកិច្ចប្រជុំរបស់គណៈកម្មការទទួលសារតាំងនៅខែវិច្ឆិកា។
ជាថ្នូរមកវិញ លោក Kyaw Moe Tun នឹងមិនឡើងថ្លែងសុន្ទរកថានៅវេទិកាដេញដោលមតិនៅ UN នោះទេ។
ខាង Foreign Policy បានអះអាងថា រុស្ស៊ី សហភាពអឺរ៉ុប ហើយសមាជិកមួយចំនួនរបស់ប្រទេសសមាគមប្រជាជាតិអាស៊ីអាគ្នេយ៍ ឬ ហៅកាត់ថា អាស៊ាន បានប្រកាសគាំទ្រលើការសម្រេចចិត្តនេះ។
កាលពីសប្ដាហ៍មុន លោក Kyaw Moe Tun បានប្រាប់ Reuters ថា លោកក៏បានដឹងអំពីរឿងនេះផងដែរ តែលោកមិនបានផ្ដល់ការអត្ថាធិប្បាយលម្អិតណាមួយឡើយ។
ស្ថានភាពនៅមីយ៉ាន់ម៉ាកាន់តែមានភាពតឹងតែងបន្ថែមទៀតរវាងក្រុមយោធា និងក្រុមអ្នកប្រឆាំងនឹងរដ្ឋប្រហារ បន្ទាប់ពីរដ្ឋាភិបាល NUG ប្រកូកប្រកាសអំពាវនាវឱ្យមានការបះបោរប្រឆាំងនឹងអាជ្ញាធរយោធា កាលពីដើមខែកញ្ញាកន្លងទៅ៕
