អ្នក​គាំទ្រ​ប្រធានាធិបតី​ទុយនេស៊ី​លោក​ Kais Saied ​យ៉ាង​ហោច​ណាស់​មាន​ចំនួន​ ៨ ០០០​​នាក់​​ ​ប្រមូល​ផ្តុំ​គ្នា​នៅ​រដ្ឋ​ធានី​ទុសនីស​កាល​ពី​ថ្ងៃ​អាទិត្យ​​ដើម្បី​​បង្ហាញ​ការ​គាំទ្រ​ចំពោះ​ការ​បង្កក​សភា​​ និង​ការ​សន្យា​ថា​នឹង​ផ្លាស់​ប្តូរ​ប្រព័ន្ធ​នយោបាយ​របស់​លោក​ ដែល​​អ្នក​រិះ​គន់​​ហៅ​ថាជា​​ការ​ធ្វើ​រដ្ឋ​ប្រហារ​។​

​ការ​ធ្វើ​បាតុកម្ម​កណ្តាល​ក្រុង​ទុយនីស​ដែល​ធំ​បំផុត​រាប់​ចាប់​តាំង​ពី​លោក​ Saied ​​ដណ្តើម​អំណាច​នីតិ​ប្រតិបត្តិ​កាល​ពី​ខែ​កក្កដា​នេះ​ ធ្វើ​ឡើង​​ក្រោយ​​មនុស្ស​ជាង​ ២០០០ ​នាក់​ប្រមូល​ផ្ដុំ​គ្នា​ប្រឆាំង​តវ៉ា​នឹង​សកម្មភាព​របស់​លោក​​ អំពាវ​នាវ​ឱ្យ​លោក​ចុះ​ចេញ​ពី​ដំណែង​ក្នុង​រយៈ​ពេល​ពីរ​​សប្តាហ៍​មុន​​​។

លោក​ Saied ​តែងតែ​លើក​ឡើង​ពី​ការ​គាំទ្រ​ជា​សាធារណៈ​ ចំពោះ​ការ​ផ្លាស់​ប្តូរ​របស់​លោក​ប្រឆាំង​នឹង​ឥស្សរជន​នយោបាយ​ និង​ប្រព័ន្ធ​នៃ​ការ​ចែក​រំលែក​អំណាច​រវាង​ប្រធានាធិបតី​ និងស​ភា ដែ​ល​លោក​និយាយ​ថា​បាន​រារាំង​ឆន្ទៈ​របស់​មតិភាគ​ច្រើន​។​

​ក្រុមបាតុករ​កាល​ពី​ថ្ងៃ​អាទិត្យ​ ​គ្រវី​ទង់​ជាតិ​ទុយនីស៊ី​ និង​កាន់​ផ្ទាំង​បដា​ប្រឆាំង​នឹង​គណបក្ស​ Ennahda ​ដែល​ជា​​បក្ស​​ធំ​ជាង​គេ​​ក្នុង​សភា ​និង​ជា​អ្នក​​ប្រឆាំង​លោកSaied​ដ៏​សំខាន់​​​។ ​បាតុករ​ខ្លះ​ហៅមេ​ដឹក​នាំ​បក្ស ​លោក​ Rached​ Ghannouchi ​ដែល​ប្រធាន​សភា​ដែរ​នោះ​ ថា​ជា​ «​ឃាតករ​»​។​

​បាតុករ​ម្នាក់​ឈ្មោះ ​Salem Ajoudi ​​និយាយ​ថា​៖​ «​យើង​ស្នើ​ឱ្យ​លោក​​ប្រធានាធិបតី​រំលាយ​សភា​ និង​ទទួល​ខុស​ត្រូវ​ចំពោះ​អ្នក​ដែល​ធ្វើ​ឱ្យ​ប្រជាជន​រង​ទុក្ខ​អស់​មួយ​ទសវត្សរ៍​»​។​

បាតុករ​ម្នាក់​ទៀត​ឈ្មោះ ​Adel Chemli ​និយាយ​ថា​៖​ «​ថ្ងៃ​នេះ​គឺ​ជា​ថ្ងៃ​ប្រវត្តិ​សាស្ត្រ។​ នេះ​ជា​លើក​ដំបូង​ដែល​ប្រជាជន​ភាគ​ច្រើន​នៅ​ជាមួយ​ប្រធានាធិបតី​របស់​ពួកគេ​»​។​ ​បាតុករ​មាន​វ័យ ​៦០ ​ឆ្នាំ​រូប​នេះ​បន្ត​ថា​៖​ ​«​ខ្ញុំ​​ស្គាល់​លោក​ Saied ​អស់​រយៈ​ពេល​ ៤០ ​ឆ្នាំ​ហើយ​។​ ​ខ្ញុំ​មក​ពី​កាណាដា ​ដើម្បី​គាំទ្រ​លោក​។​ ​​ខ្ញុំ​កំពុង​ធ្វើ​កិច្ចការ​នេះ​ដើម្បី​យុវជន​ ដើម្បី​អនាគត​ពួក​គេ​»​។​

