ចិនធ្វើសមយុទ្ធវាយលុកឆ្នេរសមុទ្រ ខណៈពេលដែលភាពតានតឹងជាមួយកោះតៃវ៉ាន់កើនឡើង
កាលពីថ្ងៃចន្ទ ទី១១ តុលាកងទ័ពរំដោះប្រជាជនចិនបាននិយាយថានៅរយៈពេលប៉ុន្មានថ្ងៃថ្មីៗនេះខ្លួនបានធ្វើសមយុទ្ធចុះចត និងវាយលុកឆ្នេរសមុទ្រមួយនៅជិតកោះតៃវ៉ាន់ ខណៈពេលដែលភាពតានតឹងជាមួយកោះនេះកំពុងកើនឡើងយ៉ាងខ្លាំង។
កាសែតផ្លូវការរបស់កងទ័ពរំដោះប្រជាជនចិនបានធ្វើការរាយការណ៍លើបណ្ដាញសង្គម Weibo ថាសមយុទ្ធនេះបានធ្វើនៅតំបន់ភាគខាងត្បូងនៃខេត្តហ្វូជៀន ដែលជាប់ជាមួយនឹងច្រកសមុទ្រតៃវ៉ាន់ដ៏តូចចង្អៀត។ អ្នកវិភាគមួយចំនួនគិតថាប្រសិនបើក្រុងប៉េកាំងសម្រេចចិត្តប្រើកម្លាំងដើម្បីបំពេញគោលនយោបាយចិនតែមួយ ខេត្តហ្វូជៀន នឹងក្លាយមូលដ្ឋានដ៏សំខាន់មួយសម្រាប់បេសកកម្មវាយកាន់កាប់កោះតៃវ៉ាន់ ដោយសារភូមិសាស្ត្រជិតគ្នា។
កាសែតនេះក៏បាននិយាយថាក្រុមទាហានត្រូវបាន «បែងចែកជារលកជាច្រើនដើម្បីចាប់យកឆ្នេរខ្សាច់ និងបំពេញភារកិច្ចប្រយុទ្ធនៅដំណាក់កាលផ្សេងៗគ្នា» ប៉ុន្តែមិនបានផ្ដល់ព័ត៌មានលម្អិតបន្ថែម។
កោះតៃវ៉ាន់បានរងសម្ពាធនយោបាយ និងយោធាយ៉ាងខ្លាំងពីប្រទេសចិន ដែលមើលឃើញកោះនេះថាជាដែនដីអធិបតេយ្យរបស់ខ្លួន ហើយនឹងធ្វើអ្វីគ្រប់យ៉ាងដើម្បីធ្វើឱ្យកោះនេះរួបរួមជាមួយខ្លួនវិញ។ កាលពីចុងសប្ដាហ៍មុនប្រធានាធិបតីចិនលោកស៊ី ជីនពីងបានធ្វើការសន្យាម្ដងទៀតថាបង្រួបបង្រួមជាមួយកោះតៃវ៉ាន់វិញ ខណៈពេលដែលប្រធានាធិបតីតៃវ៉ាន់លោកស្រីសៃ អ៊ីង-វិនបាននិយាយថាតៃវ៉ាន់នឹងមិនត្រូវបានបង្ខំឱ្យឱនក្បាលទៅប្រទេសចិនទេ៕
