កាប៊ុល៖ បេសកជនពិសេសរបស់នាយករដ្ឋមន្រ្តីអង់គ្លេសលោក បូរីស ចនសុនបានជួបជាមួយមេដឹកនាំតាលីបង់នៅអាហ្វហ្គានីស្ថាន ដើម្បីពិភាក្សាអំពីវិបត្តិមនុស្សធម៌ និងវិធីដើម្បីការពារប្រទេសនេះ កុំឱ្យក្លាយជាកន្លែងបង្កាត់ពូជរបស់ពួកសកម្មប្រយុទ្ធ។

យោងតាមការិយាល័យការបរទេសបានលើកឡើងថា លោក Simon Gass ជាអ្នកតំណាងជាន់ខ្ពស់របស់លោក ចនសុន សម្រាប់ប្រទេសអាហ្វហ្គានីស្ថាន បានជួបជាមួយមេដឹកនាំតាលីបង់ រួមមានលោក Amir Khan Muttaqi, លោក Mullah Abdul Ghani Baradar និងលោក Abdul Salam Hanafi។ ប្រភពដដែលនេះបានអោយដឹងថា ពួកគេបានពិភាក្សាអំពីរបៀបដែលចក្រភពអង់គ្លេសអាចជួយអាហ្វហ្គានីស្ថានក្នុងការដោះស្រាយវិបត្តិសេដ្ឋកិច្ច សារៈសំខាន់នៃការការពារប្រទេសនេះមិនឱ្យក្លាយជាកន្លែងបង្កាត់ពូជរបស់ក្រុមភេរវកម្ម និងតម្រូវការសម្រាប់ការបន្តរក្សាសុវត្ថិភាពដល់អ្នកដែលចង់ចាកចេញពីប្រទេសអាស៊ីខាងត្បូងមួយនេះ។ ពួកគេក៏បានលើកឡើងពីការការពារជនជាតិភាគតិច និងសិទ្ធិរបស់ស្ត្រី និងក្មេងស្រីផងដែរ។

គួរបញ្ជាក់ផងដែរថា បេសកជនពិសេសរបស់នាយករដ្ឋមន្រ្តីអង់គ្លេស គឺលោក Simon Gass ត្រូវបានអមដំណើរដោយភារធារីនៃបេសកកម្មចក្រភពអង់គ្លេសប្រចាំនៅអាហ្វហ្គានីស្ថាននៅទីក្រុងដូហា ផងដែរ៕ ប្រភព៖ CGTN