​លោក​ Saied ​បាន​ធ្វើ​ឱ្យ​ទុយនីស៊ី​ធ្លាក់​ចូល​ទៅ​ក្នុង​វិបត្តិ​រដ្ឋធម្មនុញ្ញ​កាល​ពី​ខែ​កក្កដា​ ដោយ​បង្កក​សភា​​ បណ្តេញ​នាយក​រដ្ឋម​ន្រ្តី​ឱ្យ​ចុះ​ចេញ​ពី​ដំណែង​ និង​ទទួល​យក​អំណាច​ប្រតិបត្តិ​។​ កាល​ពី​ខែ​មុន ​លោក​បាន​លុប​ចោល​ផ្នែក​មួយ​ចំនួន​នៃ​រដ្ឋ​ធម្មនុញ្ញ​​ដើម្បីអាច​​ឱ្យ​លោកឡើង​កាន់អំណាច​ដោយក្រឹត្យ ​ដែល​ធ្វើ​ឱ្យ​មាន​ការ​សង្ស័យ​អំពី​ការ​ទទួល​បាន​នៃ​លទ្ធិ​ប្រជាធិបតេយ្យ​របស់​ទុយនីស៊ី​ចាប់​តាំង​ពី​បដិវត្តន៍​ឆ្នាំ​ ២០១១ ​ដែល​បង្ក​ឱ្យ​មាន​ការ​បះបោរ​ «​និទាឃ​រដូវ​អារ៉ាប់​»​ ​នៅ​ទូទាំង​ពិភព​​មូស្លីម​។​

​អន្តរាគមន៍​របស់​លោក​ Saied ​ធ្វើ​ឡើង​បន្ទាប់​ពី​មាន​ភាព​ជាប់​គាំង​ផ្នែក​សេដ្ឋកិច្ច​ និង​ភាព​ខ្វិន​នៃ​នយោបាយ​ជា​ច្រើន​ឆ្នាំ​ ដែល​កាន់​តែ​អាក្រក់​ទៅ​ៗ​ដោយ​សារ​តែ​វិធានការ​បិទ​ខ្ទប់​កាល​ពី​ឆ្នាំ​មុន​ ​យុទ្ធនាការ​ចាក់​វ៉ាក់សាំង​​យឺត​យ៉ាវ​ និង​​បាតុកម្ម​ជា​ដើម​។​

ប្រជាជន​​ទុយនីស៊ី​ជាច្រើន​ បន្ទោស​បញ្ហា​ទាំង​នោះ​ទៅ​លើ​ឥស្សរជន​នយោបាយ​ដែល​អាត្មានិយម​ និង​ពុក​រលួយ​ ហើយ​មើល​ឃើញ​ថា​លោក​ Saied ​ដែល​ជា​អ្នក​នយោបាយ​ឯករាជ្យ​ជាប់​ឆ្នោត​នៅ​ឆ្នាំ​ ២០១៩ ​ជា​ជើង​ឯក​សម្រាប់​ប្រជាជន​សាមញ្ញ​។

លោក​ Mongi ​Abdullah ​ដែល​ជា​គ្រូ​បង្រៀន​មក​ពី​ក្រុង​ Mahdia​ ​ដើម្បី​ចូល​រួម​បាតុកម្ម​​និយាយ​ថា​៖​ «​លោក ​Saied ​គឺ​ជា​ប្រធានាធិបតី​ស្អាតស្អំ ដែ​ល​អាច​ស្តារ​លទ្ធិប្រជាធិបតេយ្យ​ពិត​ប្រាកដ​»​។​

​ខណៈ​ពេល​ដែល​ការ​ស្ទង់​មតិ​​បង្ហាញ​ថា​ ចលនា​របស់​លោក​ Saied ​ទទួល​ការ​គាំទ្រ​ភាគ​ច្រើន​ ការ​ពន្យា​ពេល​ជា​យូរ​មក​ហើយ​របស់​លោក​ក្នុង​ការ​ប្រកាស​ពេល​វេលា​កំណត់​ពី​វិបត្តិ​ ​ចាប់​ផ្តើម​ពង្រឹង​ការ​ប្រឆាំង​នឹង​លោក​។​ ឥស្សរជន​នយោបាយ​ភាគ​ច្រើន​ និង​សហភាព​ការងារ​ដ៏​មាន​ឥទ្ធិពល​ UGTT ​និយាយ​ថា​ លោក​ត្រូវ​តែ​ចាប់​ផ្តើម​ពិគ្រោះ​យោបល់​ឱ្យ​បាន​ទូលំ​ទូលាយ​ ប្រសិន​បើ​លោក​មាន​គម្រោង​ធ្វើ​វិសោធនកម្ម​រដ្ឋ​ធម្មនុញ្ញ​ ដូច​ដែល​លោក​បង្ហាញ​ថា​លោក​នឹង​ធ្វើ​។​

​ទោះបី​ជា​ការ​ប្រមូល​ផ្តុំ​គ្នា​នៅ​ថ្ងៃ​អាទិត្យ​ ត្រូវ​បាន​រៀប​ចំ​ឡើង​ដោយ​ក្រុមស​កម្មជន​នៅ​លើ​បណ្តាញ​សង្គម​ក៏​ដោយ​ ក៏​គណបក្ស​តូច​ៗ​ចំនួន​បី​នៅក្នុ​ងស​ភារួ​ម​ទាំង​គណបក្ស​ Achaab ​បង្ហាញ​ការ​គាំទ្រ​​ដោយ​និយាយ​ថា​ ភាព​ខ្វិន​នៅ​ក្នុង​ប្រព័ន្ធ​នយោបាយ​​បង្ខំ​ឱ្យ​លោក​ Saied ​ធ្វើ​​អន្តរាគមន៍​។​

​លោក​ Mohamed Ammar ​សមាជិក​សភា​ឯករាជ្យ​ដែល​ចូល​រួម​បាតុកម្ម​​និយាយ​ថា​៖​ «​លោក ​Saied គួ​រ​តែ​តែង​តាំង​រដ្ឋាភិបាល​ ហើយ​ចាប់​ផ្តើម​កិច្ច​សន្ទនា​ដើម្បី​ធ្វើ​កំណែ​ទម្រង់​ប្រព័ន្ធ​ និង​ច្បាប់​បោះ​ឆ្នោត​ បន្ទាប់​មក​​​ធ្វើ​ប្រជា​មតិ​»​។​

​​កាល​ពី​សប្តាហ៍​មុន​ លោក​​Saied ​បាន​តែង​តាំង​លោក​ស្រី ​Najla Bouden Romdhane ​ជា​នាយក​រដ្ឋ​មន្រ្តី​ និង​បាន​ជំរុញ​ឱ្យ​លោក​ស្រី​បង្កើត​រដ្ឋាភិបាល​យ៉ាង​ឆាប់​រហ័ស​ ប៉ុន្តែ​​លោក​ស្រីត្រូ​វ​បាន​គេ​មើល​ឃើញ​ថា​នឹង​មាន​ឥទ្ធិពល​តិច​ជាង​អ្នក​កាន់​តំណែង​មុន​នៅ​ក្នុង​ការងារ​។​

​កាលពី​ថ្ងៃ​អាទិត្យ​ ប៉ូលីស​ទុយនីស៊ី​បាន​ចាប់​ខ្លួន​សមាជិក​សភា​ម្នាក់​ និង​ពិធីករ​ទូរទស្សន៍​ម្នាក់​ដែល​ជា​អ្នក​រិះគន់​​មិនសំចៃ​មាត់​ចំពោះ​លោក​ Saied ​ចាប់​តាំង​ពី​លោក​ចេញ​​​ចំណាត់​​​​ក្នុង​ខែ​កក្កដា​។​ នោះ​បើ​យោង​តាម​មេធាវី​របស់​អ្នក​ទាំង​ពីរ​។​ ​​យ៉ាង​ណា​មិញ​ មិន​មាន​ការ​បំភ្លឺ​យ៉ាង​ណា​ពី​​ប៉ូលីស​នៅ​ឡើយ​ទេ​។​

លោក Saied ​​និយាយ​ថា​ លោក​នឹង​មិន​ក្លាយ​ជា​ជន​ផ្តាច់ការ​ទេ​ ហើយ​​សន្យា​ថា​នឹង​ការពារ​សិទ្ធិ​ និង​សេរីភាព​។​ ចាប់​តាំងពី​​ខែ​កក្កដា​មក​ អ្នក​តំណាងរាស្ត្រ​មួយ​ចំនួន​តូច​ត្រូវ​​​ឃុំ​ខ្លួន​ក្រោម​សំណុំ​រឿង​ចោទ​ប្រកាន់​ចាស់​ៗ​​។​ អ្នក​នយោបាយ​ និង​មេដឹក​នាំ​ជំនួញ​ជា​ច្រើន​នាក់​ផ្សេង​ទៀត​ត្រូវ​បាន​ហាម​ឃាត់​ក្នុង​ការ​ធ្វើ​ដំណើរ​ ទោះ​បី​ជា​លោក​ Saied ​​និយាយ​ថា​ ការ​ហាម​ឃាត់​ទាំង​នេះ​ធ្វើ​តែ​លើ​មនុស្ស​ដែល​ប្រឈមមុខ​​នឹង​ការ​កោះ​ហៅ ​ឬ​ដីកាពី​​តុលាការ​ក្ដី​។​

ប្រភព៖ Aljazeera